پێشەکی
٢٥ نڤێسارێن تایبەت ژ بۆ بیرەوەریا ژدایکبوونا مەسیحی
وەرزێ ژدایکبوونا مەسیحی دەمەکێ گەلەك تایبەتە ژ بۆ باوەرداران داکو هاتنا خودانێ مە ل بیر بینن. ئەڤ پەرتووکا د دەستێن دا هاتیە نڤێسین داکو هاریکاریا تە بکەت تێگەهشتنا دلێ خۆ دەربارەی مەسیحی کویرتر لێ بکەی و حەزژێکرنا خۆ بۆ وی د ئەڤی وەرزی دا زێدە بکەی. هەر بابەتەکێ د ئەڤێ پەرتووکێ دا ژ لایێ نڤێسەرەکێ جیاوازڤە هاتیە نڤێسین. پڕانیا بەشێن ئەڤێ پەرتووکێ ژ لایێ باوەردارێن کورد ل دەڤەر و کەنیسەیێن جیاوازڤە هاتینە نڤێسین. هندەك ژ وان بیانینە، بەلێ ل دەڤەرێن جیاوازێن کوردستانێ بۆ چەندەها ساڵان ژیاینە و کوردیێ باش دزانن. ئەڤ پەرتووکا ژ زمانەکێ دی نەهاتیە وەرگێران؛ ل شوینێ ئەو ب کوردی هاتیە نڤێسین تایبەت ژ بۆ باوەردارێن کورد، کو ژیان و کەلتوورێ کوردی ل بەرچاڤ وەردگریت. سوپاسیێن بێسنور ژ بۆ هەمی نڤێسەران، بێ رەنج و زەحمەتا وان ئەڤ پەرتووکە ژدایك نەدبوو.
پێشینیار ل سەر چەوانیا خواندنا ئەڤێ پەرتووکێ:
ئەڤ پەرتووکە ژ ٢٥ بەشێن کورت پێك دهێت، هەر ئێك ژ بۆ رۆژەکێ، ژ ١ی هەیڤا ١٢ هەتا ٢٥ی هەیڤا ١٢ (هەتا رۆژا ئاهەنگگێرانا ژدایکبوونا مەسیحی). ئەڤ پەرتووکە هوسا هاتیە ئامادەکرن کو هەرۆژ بەشەکی بخوینی. هەر بەشەك ژ ئەڤان ئالاڤان پێك دهێت:
ئایەتا هەلبژاتی
بەشەکێ پەرتووکا پیرۆز کو دێ بۆ وێ رۆژێ خوینی (کو بابەتێ ئەوێ ئایەتا هەلبژارتیە)
شرۆڤەکرنەکا کورت دەربارەی بەشێ پەرتووکا پیرۆز وێ رۆژێ بخوینە
پرسیار ژ بۆ رەنگڤەدان و تێگەهشتنەکا کویرتر
نڤێژ
یا گرنگە کو، زێدەباری ئایەتا هەلبژارتی، تۆ بەشێ تەرخانکری بۆ ئەوێ رۆژێ بخوینی. ئانکو ئەو شروڤەکرنە نە بتنێ بۆ ئایەتا هەلبژارتی هاتینە نڤێسین دەربارەی هەر بابەتەکی بەلکو دەربارەی بەشێ تەرخانکری بۆ ئەوێ رۆژێ هاتینە نڤێسین. هەروەسا، ل دویماهیکا هەر بەشەکی، پرسیارەك هەیە کو هاریکاریا تە دکەت کویرتر ڤەکولینا وێ چەندا تە خواندی بکەی. هیڤیدارم ئەڤان پرسیاران پشتگوهـ نەهاڤێژی، چەند خۆلەکان بۆ ئەوان تەرخان بکە و ڤەکولینا ئەڤان پرسیاران بکە. ل دویماهیکێ، پشتی پێداچوونێ دەربارەی ئەڤان پرسیاران، دەمی بۆ نڤێژێ تەرخان بکە. ژ بۆ ئەڤێ چەندێ ژی، نڤێژەکا کورت ل دویماهیکا هەر بەشەکی هەیە داکو هاریکاریا تە د نڤێژێ دا بکەت. خواندنا هەمی پارچێن بەشێ رۆژەکێ ب پێداچوون و نڤێژڤە بتنێ ١٠ خولەك پێدڤینە. هیڤیدارم ئەڤ پەرتووکە تە کەرەمدار بکەت و ببیتە ئەگەرەك ژ بۆ مەزنکرنا ناڤێ مەسیحی.
