رۆژا دوازدێ
هیڤی ژ بۆ قورتالکرن و هاریکاریێ
عیبرانی ٢: ١٤-١٨
١٤ ئەڤجا مادەم زاڕۆك خوین و گۆشتن، عیسا ژی ب هەمان تشتان ل گەل وان بوو پشكدار، داكو ب مرنا خۆ وی یێ هێزا مرنێ د دەستی دا، ئانكو ئبلیسی، ژ ناڤ ببەت، ١٥ و ئەوان ئازاد بكەت، یێن د هەمی ژیانا خۆ دا، ژ ترسا مرنێ، ل بن زۆرداریا بەنیاتیێ بوون. ١٦ بێگۆمان ئەو نەهاتیە دا هاریكاریا فریشتەیان بكەت، لێ دا هاریكاریا دویندەها ئیبراهیمی بكەت. ١٧ لەوما پێدڤی بوو ئەو د هەمی تشتان دا وەكو برایێن خۆ لێ بهێت، دا د خزمەتكرنا خودێ دا سەرۆككاهنەكێ دلۆڤان و دلسۆز بیت و هۆسا بشێت كەفارەتا گونەهێن گەلی بدەت. ١٨ ئەو دشێت هاریكاریا وان كەسان بكەت یێن دهێنە تاقیكرن، چنكو ئەوی ب خۆ، دەمێ هاتیە تاقیكرن، ئازار كێشان.
خواندنا ئەڤرۆکە یا پەرتووکا پیرۆز: عیبرانی ٥: ٢-١٨
د ئەڤی وەرزی دا، جادە و موڵ ب دار و روناهیێن کرێسمسێ دهێنە خەملاندن. پرانیا خەلکی هزر د سانتا کلوسی (بابانوئێلی) دا دکەن و خەلاتان بۆ زارۆکان دکرن. بەلێ ئەڤ وەرزە بیرئینانەکا تشتەکێ گەلەك کویرترە، بیرئینانا راستیا قورتالکرنا مە یە ژ هێزا مرنێ و گونەهێ. ئەڤ ئایەتە ل سەر ئەگەرێ هاتنا عیسایێ مەسیح دئاخڤن. ئەرێ بوچی کورێ خودێ خۆ دەروونبچویك کر و د سروشتێ مروڤی یێ مروڤان دا بەشدار بوو. داکو هاریکاریا مە بکەت. داکو بارێ گونەهێن مە و مرنێ رابگریت داکو ئێدی ژ مرنێ نەترسین. ئەڤ ئایەتە هیڤیێ بەرفرەهـ دکەن.
هیڤی بۆ من پەیڤەکا گەلەك تایبەتە. د ماوێ زانکویێ دا، ئەز گەلەك داخباری فەلسەفێ بووم و من خۆشی ژ خواندن و تێگەهشتنا نێرینێن فەیلەسوفان دبر. 1\دەمێ ئەز روی ب روی زانینگەها رەشبینیێ و هیچپەرێسیێ (Nihilism) یا نیچێ و شوبنهاور و کامو و یێن دی بوویم، من زانی کو د راستیێ دا ژیان پارچەیەکە ژ رەشبینیێ و چ هیڤی نینن. ب تایبەتی دەمێ من زانین دەربارەی ئەفسانەیا سسیفوس (The Myth of Sisyphus) وەرگرتی، یاکو ژ لایێ کامویڤە هاتیە نڤێسین، کو ب تەمامیڤە دەربارەی بێهیڤیبوون و بێرامانیا ژیانێیە یاکو مروڤ تێدا هاتینە ئاسێکرن.
کورتیا ئەڤێ ئەفسانەیێ ئەڤەیە کو سسیفوس یێ کو گونەهـان و تاوانان ئەنجام ددەت. پاشی خوداوەند ئەوی ب رێکا گرێلکرنا کەڤرەکی مەزن بۆ سەر گرەکی بلند سزا ددەن. بەلێ سسیفوس، یێ کو د ژیاناکە بازنەیی دا ئاسێ بووی، هەرۆژ ئەوی کەڤر دبر و گرێل دکر بەرف سەرێ وی گرێ بلند، و د نیڤا رێکێ دا، کەڤر ژ دەستێن وی دەردکەفت. دووبارە، دا سسیفوس ژ دەستپێکێ دەستپێ کەتەڤە، گرێل دکێ نێزیکی گوپیتکێ، و جارەکا دی ژ دەستێن وی دەردکەفتەڤە و دزڤری دەستپێکا چیای.
ئەڤە ژیانا سسیفوسی بوو، یێ کو چجاران نەشیای کەڤری ببەتە سەرێ گری و ئازاد ببیت. ئەڤجا سسیفوس نموونەیەکە ژ ژیانا مروڤان، ئانکو ژیانا هەرکەسەکی هوسایە و چ ئەنجام نینن، بازنەك د ناڤ خەفکەکێ دا. کو چ کەس نەشێن خۆ ژ مرنێ قورتال بکەن، ب هەمان شێوە ژی، چ کەس نەشێن ب تەمامی خۆ ژ گونەهێ پاقژ بکەن. لەوما کاموی دڤیا پەیامەکێ بگەهینیت کو ژیان یا بێرامان و رەشبینە. چیرۆك و ئەفسانەیا کاموی ب ئەڤێ رێکێ دەربارەی ژیانا مروڤان بدویماهیك هات، چ هیڤی نینن. بێگومان، ژیانا مروڤان ب ئەڤی رەنگییە و چ هیڤی نینن. من ژی یا هەست ب بێمفاتیا ژیانێ کری، بەلێ پشتی من باوەری ب مەسیحی ئینای، مەسیحی ئەز ژ ترسا مرنێ قورتال کرم و ژیانەکا نوی ب من بەخشی، ب رێکا هەلگرتنا بارێ من یێ گران ل سەر ملێن خۆ.
ئەم ژی وەکو سسیفوسی یێن ژ ئەڤێ ژیانا پری زەحمەتکێشێ ماندی بووین و ب روندك و شینیێ دژین. بەلێ مەسیح دبێژیت، “وەرنە نك من، هەی هەمی ماندیبووی و بارگرانان، ئەز دێ بێهنا هەوە ڤەدەم” (مەتتا ١١: ٢٨). ئەم هەمی پێدڤی هێزەکێینە دا مە ژ ئەڤی بارێ گران و ماندیبوونێ قورتال بکەت. ژدایکبوون و هاتنا مەسیحی ئەگەر بوو کو هەمی، یێن وەکو سسیفوسی ل هیڤیێ و قورتالبوونێ دگەریێن، دشێن بگەهنێ. هاتنا مەسیحی وەسا بوو هەچەکو دگۆتنا سسیفوسی، رابەڤە و وەرە نك من، داکو ئەز بشێم روندکێن تە پاقژ بکەم، بارێ تەیێ گران هەلبگرم، و ل شوینا تە، وی کەڤری رابکێشمە سەرێ چیای، چنکو بتنێ ئەز دشێم هیڤیێ ببەخشم و قورتالکرنێ وەکو سۆزپێدای دابین بکەم.
خواندەڤایێن خۆشتڤی، ئەم هەمی سسیفوسین. ئەم چجاران نەشێین هیڤی و قورتالکرن و ژیانا هەروهەر بۆ خۆ بدەستڤە بینین. هەروەکو کەڤر ژ هێزا سسیفوسی مەزنتر بوو، هەروەسا شیانێن مە ژی ژ هیڤی و قورتالبوون و سەرکەفتنا ل سەر گونەهێ و تاقیکرنێ دا کێمترن. بتنێ ئێك رێك یا هەی بۆ مە کو هیڤیا راستەقینە هەبیت، ئەو ژی مەسیحە. ئەرێ تۆ ئازارێ دکێشی؟ ئەرێ تۆ د تاقیکرنێ دای؟ ئەری تۆ یێ نەخۆشی؟ ئەڤجا مەسیح هیڤیا تەیە، ئەو سەروککاهن و قورتالکەرێ تەیە، ئەوی کەڤرێ تە ژ پێش تەڤە هەلگرتیە، و ئەوی هێز هەیە کو دشێت کەڤری ببەتە گوپیتکێ. ئەو ل سەر مرن و شەیتان و هەمی دوژمنێن تە بسەرکەفتیە.
پرسیار ژ بۆ رەنگڤەدان و رامانێ.
چەوا تۆ پشت ب مەسیحی دبەستی د هەلگرتنا بارێ تە یێ گران یێ ژ مەسیحی د دەمێ تاقیكرن و زەحمەتییان دا؟
نڤێژ
ئەی خودێ یێ راست، ئەی هیڤیا راست، ئەی یێ کو ژیانێ ب مرییان ددەی، ئەی ئاڤاکەرێ خرابوویان، ئەی مەسیحێ خودێ و قورتالکەر، سوپاسیا تە دکەم ژبەر خەمخۆرییا تە بۆ هەمی سسیفوسیان، سوپاسیا تە دکەم ژبەر هیڤیا تە بۆ مرن و ژیانا مە. ئەی خودان، ئەم داخوازا گیانێ تە دکەین، بلا ئەم ئاشتیێ ل بن سیبەرا چەنگێن تە ببینین. ئەی بابێ ل ئەسمانان، ب ناڤێ مەسیحی، کورێ تە یێ تاقیکری، ئامین.
