رۆژا چواردێ
خودێ ل گەل مەیە
مەتتا ١: ٢٣
ئەڤە دێ کچا پاکیزە ب دووگیان کەڤیت و دێ کورەك بیت، و دێ بێژنێ عەمانوئێل، و رامانا ڤی ناڤی ژی “خودێ ل گەل مەیە.” رامان: خودێ ل گەل مەیە.
خواندنا ئەڤرۆکە یا پەرتووکا پیرۆز: مەتتا ١: ١٨-٢٥
“خودێ ل گەل مەیە”! ئەرێ حەفتیێ چەند جاران تۆ گوهـ ل ئەڤێ چەندێ دبی یان دبێژی دەمێ ژ جهەکی دچی یان پەیواندیەکێ ب تەلەفونێ ب دوماهی دئینیت؟ رستەیەکا گەلەك بەربەڵاڤە، ئەم گەلەك بکار دئینین، کو ئەم گەلەك ب ساناهی رامان کویر یا ئەڤێ رستەیێ ژبیر دکەین. دا پرسیار بکەین کا رامانا “خودێ ل گەل مە” چیە؟ ئەرێ ئەم چەوا پشتراست ببین ئەو ل گەل مەیە؟ ئەرێ پەرتووکا پیرۆز دەربارەی ئەڤێ چەندێ چ دبێژیت؟ دا تەماشەی دانوستاندنا د ناڤبەرا یوسڤی و فریشتەیێ خودانی دا بکەین داکو تێگەهشتنەکا باشتر بدەستڤە بینین.
پشتی ٤٠٠ ساڵین بێدەنگیێ د ناڤبەرا پێغەمبەرێن پەیمانا کەڤن و دەستپێکا پەیمانا نوی، مزگینیا مەتتای ب راگەهاندنێن سەیر دەستپێ دکەت کو عەمانوئێل، “ئانکو خودێ ل گەل مەیە،” دێ ژدایك بیت. دویر ژ ئاشکراکرنا خودێ بۆ زەکەریای دەربارەی یوحەننای، خودێ ژ نیشکەکێڤە ل گەل دوو گەنجان ئاخفت، یوسڤ و مەریەم، دەربارەی ژدایکبوونا عیسای. مەسیح، یێ کو پێشبینیا هاتنا وی د پەیمانا کەڤن دا هاتبوو کرن، چنە مابوو بگەهیت.
مەریەم یا خواستی بوو بۆ یوسڤی و چاڤەرێبوون هەڤژینیێ پێك بینن. د ئەڤی دەمی دا، ئاشکەرا بوو کو مەریەم یا ب دووگیان بوو. بەلێ چەوا ئەڤ چەندە چێدبیت؟ دبیت یوسڤی هوسا هزر کربیت کو مەریەم ل گەل وی یا دلسۆز نەبوو. بەلێ خودێ گۆتە یوسڤی کو هوسا نینە، بەلکو ل شوینێ، ل گۆری پلانا خودێ و جێبەجێکرنا پێغەمبەرایەتیا خۆ ژ ئیشایای ٧٠٠ ساڵان بەری نوکە، مەعجزیەک یا چێبووی. مەریەما پاکیزە یا ب دووگیان بوو، و ئەو زارۆکێ وێ ئینای عەمانوئێل بوو، ئانکو “خودێ ل گەل مەیە” (ئیشایا ٧: ١٤).
پڕانیا جاران ناڤان رامان یێن هەین، هەروەسا د پەرتووکا پیرۆز دا، ئەو ناڤێن ژ لایێ خودێ ڤە هاتینە دان گرنگیەکا تایبەت هەنە. فریشتەی دوو ناڤ ئینان: عیسا و عەمانوئێل. ئەرێ پەیوەندیا د ناڤبەرا ئەڤان هەردوو ناڤان دا چیە؟ ناڤێ عیسا ژ زمانێ عیبرانی دهێت ب رامانا “خودێ قورتال دکەت” یان ژی “خودێ قورتالکەرە.” ل گەل ئەڤی ناڤی “خودێ ل گەل مەیە،” ئەم دزانین کا زارۆك کیە و رولێ وی چیە و چ دکەت.
عیسا، یێ کو کورێ هەروهەرێ خودێ، بۆ مروڤ و د ناڤ مە دا ئاکنجی بوو – خودێ ل گەل مە! بتنێ خودێ ب تەمامی یێ بێگونەهە داکو ببیتە قوربانیا تەمام ل جهێ گونەهێن یێن دی. خودێ مە قورتال دکەت! گونەهکارەك نەشێت كەفارەتێ بۆ گونەهێن یێن دی بکەت. عیسا، وەکو مروڤەك، دشێت ئازارێ بکێشیت و بمریت. ئەو ناڤبەینکارەکێ تەمام و بێ کێماسیە د ناڤبەرا خودێ و مروڤان دا (١ تیمۆتاوس ٢: ٥). گەلەك ئایینێن دی دەربارەی کا پێدڤیە مروڤ چ بکەن داکو پتر نێزیکی خودێ ببن بەحس دکەن؛ بتنێ ئنجیل دەربارەی کا خودایێ راستیەقینە چەوا هاتە نك مە داکو مروڤان ژ هەر مللەتەکی بۆ مەزناهیا خۆ قورتال بکەت، بەحس دکەت (ئاشکراکرن ٥: ٩). چەند یا سەیرە!
بەلێ یا پێدڤیە ئەم د ئاشکرا بین دەربارەی ئێکانەییا عیسای. ب تایبەتی، رامانا وێ ئەو نینە کو عیسا نیڤ خودێ و نیڤ مروڤ بوو. رامانا وێ ئەو نینە کو ئەو بتنێ وەکی مروڤەکی دیاربوو، بەلێ ژ سروشتێ مروڤی نەبوو. گەلەك دبێژن کو عیسا بتنێ پێغەمبەرەك بوو یان ژی ماموستایەکێ باش بوو. نەخێر، عیسا ب تەمامی خودێ یە و ب تەمامی مروڤە. یا پێدڤی بوو ئەو یێ وەسا بیت.
هەتا پشتی مرن و رابوون و بلندکرنا وی ژی، ئەو چجاران ژ “عەمانوئێل”بوونێ نەراوەستیا. پشتی بلندکرنا عیسای بۆ نك بابی ل ئەسمانی، عیسای گیانێ خۆ ب سەر گەلێ خۆ دا هنارت، ئەو ژی کەنیسەیە. ئەرێ نوکە رامانا ئەڤێ چەندێ بۆ مە چیە؟ ب رێکا هەبوونا عیسای ل گەل مە هێز و ئازادیێ دگەهتە مە داکو خزمەتا مەزناهیا ناڤێ وی بکەین. ئەنجامێ ئامادەبوونا عیسای ل گەل مە ئەڤەیە کو ئەم یێن ژ ترسێ ئازاد بووین. گەلەك جاران دەمێ پەیڤا خودێ دبێژیت کو خودێ ل گەل گەلێ خۆیە، پەیام ئەڤەیە: “نە ترسن.” داوود پاشای گۆتە خودێ، “ئەز ژ خرابیێ ناترسم، چنکو تۆ یێ ل گەل من” (زەبوور ٢٣: ٤).
ئەرێ ئەم ژ چ دترسین؟ نەشیانا کونترولکرنا رەوشیێن خۆ؟ بریاردانەکا خەلەت؟ بدەستڤە نەئینانا یاکو مە دڤێت؟ نەبوونا پارێ پێدڤی بۆ ژیانا خۆ یان خێزانا خۆ؟ ژدەستدانا هەڤال یان خێزانا خۆ ژبەر باوەریا مە ب مەسیحی؟
پێدڤیە تشتێ ژ هەمیان پتر ژێ بترسین توڕەبوونا خودێ بیت، یاکو ب رێکا عیسای ل سەر مە رابووی. لەوما ئەم دشێین ژ حەزژێکرنا خودێ بۆ مە دپشتراست بین. ئەم هەتاهەتا ل گەل وی دژین. عیسای دڤێت هەردەم ل گەل وی بین.
هەروەکو مزگینیا مەتتای ب ئەڤێ راگەهاندنا مەزن دەستپێ دکەت کو عیسا دهێت و خودێ ل گەل مەیە، ب هەمان رێك، ل دویماهیکێ، مەتتا گۆتارەکا عیسای ب هەمان شێواز بۆ شاگردێن خۆ ڤەدگێریت. عیسا ئەرکەکی ددەتە وان. ئەرکەکێ مەزن و ب زەحمەت داکو ژ هەمی مللەتان شاگردان دروست بکەن. بەلێ عیسا ئەوان ژ دەستهەڵات و ئامادەبوونا خۆ ل گەل وان پشتراست دکەت. “پشتراست بن، ئەز هەردەم یێ ل گەل هەوە، هەتا دویماهیکا زەمانی.”
خواندەڤانێ خۆشتڤی، ئەگەر تە تەوبە ژ گونەهێن خۆ کربیت و باوەری ب مەسیحی هەیە وەکو خودان و قورتالکەرێ خۆ، بلا دلێ تە یێ ئارام بیت و بزانە کو ئەو نوکە و هەتاهەتا یێ ل گەل تە. بلا نوکە پێگڤە نڤێژێ بکەین.
پرسیار ژ بۆ رەنگڤەدان و رامانێ.
ئەرێ پەیوەندی د ناڤبەرا ناڤێن “عیسا” و “عەمانوئێل” دا چیە؟ ئەرێ چەوا رامانا ئەڤان هەردوو ناڤان کاریگەریێ ل ژیانا تە دکەت؟
نڤێژ
بابێ خۆشتڤی، ئەم سوپاسیا تە دکەین ژ بۆ هنارتنا عیسای و ئامادەبوونا تە ل گەل مە. چنکو عیسای مەزنترین دیوار د ناڤبەرا مە و تە دا نەهێلا، ئەم دشێین پێگڤە خۆشیێ ژ ژیانێ ببەین و د نڤێژێ دا نێزیکی ئێك ببین. ئەم دشێین باوەریێ بینین کو تۆ یێ ل گەل مە، نوکە و ل پاشەرۆژێ ژی. هاریکاریا مە بکە د ئامادەبوونا تە دا دلخۆش ببین، وەکو داوود دبێژیت، “تۆ وە دكەی كو رێكا ژیانێ بۆ من یا ئاشكرا بیت، تێربوون ژ شادیێ د دیدارا تە دایە، خۆشی ھەروھەر ژ دەستێ تەنە. زەبوور ١٦:١١” رۆژ ب رۆژ، بیرا مە ل سۆزا عیسای بینە، “«ئەز چ جاران دەستان ژ تە بەرنادەم،ئەز چ جاران تە ناھێلم.».” ئەم سوپاسدارین کو ئەم چجاران بتنێ نینین. ئەی خودێ، ئەم حەز ژ تە دکەین و پەسنا تە دکەین. ب ناڤێ عیسایێ مەسیح، ئامین.
