رۆژا دوویێ
هیڤیەکا ژ مە مەزنتر

دەستپێکرن ٢٢: ١٧-١٨

١٧ بێگومان ئەز دێ تە بەرەكەتدار كەم و دێ دویندەها تە تەمەت ستێرێن ئەسمانان و تەمەت خیزێ ل سەر كنارێن دەریایی گەلەك زێدە كەم. دویندەها تە دێ دەستێ خۆ دانیتە سەر باژێڕێن دوژمنێن خۆ ١٨ب دویندەها تە، هەمی مللەتێن ئەردی دێ هێنە بەرەكەتداركرن، چنكو تە ب گۆتنا من كر.

خواندنا ئەڤرۆکە یا پەرتووکا پیرۆز: دەستپێکرن ٢٢

د ژیانێ دا، گەلەك تشت یێن هەین ئەز هیڤیا بۆ دخوازم. ئەز هیڤیدکەم کو پتر دەرفەتێن کاری ل باژێرێ من هەبن داکو هەڤالێن من بشێن بساناهیتر بژین. ئەز هیڤیدکەم ئەڤ ساڵە گەلەك پتر باران بهێن داکو مێرگ و چیمەن دپڕ بن و کێماهیا ئاڤێ نەبیتن. جارەکێ، من ریکلامەك ژ بۆ ڤەکرنا خوارنگەهەکێ ل باژێرێ خۆ دیت، نڤێسی بوو “نێزیک دێ ڤەبیت.” شەش ساڵ دەرباز بوون و هێشتا ڤەنەبوویە. دا پرسیارێ ژ خۆ بکەین کا هەمی مرادێن مە بجهـ هاتینە، ئەرێ ئەم دێ درازی و ئارام بین؟ 

بەشێ ئەڤرۆکە گەلەك یێ گرنگە چنکو ئەڤ پەیمانا خودێ بنیاتێ دیروك و ئایینێ خەلکێ جوهییانە. هەرچەوا بیت، هندەك جاران ئەم ژبیر دکەین کا ئەڤ سۆزە د چ چارچوڤەکی دایە. ئەگەر ئەم چیرۆکا ئیبراهیمی هەمی بینە بیرا خۆ، ئەم د زانین خودێ سەر گونەهێن ئیبراهیمی را ئەڤ سوزە بۆ ئیبراهیم دوبارە کربوو بەری تاقیکرنا ئیبراهیمی د بەشێ دەستپێکرن ٢٢ دا و خودێ دلسوزیا خۆ بۆ بجهینانا سوزێ دیار کر دەمێ وی ئیسحاق دایە ئیبراهیمی هەر د پیراتیا ساراێ دا. ئەڤجا دەمێ خودێ ئیبراهیمی تاقیکر و گوتێ کۆرێ خۆ بکێیە قوربان، ئیبراهیم باوەر ب سۆزێن خودێ ئینا و گوتە کۆرێ خۆ: كوڕێ من، خودێ ب خۆ دێ بەرخی بۆ قوربانیێ دابین كەت. و خودێ وە کر، نە هێلا بوو ئیبراهیم کۆرێ خۆ بکەتە قوربان. ئیبراهیمی ناڤێ جهی کرە (یەهوە دابین دکەت). یەهوە سۆز دابوو کو ئیسحاق دێ بیتە میراتگیرێ سۆزێ. ئیبراهیمی باوەر ب سۆزێ کر، و خودێ قوربانەکا دی شینا ئیسحاقی دابینکر. خودێ دیار کر کو ئەو دێ هەردەم سۆزێن خۆ بجهـ ئینیت. ئەڤ چەندە ژی مە فێر دکەت کو پێدڤیە مە ژی، وەکو ئیبراهیمی، هیڤیەکا مەزن ب خودێ هەبیت. مەزناهیا ئەڤێ هیڤیێیا ئیبراهیمی و مە دکەڤیتە د ئەوێ راستیێ دا کو ژێدەرێ وێ ژ خودێ یە، نە ژ مەیە. نوکە ژی دا پێگڤە تەماشە بکەن و تێبگەهین کا بوچی ئەڤ پەیمانە بۆ مە ژی یە. ئانکو، چەوا ژدایکبوونا مەسیحی ئەڤێ پەیمانێ زیندی و تەمام دکەت.

ئێکەمین خالا پەیاما خودێ بۆ ئیبراهیمی ئەڤە بوو (ئەز دێ بێگومان تە بەرەکەتدار کەم). دەمێ ئەم سەحدکەینە چیرۆکا ئیبراهیمی، ئەم دزانین کو ئەڤە نە ئێکەمین جارە خودێ ئەڤێ سۆزێ ددەتە ئیبراهیمی. هەروەسا، ل هەر جهەکێ، سوزێن خودێ ب تایبەتی ئاراستەی ئیبراهیمی و سارایێ بوون کو خێزانەك هەبن و دویندەها وان مەزن بیت، ئەڤ چەندە ژی بۆ ئەوان تشتەکێ بچویك نەبوو.  ئەوان گەلەك دڤیا کو زارۆکەك هەبیت، بەلێ سارا یا خرش بوو. ژبلی وێ سۆزا کو دێ ئەوان زارۆکەك هەبیت، سۆزەکا دی ژی ب ئیبراهیمی هاتبوو دان، بۆ نموونە هەبوونا پەیوەندیەکا تایبەت ل گەل خودێ و وەرگرتنا ناڤەکێ مەزن و پێدانا ئەردەکی بۆ وی و دویندەها وی، و خودێ ژی ژ بۆ وی ببیتە مەرتالەك (دەستپیکرن ١٢-١٨). د بەشێ ٢٢ی دا، خودێ دووبارە دکەت کو ئەو یێ ژ هەژیە و بەردەوام سۆزێن خۆ بجهـ دئینیت. ئیبراهیمی هیڤی و باوەریەکا مەزن ب سۆزێن خودێ هەبوو، هەتا ئەگەر ئەوی نەشیابا وێنە بکەت کا خودێ چەوا ئەوان سۆزان بجهـ دئینیت.

هەرچەوا بیت، پارچەیا دوویێ ژ سۆزا خودێ بۆ ئیبراهیمی ئاراستەی دویندەها وی هاتبوو کرن، نە ئیبراهیمی ب خۆ. خودێ رادگەهینیت: ” مسۆگەر ئەز دێ تە بەرەكەتدار كەم و دێ دویندەها تە تەمەت ستێرێن ئەسمانان و تەمەت خیزێ ل سەر كنارێ دەریایی گەلەك زێدە كەم. دویندەها تە دێ دەستێ خۆ دانیتە سەر باژێڕێن دوژمنێن خۆ.” ئیبراهیمی هیڤیەکا مەزن هەبوو کو زارۆکێن وی دێ ب میرات ئەو سۆزێن خودێ داینە وی وەرگرن. ئەو دێ گەشە کەن و هژمارەیا وان مەزن بیت و بهێز بن و هەتا دێ هێز ژی ل بەرامبەر دوژمنێن خۆ هەبیت. ئەڤە هەمی سۆزێن مەزن بوون بۆ کەسەکێ وەکو ئیبراهیمی، یێ کو بتنێ زارۆکەك هەی و هیچ پارچەیەکا ئەردی ژی نەبوو، بتنێ کوچبەرەك بوو. بەلێ ئیبراهمی هیڤیەکا مەزن ب خودێ هەبوو، هەروەسا ئەم ژی دشێین مە هیڤیەکا ب هەمان رەنگ ب سۆزێن خودێ هەبیت، هەتا ئەگەر ئەم هێشتا چاڤەرێی بجهـئینانا وان ژی بین.

خالا سێیێ یا پەیمانا خودێ ل گەل ئیبراهیمی د دەستپێکرن ٢٢ دا ئەڤە یە کو “ب رێکا دویندەها تە هەمی مللەتێن ل سەر ئەردی دێ هێنە بەرەکەتدارکرن.” ئەڤ پارچەیە گەلەك بۆ مە یا گونجایە چنکو بێی ئەڤ پارچەیا د ئایەتا ١٨ی دا، دبیت ئەم ژ ئەڤێ سۆزێ هاتباینە دویرکرن. ل ڤێرێ، خودێ رادگەهینیت کو بەرەکەتا ئیبراهیمی و دویندەها وی بتنێ بۆ وان نینە بەلکو ب رێکا دویندەها وی، بەرەکەت دێ ب هەمی جیهانێ هێتە دان. ئەڤ چەندە ژی ب تەمامی ب رێکا مەسیحی هاتە بجهـئینان.  ژدایکبوونا مەسیحێ مە یێ مەزن ژێدەرێ خۆشیێ و هیڤیا بێدویماهیکە، نەبتنێ چنکو ئەو یێ مەزنە، بەلکو چنکو ب هاتنا خۆ بۆ ئەردی، جیهان بوو خودان هیڤی. وەکو زەکەریای، بابێ یوحەننای، د لوقا ١: ٧٢-٧٣ دا دبێژیت، ب هاتنا مەسیحی هەمی سۆزێن خودێ بۆ ئیبراهیمی و دویندەها وی هاتنە بجهـئینان. ژ بەر وێ چەندێ نوکە من ژی هیڤی ب خودێ و سۆزێن وی هەبیت. نوکە ئەز ژی دشێم پارچەیەك بم د بەرەکەتا ئیبراهیم و دویندەها ئیبراهیمی دا. نوکە هەمی خەلکێ ل سەر ئەردی دشێن پەیوەندیەکا بهێز و بەرەکەتدار و ئومێدانە ل گەل خودێ ب رێکا عیسایێ مەسیح هەبیت. چنکو قورتالکەرێ مە یێ هاتی، یێ کو ناڤێ وی عیسایێ مەسیحە.

پرسیار ژ بۆ رەنگڤەدان و رامانێ.

ئایەتا ١٨ دبێژیتە مە کو “هەمی مللەتێن ل سەر ئەردی دێ بەرەکەتدار بن، چنکو تە گوهداریا فەرمانا من کر.”  ئەگەر گوهداریکرنا ئیبراهیمی هوسا بۆ خودێ یا گرنگ بیت، ئەرێ خودێ چ دبێژیتە من دەربارەی گوهداربوونا من؟ ئەرێ تشتەك د ژیانا من دا هەیە کو هەتا نوکە من گوهداریا فەرمانا خودێ نەکر بیت؟

نڤێژ

ئەی خودێ، ئەز سوپاسی و پەسنا هیڤیا ب رێکا مەسیحی دکەم. سوپاس بۆ هاتنا مەسیحی بۆ ئەردی داکو سۆزا تەیا مەزن بجهـئینیت یاکو ب رێکا دویندەها ئیبراهمی هەمی مللەت دێ هێنە بەرەکەتدارکرن. هاریکاریا من بکە داکو هیڤیا من هەردەم مەزنتر لێ بهێت، ب تایبەتی دەمێ ژیانا من یا بزەحمەت و بئازار بیت. هاریکاریا من بکە هەردەم نموونەیا هیڤی و دلسۆزیا ئیبراهیمی ل بیرا من بیت. بلا دلسۆزی و هیڤیا من ب تە ببیتە بەرەکەتەك بۆ یێن دی ژی. ب ناڤێ عیسایێ مەسیح، ئامین