رۆژا هەشتێ
دیتنا کەرەم و راستیێ
یوحەننا ١: ١٤
پەیڤ ژی بوو لەش و د ناڤ مە دا ئاكنجی بوو. ئەو یێ پڕی كەرەم و راستی بوو. مە مەزناهیا وی دیت، مەزناهیا كوڕێ ئێكانەیێ بابی.
خواندنا ئەڤرۆکە یا پەرتووکا پیرۆز: یوحەننا ١: ١-١٨
وەکو باوەردارەکێ کورد، من ئەڤ پرسیارە هەبوو؛ ئەرێ راستی ل کیڤەیە؟ ئەرێ راستی ل کیڤەیە؟ ئەرێ کێ راستی هەیە؟ چەوا دشێم راستیێ ببینم؟ ئەرێ ل کیرێ دشێم راستیێ ببینم؟ ئەڤ پرسیارە بەردەوام د دل و مێشکێ من دا دەنگڤە ددان. دبیت ئەڤە پرسیارێن تەژی بن، و پرسیار دکەی ئەرێ راستی ل کیڤەیە؟ ل کیرێ یە و ل گەل کیە؟
ئەڤ ئایەتا ژ یوحەننا ١: ١٤ بەرسڤا ئەڤان پرسیاران بۆ مە ددەت. ئەو دبێژیت عیسا هات و یێ پڕی كەرەم و راستی بوو. عیسا ژێدەرێ راستیێیە. عیسای راستیێن خودێ راگەهاندن، راستیا کو چەوا ل گونەهێن مە دهێنە بورین و چەوا دشێین ل گەل خودێ ئاشت ببین.(یان کو پێک بێن) ئەڤ ئایەتە مەسیحی وەکو پەیەڤا خودێ وەسف دکەت. پەیڤ ژبۆ راگهاندن یان ئاشکەرەکرنا پەیامەکێ دهێنە بکار ئینان. خودێ ب رێکا کورێ خۆ بۆ مە خۆ ئاشکرا کر. خودێ بوو مروڤ. عیسا هات دا سروشت و نیەتا بابێ خۆ (خودێ) ئاشکرا بکەت. خودێ ب رێکا پێغەمبەران ل گەل گەلێ خۆ ئاخفت داکو بێژیتە وان کا چەوا دیف وی بچن. بەلێ ئەوان پێغەمبەر رەت کرن. ل دویماهیکێ، خودێ کورێ خۆ هنارتی، نەکو دا جیهانێ شەرمزار بکەت، بەلکو دا جیهانێ قورتال بکەت.
بەری ئەز ببمە باوەردار، من هەمی ناکوکی و کەرب و دوژمناتی و سەختەکاریا مروڤایەتێ دیت. من گونەهـ د ناخێ خۆ دا ژی دیت. ئەز یێ بێهیڤی بووم. ئەز یێ شاش بووم. من پرسیارکر ئەرێ چ مەبەستە من د ئەڤێ ژیانێ دا هەبوو. من پرسیار کر خودێ یێ بدروستاهی کیە ؟
پاشی من مزگینی خواند و دیت کو مەسیح یێ راستی و کەرەما تەمامە. ئەو وەکو پاشایەك نەهاتە ئەڤێ جیهانێ داکو ژ لایێ خەلکیڤە خزمەتا وی بهێتە کرن، بەلکو ل شوینێ ئەو بێ حەشخۆکرن هات و ژیانا خۆ کرە قوربان داکو گونەهکارێن وەکو من یێن نە ژهەژی قورتالکرنێ، قورتال كەت. دەمێ من ئەڤ حەزژێکرنا مەزنا مەسیحی بۆ خۆ دیتی، ژیانا من هاتە گهورین. حەزژێکرن و کەرەما مەسیحی یاکو من د مزگینیێ دا دییتن گەلەك بۆ من ببها بوون. خودێ راستداریا خۆ دەتە مە د دەمەکی دا کو ئەز نەیێ راستدارم. ئەرێ ل سەر چ بنەمایێ ئەو دەتە من؟ ل سەر بنەمایێ ژیان و مرن و رابوونا مەسیحی.
ئەڤێ کریسمسێ، ل بیرا تە بیت کو کەرەم و راستی ب بەرفرەهیڤە ژ لایێ عیسای بۆ تە هاتینە پێشکێشکرن. کانیە کەرەما وی چجاران ناقەتیت. راستیا د ناڤا پەیڤێن وی دا چجاران بەرزە نابیت. عیسا بەری ٢٠٠٠ ساڵان هات، بەلێ ئەو هەتا نوکە ژی یێ زیندیە. ئەوی گیانێ خۆ دایە مە. ئەوی پەیڤا خۆ د پەرتووکا پیرۆز دا دایە مە. ئەو هێشتا یێ ساخە و کەرەم و راستیێ ددەتە هەرکەسەکێ دهێتە دەڤ وی.
ئەرێ تە دڤێت راستیێ ببینی؟ وەرە دەڤ مەسیحی. ئەرێ تە هێز و ئاقلمەندی دڤێت داکو بۆ خودێ د دەمێن بزەحمەت و نەخۆش دا بژی؟ گوهێ خۆ بدە مەسیحی. ئەو یێ پڕی کەرەم و راستیە. ئەرێ تۆ چ هەولا ددەی کو ئارمانجەکێ د ژیانا خۆ دا ببینی؟ وەرە دەڤ مەسیحی، ل گەل وی و تۆ دێ مەزنترین هیڤی و ئارمانج بینی، ئەڤەیە کو مەزنکرنا خودێ یە و دیتنا خۆشیا راستەقینەیە ب رێکا وی. ئەرێ تۆ پێدڤی ساخکرنا ژ گونەهێن خۆی یان ژی ساخبوونا ژ وان برین و ئازارێن دلێ خۆی؟ مەسیح، ب دلوڤانیا خۆ، دێ تە ئارام کەت و چاڤدێریا تە کەت.
بەری ئەز ببمە باوەردار، من چ بنیاتێن راستەقینە نەبوون کو ژیانا خۆ ل سەر ئاڤا بکەم. بەلێ پشتی ئەز ژ لایێ عیسایێ مەسیحڤە هاتیمە قورتالکرن، ئەز بەرامبەر هرۆبایێن ژیانێ قایم بووم، چنکو نوکە ژیانا من ل سەر بنیاتێ مزگینیا مەسیحی هاتیە ئاڤاکرن. ژبەر ئەوێ حەزژێکرنا خودێ دایە من، نوکە من شیان یا هەی حەز ژ دوژمنێن خۆ بکەم و ل گەل وان یێ دلوڤان بم. ب رێکا مەسیحی، من حەزژێکرن و ئاشتیا خودێ وەرگرت. ئەز سوپاسیا خودێ دکەم کو ئەز قورتال کریم ژبەر حەزژێکرنا وی یا بێسنور بۆ من. د ئەڤی وەرزێ کرسیمسێ دا، ل بیرا تە بیت کو ب رێکا مەسیحی مە کەرەم و ئاشتیا خودێ وەرگرتیە.
پرسیار ژ بۆ رەنگڤەدان و رامانێ.
چەوا تە ئاشتی و کەرەما خودێ ب رێکا مەسیحی د ژیانا خۆ دا وەرگرت؟
نڤێژ
بابێ مەیێ ل ئەسمانان، بلا ناڤێ تە ل ئەردێ و ئەسمانی بەرز و پیرۆز بیت. سوپاس ژ بۆ پەیڤێن تە، سوپاس ژ بۆ پەیاما کو تە ب رێکا مەسیحی گەهاندیە مە، پەیامەکا کو ژیانەکا نوی د دتە مە. پەیاما تە حەزژێکرنە، و حەزژێکرن ئاشتی و هەدارە. لەوما ئەم داخوازا حەزژێکرن و ئاشتی و هەدارێ بۆ هەمی خویشك و برایێن خۆ ل کوردستانێ دکەین. ئەم داخوازێ ژ تە دکەین تۆ دلێن دوژمنێن مە ژ گونەهێ پاقژ بکەی، چنکو کورێ تە یێ خۆشتڤی هات داکو هێزا ئیبلیسی ل سەر مە نەهێلیت. ب ناڤێ عیسایێ مەسیح، ئامین.
