رۆژا بیست و چوارێ
راگەهاندنا ژدایكبوونا مەسیحی یا شادکەرا
لوقا ٢: ١٤
مەزناهی بۆ خودێ ل بلنداهیان و ل سەر ئەردی ژی ئاشتی بۆ مرۆڤان، یێن كو خودێ ژێ رازی.
خواندنا ئەڤرۆکە یا پەرتووکا پیرۆز: لوقا ٢: ٨-٢٠
بینە پێش چاڤێن خۆ تۆ شڤانەکی ل گەل هندەك هەڤالێن دی یێن شڤان ل بێت لەحمێ دەمێ کومەکا فریشتەیان بۆ هەوە دیار دبن. ئەو دەنگوباسەکێ مەزن دەربارەی ژدایکبوونا قورتالکەرێ کو بەری چەند هزار ساڵان پێشبینیا وی هاتیە کرن، دبێژنە هەوە. ئەرێ دا هەستێ تە چ بیت و تە چ کارڤەدان هەبیت؟
چیرۆك بەحسێ هندەك شڤانان دکەت کو دیدەڤانیا (شاهدەییا) مەزناهیا خودێ کرنە. یا دیارە ئەڤان شڤانە ل ئەوێ شەڤێ دا روی ب روی دیتنەکا دیمەنەکێ مەزن بوونە دەمێ فریشتەیێ خودانی ژ نیشکەکێ ڤە بۆ وان دیار بووی و مەزناهیا خودانی ل دەوروبەرێن وان برسقیە، کو ترسەکا مەزن ل دەڤ وان دروست کریە. چ پەیامەکا مەزنە ژ بۆ خەلکی هەمیێ هاتی! ژبەر حەزژێکرنا وی بۆ مە، خودێ کوڕێ خۆ یێ ئێکانە دا ئەڤێ جیهانێ داکو گونەهکاران ژ گونەهـ و مرنێ قورتال بکەت و نێزیکی وی بکەت.
سەحکێ کو خودێ سۆزێ ب ئاشتیێ ددەتە ئەوان یێن د رازیبونا وی دا. بەلێ ئەو خەلکە کینە؟ ئەو کەسەنە یێ کو ب رێکا باوەریا ب مەسیحی ب رێکا کەرەمێ هاتینە قورتالکرن. ئەڤە نەبتنێ بۆ نڤشەك یان ژی مللەتەکێ تایبەتە، بەلکو ژ بۆ هەمی مروڤایەتیێ یە، بۆ ئەوان یێن کو پەیاما مەسیحی ب بەواری وەرگرتین نە ب رێکێن مادی. پەیاما فریشتەیان ئەو مزگینییا خۆش بوو کو ئاشتیا راستەقینە ب رێکا مەسیحی هاتیە وەرگرتن، نە ب رێکا بزاڤێن جیهانێ. بزانە کو ئاشتیا راستەقینە بتنێ ب رێکا کەرەما ژ دەڤ خودێ دهێتە وەرگرتن. خودایێ مە، یێ کو ئەم ئافراندین و حەز ژ مە دکەت، گەلەك یێ دلخۆشە ئاشتیا خۆ ب سەر مە دا بینیت. خودایێ مە گەلەك یێ دلخۆشە مە بکەتە ئەو جوڕێ مروڤان یێن کو د رازیبوونا وی دا نە.
پشتی شڤانان گوهـ ل ئەڤی دەنگوباسی بووین، ئەرێ ئەوان چکر؟ ئەو بێدەنگ نە مان و نە رەوەستییان، بەلێ دەست ب کرێکارێ کر. ئەو چوونە بێت لەحمێ. و پشتی دیتنا بجهـئینانا راگەهاندنا فریشتەیان، ئەوان ئەڤ دەنگوباسە وەکو نهێنی د ناڤبەرا خۆ دا نەپاراست. ل شوینێ، ئەو چوون و ئەو دەنگوباسە بەلاڤ کرن کو دەربارەی ئەڤی زارۆکی یێ بۆ وان هاتی راگەهاندن.
ئەری خویشك و برایێن منێ هێژا، ئەرێ ما ئەم ژی ب ئەڤێ مزگینیا مەسیحی نەهاتینە راسپاردن؟ خودێ ئەم یێن ب مزگینیا عیسایێ مەسیح راسپاردین. ئەڤ مزگینیە یا هێزدارە ژ بۆ قورتالکرنا گونەهکاران ژ دوزەخێ و سزادانا هەروهەر و ئینانا خەلکی بۆ نك خودێ. ئەرێ ما چێدبێ ئەم ئەڤێ مزگینیێ بۆ خۆ بهێلین و ل گەل یێن دی بەلاڤە نەکەین؟ نەخێر، بزانە کو ئەوان شڤانان ئەڤ مزگینینە ژ دلشادیا خۆ راگەهاندیە، ئەوان مەسیحێ پیرۆز دیت و بلەز گۆتە یێن دی ژی. ئەوان نە ژبەر نەچاریێ مزگینیا مەسیحی رادگەهاند، بەلێ چنکو ئەوان شادیەکا بێسنور هەبوو. ئەڤجا نوکە دا پرسیار ژ هەوە بکەم، ئەرێ هەوە شادیا نیاسینا عیسایێ مەسیح تاقی کریە؟ بلا ئەم باوەردار وەکو شڤانێن بێت لەحمێ کار بکەین و ئەڤ مزگینیا گەهشتی مە ل گەل یێن دی ژی بەلاڤ بکەین. مەسیحی ئاشتیا خودێ بۆ مە ئینایە، ئەڤجا بلا ئەم ژی ئەوێ ئاشتیێ بۆ یێن دی ژی بگەهینن داکو مەزناهیا خودێ ل ئەسمانان رۆناهیێ بدەت و ئاشتی ل سەر ئەردی بۆ ئەوان یێن د رازیبوونا وی دا بهێتە دان.
پرسیار ژ بۆ رەنگڤەدان و رامانێ.
ل دەمێ ئاهەنگا ژدایکبوونا عیسایێ مەسیح، چەوا تە دڤێت مزگینیا مەسیحی بەلاڤ بکەی و تە دڤێت ل گەل کێ بەلاڤ بکەی؟
نڤێژ
بابێ مە یێ ل ئەسمانان، سوپاسی و پەسنا تە دکەین ژ بۆ داینا ئاشتی و حەزژێکرنێ. وەکو حەزا خۆ، تۆ پاقژی و کەرما خۆ ددەیە مە، نە بتنێ د ئەڤی سەردەمی دا بەلێ ل پاشەرۆژێ ژی. سوپاس بۆ موکمکرنا مە د مەسیحی دا و بۆ نخافتن و نیاسینا مە ب وی. بێی مەسیح، چ تشت نینە ئەنجام بدەین داکو ئاشتیێ ل گەل تە بدەستڤە بینین، چنکو ئەم گونەهکارین و ژهەژی مرنێینە. ئەم سوپاسیا تە دکەین، کو تە ب کەرەما خۆ ئاشتی ب مە بر و تە ئەم کرنا جهێ رازیبوونا خۆ. ب ناڤێ عیسایێ مەسیح، ئەم ئەڤێ نڤێژێ بۆ ئەسمانی بلند دکەین. ئامین!
