رۆژا حەفتێ
هیڤیا پاشایێ پاشەرۆژێ
میخا ٥: ٢
بەلێ تۆ، بێت لەحما ئەفراتا، هەرچەندە تۆ یا بچویکی د ناڤا هوزێن یەهودایێ دا، دێ ژ ناڤ تە ئێك بۆ من هێت یێ کو دێ دەستهەڵاتێ ل سەر ئیسرائیلێ کەت، یێ کو هاتنا وی ژ کەڤنە، ژ دەمێن کەڤنار.
خواندنا ئەڤرۆکە یا پەرتووکا پیرۆز: میخا ٤: ٦ هەتا ٥: ٦
ل ١٥ی هەیڤا نەهـ ساڵا ٢٠١٤ێ، داعشێ هێرش کرە سەر کوبانێ، و د ماوێ ٢٠ رۆژان دا چوونە د ناڤا باژێری دا. د ماوێ هەیڤەکێ دا، ئەوان نیڤەکا باژێری داگیرکر. دۆرپێچیا خەلکێ مای دەستپێکر، بەلێ ل ٢٦ی هەیڤا ئێك ساڵا ٢٠١٥ێ، هێزێن کوردی دووبارە باژێر کونترول کرەڤە. بێگومان، ئازادکرنا کوبانێ پێنگاڤەکا سەرەکی بوو د تێکشکاندنا داعشێ دا. هەرچەوا بیت، د دەمێ ئازادکرنێ، پتریا هەڤوەڵاتیێن باژێری دەرکەفت بوون؛ گەلەك کێم مابوون، سەرەرای ترسا ئەخسیربوون و وەختێن سەختێ ژینا ل وێرێ. یا بزەحمەتە ئەم وێنە بکەین کا بۆ وان یێن ماین چەوا بوو. بیرا من دهێت هندەك جاران ئەوان هیڤی ژدەست ددا.
ب هەمان شێوە، ل ساڵا ٧٠٠ێ بەری زایینی، وەکو پێغەمبەر میخا وەسف دکەت، خەلکێ یەهودایێ د هەمان دەم دا ژیاینە، ل گەل لەشکەرێ ئاشوری ب دورپێچکرنا ئورشەلیمێ. دووبارە، یا بزەحمەتە بۆ مە خەیال بکەین دا چەوا بیت ئەگەر ئەم ل وێرێ باین و دا ژیان یا چەوا بیت.
د میخا ٥: ١ دا هاتیە نڤێسین: “ئەی باژێرێ ئارتێشان، ئارتێشا خۆ ئامادە بکە، چنکو ئەم هاتینە دورپێچکرن.” ئەو دەمەكێ پڕی ترس و شەرمزای بوو ژ بۆ گەلێ ئیسرائیلێ: “(لەشکەرێ ئاشوری ئورشەلیم دورپێچ کر) دارەك ل رویێ دەستهەڵاتدارێ ئیسرائیلێ دا.” وەکو نیشانەکا ترانەپێکرنا پاشایەکێ بێدەستهەڵات. ئەو دەمە بۆ خەلکی دەمەکێ بێهیڤیبوونێ بوو.
“بەلێ…” (٥: ٢) پەیڤێن میخای هیڤیێ ددەن. ئەو پێشبینیا رۆژەکێ دکەت دەمێ دەستهەڵاتدارەك، پاشایەك، دێ وەکو قورتالکەر بۆ گەلێ ئیسرائیلێ هێت. ئەو پاشایە دێ ژ خەلکێ بێت لەحمێ هێت، جهەکێ هند بچویكە کو پێدڤیە میخا روهن بکەت کا ل کیرێ یە، ل ئەفراتا. سەحکە کو خودێ ب رێکا پێغەمبەری دئاخڤیت، دبێژیت دێ دەستهەڵاتدار “بۆ من” هێت، ئانکو ئەو دێ هێت داکو روومەت و مەزناهیێ بۆ ناڤێ خودایێ هێزدار بینیت. ” یێ کو هاتنا وی ژ کەڤنە، ژ دەمێن کەڤنار.” – ئانکو ژ خودایێ هەروهەر. ئەو ژ دەڤ خودێ ژ بۆ خاترا خودێ دهێت.
ئەڤ پێغەمبەرایەتیە د میخا دا پێشبینیا ژدایکبوونا مەسیح پاشای ل بێت لەحمێ پشتی ٧٠٠ ساڵان دکەت، وەکو د مزگینی یا ل گۆر مەتتای دا هاتیە وەسفکرن، د بەشێ دوویێ دا. ئەو ژ بەر ئەڤێ پێغەمبەرایەتیێ بوو کو موغان ژ رێبەرێن ئایینی یێن جوهیان ناڤێ وی باژێرێ بچویكێ مەسیح لێ ژ دایك بووی زانی.
بەلێ میخا دەربارەی کا ئەڤ مەسیح پاشایە دێ یێ چەوا بیت بەحس دکەت. “ئەو دێ راوەستیت و ب هێزا یەهوەی، ب مەزناهیا ناڤێ یەهوە خودێ یێ خۆ شڤانیا پەزێ خۆ کەت.” (٥: ٤) ئانکو ئەو دێ گەلێ خۆ ل گۆر رێکێن خودێ برێڤە بەت، داکو ئەو بشێن “ب ئارامی بژین” ل ئەردی. (٥: ٤). ب رێکا دابینکرنا هەوجەیێن وان، ب رێکا دانا خوارنا گیانی یێ ئەو پێدڤی، کو پەیڤا زیندیا خودێ، ئەو شڤانیا وان دکەت. ب ئەڤێ رێکێ. “ئەو دێ بیتە ئاشتیا مە.” (٥:٥)
میخا ئاماژەیێ ب مەسیحی وەکو هیڤیا گەلێ وی ددەت، وەکو پاشایەکێ راستەقینە یێ کو گەلێ خۆ دپارێزیت و پێدڤیاتیێن وان دابین دکەت و چاڤدێریا وان دکەت وەکو شڤانەکێ دلوڤان. ئەڤرۆکە ژی هێشتا مەسیح ئاشتی و هیڤیا مەیە.
ب رێکەکێ، سۆز بجهـ هات کو عیسا ل بێت لەحمێ ژدایك بوو. خودێ یێ دلسۆزە. بەلێ ئەڤرۆکە، ئەم وەکو گەلێ خودێ ب ئومێدانە چاڤەرێی ڤەگەریانا وی یا تەمامین، دەمێ ئەو دێ سەردەمێ خۆ یێ تەمام دامەزرینیت. ئەم ب مەرەق ل گەل ئەڤێ هیڤیێ چاڤەرێی قورتالبوونا خۆ یا تەمامین، ئەم دێ هێینە قورتالکرن. ” لێ ئەو هیڤیا بەرچاڤ، نە هیڤیە. ما تشتێ مرۆڤ دبینیت، دێ چەوا هیڤیا وی تشتی هەبیت؟” (روما ٨: ٢٤). پاولوس ژی بۆ باوەردارێن ل کورنتوسێ دنڤێسیت: “ئەگەر هیڤیا مە ب مەسیحی ب تنێ بۆ ڤێ ژیانێ بیت، هنگی ئەم ژ هەمی مرۆڤان پەریشانترین.” (١ کورنتوس ١٥: ١٩)
پەتروس داخوازێ ژ مە دکەت وەکو باوەردار د هیڤیا زیندی دا یاکو ب رێکا رابوونا مەسیحی دهێت، دلخۆش بین: “لەوما مێشكێ خۆ بۆ كاری ئامادە بكەن و ل سەر هشێن خۆ بن، ب تەمامی هیڤیا خۆ ب وێ كەرەمێ ڤە گرێ بدەن، ئەوا ل دەمێ دیاربوونا عیسایێ مەسیح دێ بۆ هەوە هێتە ئینان.” (١ پەتروس ١: ١٣)
کوبانێ ژ دەستێ داعش ل هەیڤا ئێك ساڵا ٢٠١٥ێ هاتە ئازادکرن، بەلێ ئەو ژ گونەهـ و ئازاردانێ نەهاتە ئازادکرن. ئەم ژی(یێن کو باوەری ب مەسیحی ئینا)، بەری ٢٠٠٠ ساڵان، ئەم ژ بن کونترولا گونەهێ ب رێکا مەسیحی هاتینە ئازادکرن. بەلێ ئەم هێشتا یێل هیڤیا وێ رۆژێ دەمێ مەسیح دێ مە ب تەمامی ژ هەمی گونەهـ و ئارازان ئازاد کەت.
پرسیار ژ بۆ رەنگڤەدان و تاقیکرنێ
ئەرێ ئەو تشتێن تۆ هیڤیێ د ئەڤێ ژیانێ دا بۆ دخوازی چنە؟ ئەرێ ئەو هیڤیە ل سەر بنگەهێ بنیاتەکێ پەیتن؟
نڤێژ
ئەی خودێ باب، ئەز سوپاسیا تە دکەم کو ب رێکا پێغەمبەر میخای تە سۆزا خۆ بجهـ ئینا کو دا مەسیح ل بێت لەحمێ ژ دایك بیت. ئەی خودان مەسیح، ئەز پەسنا تە دکەم کو هەردەم بۆ هەمی سۆزێن خۆ یێ دلسۆزی و ئەز سوپاسیا تە دکەم ژ بۆ سۆزا تە کو تۆ دێ ب روومەت و هێز ڤەگەری. ئەی خودان، من فێر بکە کو ب هیڤی و پشتراستی چاڤەریێ ڤەگەریانا تە بم، هەروەسا هیڤیا خۆ هەمیێ بدانمە سەر وێ کەرەمێ یاکو دێ ب مە هێتە دان دەمێ د مەزناهیێ دا ئاشکرا دبی. ئەی خودان، نەهێلە هیڤیێن ل سەر تشتێن دی بهێنە دانان. من فێر بکە چاڤێن خۆ بدانمە سەر وێ رۆژێ و ب هیڤیێ رۆژ ب رۆژ پتر دلخۆش و کەرەمدار ببم. ب ناڤێ خودانێ مە عیسایێ مەسیح، ئامین.
