رۆژا چوارێ
میرێ ئاشتیێ
ئیشایا ٩: ٦
چنكو دێ بومە كوڕەك هەبیت و دێ كوڕەكی دەتە مە بارێ سەرۆكا یەتیێ ل سەر ملێ خۆ راگرت. و ناڤێ وی دێ راوێژكەرێ سەیر بیت، خودێیەكیێ ب شیان بیت، بابەكێ هەتا هەتایی بیت، میرێ ئاشتیێ بیت.
خواندنا ئەڤرۆکە یا پەرتووکا پیرۆز: ئیشایا ٧-٩
ئەرێ دەمێ ئەم کورد بەحسێ ئاشتیێ دکەین چ رامان بۆ مە ددەت؟ ئەم دبێژین، ئاشتی چیە؟ ١٨٢،٠٠٠ ئەنفالکری، ٥،٠٠٠ کیمیابارانکری، ٥،٠٠٠ هەتا ١٠،٠٠٠ قوربانیێن شەرێ داعشێ، هەروەسا ئەم هەر بەحسێ برینداران ناکەین. هەمی ژیانا مە کوردان تژی جەنگ بووینە، ئەنفال و دەربەدەری و هێرشێن کیمیاوی و داعش؛ ئەم نزانین سەربورا ئاشتیێ د ناڤا ئەڤان هەمی دژایەتیان دا چیە. ئەم دپشتراست نینین کا ئاشتیا راستەقینە هەیە یان نە. ئەرێ ئاشتی و سەقامگیری دێ هێنە بدەستڤەئینان؟ بەرسڤ ژی بەلێ یە، بەلێ ئەو ب رێکا چ وەڵات یان پارتییێن سیاسی بدەستڤە ناهێن، بەلکو ب رێکا زارۆکەکێ ل بێت لەحم ژدایك بووی بدەستڤە دهێن.
ئیشایا ٩: ٦ سەدەها ساڵان بەری هاتنا عیسایێ مەسیح هاتبوو نڤێسین. ئەو ل دەمەکی هاتبوو نڤێسین دەمێ گەلێ ئیسرائیلێ د سەردەمەکێ تاری دا دژیان. گەلێ خودێ ژ جەنگ و داگیرکرنا ئەردێ وان ژ لایێ مللەتێن دیڤە دترسیان. د ئەڤێ ژیانا پری ترس و نەخوشی دا، خودێ سۆزەکێ ددەتێ: زارۆکەك دێ ژدایك بیت، پاشایەك یێ کو دێ ئاشتیا تەمام ئینیت. ئەو زارۆکە عیسایە، کورێ خودێ، یێ کو ئاشتیا تەمام دابین دکەت.
ئەڤجا ئەرێ ئەڤە چ ئاشتیە یاکو عیسایێ مەسیح ل گەل خۆ دئینیت؟ دەمێ ئیشایا دبێژیتە وی میرێ ئاشتیێ، ئەو پەیڤا سەلام (شالوم) بکار دئینیت، کو پەیڤەکا عیبریە رامانا وێ ژ نەئامادەبوونا جەنگی پترە؛ ئانکو ڤەگەراندنە و هەبوونا پەیوەندیەکا دروستە ل گەل خودێ.
باشە، د ئەڤی وەرزی دا کو وەرزێ ژدایکبوونا عیسایێ مەسیحە، پرسیار ئەڤەیە، ئەرێ هاتنا عیسایێ مەسیح ئاریشەیا ئاشتیا گەلێ کورد چارەسەر دکەت؟ ئەرێ عیسایێ مەسیح دشێت ئاشتیا هەروهەر بدەتە مە؟ ئیشایا ٩: ٦ دبێژیتە مە کو عیسایێ مەسیح میرێ ئاشتیێیە. عیسایێ مەسیح هاتە د ناڤا جیهانەکا پڕی گرفتاری و نەخوشی و تەنگاڤ دا؛ عیسایێ مەسیح هات داکو یێ دلشکەستی و ئازارکێش و تەنگاڤ ساخ بکەت. عیسایێ مەسیح هات داکو ئاشتیەکێ بدەتە مە یاکو ئەڤ جیهانە چجاران نەشێت دابین بکەت. ئەگەر ژیانا تە یا پڕ بیت ژ نەخوشی و دەربەدەری و نەرازیبوون و جەنگ و قەیرانێن ئابووری بیت، بزانە کو عیسایێ مەسیح، وەکو میرێ ئاشتیێ، هاتیە داکو ئاشتیا هەروهەر بۆ مە دابین بکەت. چەوا؟
ب رێکا قوربانیدانا وی! پێدڤیە ئەم کورد بزانین کو ئاریشەیا مەیا سەرەکی هەبوونا جەنگی و وێرانکرن نینە، بەلکو ئاریشەیا مەیا سەرەکی ئەوە کو ژبەر گونەهێن مە، مە خودێ کریە دوژمنێ خۆ، و پەیوەندیا مە ل گەل خودێ هاتیە شکاندن و ئەم یێن ژ وی دویر کەفتین. ئەم چجاران ب رێکا کارێن خۆ یێن چاك نەشێن ل گەل وی ئاشت ببینەڤە. لەوما، پێدڤیە ئەم بزانین کو مەزنترین و رژدترین ئاریشەیا مە نەبوونا ئاشتیا ل گەل خودێیە، نە ل گەل خەلکێ. بەلێ خودێ، ب حەزژێکرنا خۆ، کورێ خۆ یێ پیرۆز بۆ مە هنارت، عیسایێ مەسیح، یێ کو ژیانەکا تەمام و بێگونەهـ ژیای و ژ بۆ گونەهێن مە ل سەر خاچێ مری، ئەو ئازارا ئەم ژ هەژی کێشا! بەلێ بلا ل بیرا مە بیت کو ل رۆژا سێ یێ ژ مرنێ رابوو و سەرکەفتن ل سەر مرنێ ئینا. ب رێکا ئەڤێ قوربانیدانا عیسایێ مەسیح، ئاشتیا تەمام و راستەقینە بۆ هەرکەسەکێ باوەری ب وی هەی دهێتە دابینکرن. هوسا تۆ دێ ل گەل خودێ ئاشت بیەڤە و ژیانا هەروهەر وەرگری.
ئەڤرۆکە، وەکو تۆ ئیشایا ٩: ٦ دخوینی، سوپاسیا خودێ بکە کو رەوشێن زەحمەت یا ژیانێ و کارەساتێن ب سەرێ گەلێ مە هاتین نەبووینە ئەگەر تۆ ئاریشەیا خۆ یا هەرە مەزن ژبیر بکەی، یا کو دوژمناتیا ل گەل خودێ یە. سوپاسیا خودێ بکە کو عیسایێ مەسیح شیایە پتر ژ وێ یا تۆ پێدڤی ئاشتیێ بدەتە تە.
پرسیار ژ بۆ رەنگڤەدان و رامانێ.
نوکە کو تۆ عیسایێ مەسیح دنیاسی ئەو میرێ ئاشتیێ یە و ئاشتیا تەمام دابین کریە، ئەرێ یا پێدڤیە تۆ چەوا بەرسڤێ بدەی دەمێ د ژیانا خۆ دا روی ب روی بوویەرەکا نەخوش دبی؟
نڤێژ
ئەی بابێ مە یێ ل ئەسمانان، ئەم سوپاسی و پەسنا تە دکەین، ئەم سوپاسیا تە دکەین کو ب رێکا عیسایێ مەسیح مە ژیانا هەروهەر وەرگرتیە. ئەم سوپاسیا تە دکەین کو ژدایکبوونا عیسایێ مەسیح ئاشتیا تەمام بۆ مە ئینایە. ئەم سوپاسیا تە دکەین کو کەرەما تە ب رێکا قوربانیدانا عیسایێ مەسیح ب سەر مە دا هاتیە. ئەو بابێ ژیانێ، ئەم نڤێژێ دکەین کو رۆژەك بهێت دەمێ گەلێ کورد هەمی تە بنیاسن و وێ ئاشتیا کو بتنێ ب رێکا عیسایێ مەسیح دهێتە دابینکرن، وەربگرن. ب ناڤێ عیسایێ مەسیح قورتالکەرێ مە، میرێ ئاشتیێ، ئامین.
