١ یوحەننا ٤: ١٩

ئەم حەزژێكرنێ دكەین، چنكو ل بەراهیێ وی حەز ژ مە كر.

خواندنا ئەڤرۆکە یا پەرتووکا پیرۆز: ١ یوحەننا ٤: ٧-٢١

 ئایەتا سەرەکی ل بیرا من دئینیت کو نە ئەم بووین مە دەستپێکێ حەز ژ خودێ کری، بەلکو ئەوی بەراهیێ حەز ژ مە کر، ل دەمەکێ دا کو ئەم نە دنیاس و دگونەهکار بوون و دژی وی بووین. لەوما حەزژێکرن و قوربانیا وی نە ئەنجامێ حەزژێکرنا مە بۆ وی بوون. گۆتنە کوردی یا هەی دبێژیت، “ئەز دبێژمە تە مام/خال چنکو ئەز پێدڤی هاریکاریا تە مە.” بەلێ حەزژێکرنا خودێ بەروڤاژی ئەڤێ گۆتنێ یە، یا بێ مەرجە. هەرچەوا بیت، حەزژێکرنا مە بۆ خودێ و یێن دی رەنگڤەدانا حەزژێکرنا وی بۆ مەیە.

دەمێ ئەم ئەوێ حەزژێکرنا مەزن دبینین کو هەمی سنوران دەرباز دکەت و هەمی یاسایێن جیهانێ وەردگێرینیت، ئەم ژێ فێردبین کا حەزژێکرنا راستەقینە چیە. د جیهانێ دا، حەزژێکرن مەرجی یە و لسەر بەرژەوەندیێ یە، ئانکو دڤێت بۆ من باش بیت، پاشی ئەز دشێم حەز ژ تە بکەم. بەلێ حەزژێکرنا خودێ یا جیاوازە، وەکو حەزژێکرنا دەیکوبابانە بۆ زارۆکێ وان. دەیکوباب زارۆکەکی خودان دکەن چنکو حەز ژێ دکەن. تێبینی بکە، دەیکوباب حەز ژ زارۆکی دکەن بەری ئەوان ببینن ژی، هەروەسا ئەو جلوبەرگ و لاندك و شیر و هەمی تشتان بۆ وان بەرهەڤ دکەن. خودێ ب ئەڤێ رێكێ حەز ژ مروڤایەتێ دکەت. ئەوی ئەرد و ئەسمان ژ بەر خاترا مروڤایەتێ ئافراندن. پاشی ئەوی مروڤ ل دویڤ وێنەیێ خۆ ئافراندن و دەستهەڵات دایێ.

زێدەبارەی حەزژێکرنا خودێ بۆ مە، مروڤان خۆ ژ خودێ دویر کر، بەلێ زێدەباری دویرکەفتنا مە، خودێ بەردەوام حەز ژ مە دکر و بۆ ناڤا ئەڤێ جیهانا ب رێکا ژدایكبوونا عیسایێ مەسیح هاتە خوارێ. مەسیح هات و ل سەر دەستێن ئەوی خەلکێ وی ئافراندی هاتە ئازاردان. مەسیح هات داکو سۆزا خودێ یا رزگارکرنا گونەهکاران بجهـبینیت و ئەوان پتر نێزیکی خۆ بکەت. مەسیح ل شوینا مە بوو قوربان داکو ئەو ژیانا هەروهەر پێشکێشی مە بکەت و ب رێکا کەرەما خۆ مە نێزیکی خۆ بکەتەڤە.

عەزیزێ من، ئەگەر تۆ تەوبێ ژ گونەهێن خۆ بکەی و باوەریێ ب عیسایێ مەسیح وەکو قورتالکەرێ خۆ بینی، بزانە کو تۆ هاتیە قورتالکرن و پەیوەندیا تە ل گەل خودێ ل سەر بنیاتێ حەزژێکرنا مەسیحی بۆ تە، نە حەزژێکرنا تە بۆ وی. پەرستن و خزمەتا خودێ رێکێن بدەستڤەئینانا حەزژێکرنا خودێ نینن. ب رێکا مەردینی و خواستەکا وی ب خۆ، ئەو حەز ژ مە دکەت. دبیت حەزژێکرنا مە بۆ خودێ کێم و زێدە ببیت، هندەك جاران بهێز، هندەك جاران ژی لاواز. بەلێ حەزژێکرنا خودێ بۆ مە چجاران کێم نابیت هەتە کو ئەم بکەڤنە گوناهێ ژی دا. بێگۆمان، گونەهێن مە گیانێ خودێ خەمگین دکەت. راستە کو خودێ مە راستڤە دکەت، بەلێ ئەڤ راستڤەکرنە ژ حەزژێکرنا وی یە، بەلێ ئارمانج ئەوە کو مە بزڤرینێ دەف خۆ، نەکو دا مە گونەهبار بکەت.

لەوما، ئەرێ پێدڤیە چەوا ئەم بەرسڤا ئەڤێ حەزژێکرنا خودێ بۆ مە بدەین؟ پێدڤیە ئەم حەز ژ ئێکودوو بکەین. مەسیح نابێژیت کو بتنێ حەز ژ وان بکەی یێن باشیێ دگەهیننە تە. نەخێر، پێدڤیە ئەم حەز ژ دوژمنێن خۆ ژی بکەین و دوعا بۆ وان بکەین زێدەباری خرابکاریێن وان، چنکو ب ئەڤێ رێکێ حەز ژ مە هاتیە کرن.

بەلێ ئەگەر تۆ وەکو من بی، تۆ هەست پێ بکەی کو حەزژێکرنا ئەوی کەسی مەحالە، هوسا بزانە کو خودێ ب خۆ ژێدەرێ حەزژێکرنێیە، نە ئەم. ب رێکا عیسایێ مەسیح ل گەل خودێ ببە ئێك. تۆ یێ بوویە کەسەکێ نوی. تۆ یێ هاتیە گوهارتن. دلێ تە یێ کەڤن ل گەل مەسیحی یێ هاتیە خاچدان. خودێ گیانێ خۆ یێ پیرۆز دایە تە، کو ئێك ژ فێقیێ حەزژێکرنە. لەوما د ئەڤی وەرزی دا، دەمێ ئەم ب رێکا هاتنا عیسایێ مەسیح بیرا خۆ ل حەزژێکرنا خودێ دئینین، ژبیر نەکە خودێ شیانان ددەتە تە داکو حەز ژ یێن دی بکەی، هەتا ئەگەر ئەو دوژمن ژی بن. ژبیر نەکە کو مەسیحی ل دەستپێکێ حەز ژ تە کر و حەزژێکرنا وی بۆ تە یا نەگهوڕە.

پرسیار ژ بۆ رەنگڤەدان و رامانێ.

ئەرێ چەوا خودێ حەزژێکرنا خۆ بۆ تە ئاشکرا کر؟ رەنگڤەدانێ ل حەزژێکرنا خودێ بۆ تە بکە و ژ دلێ خۆ پەسنا وی بکە.

نڤێژ

بابێ مە یێ ل ئەسمانان، ئەم سوپاسیا تە دکەین ژ بۆ کەرەم و قوربانی و حەزژێکرنا تە یا بێمەرج و بێدویماهیك. ئەم داخوازێ ژ تە دکەین مە فێر بکەی داکو حەزژێکرنێ بکەین، هاریکاریا مە بکە حەز ژ ئێکودوو بکەین، هەتا ئەوێن دوژمنێن مە ژی. ب ناڤێ عیسایێ مەسیح، ئامین.