رۆژا بیست و ئێکێ
شادیا هاتنا عیسایێ مەسیح
لوقا ١: ٤٦-٤٩
٤٦ مەریەمێ گۆت: “دەروونێ من پەسنا خودانی دکەت، ٤٧ و گیانێ من ب خودێ، قورتالكەرێ من، گەلەك كەیفخۆش دبیت، ٤٨ چنكو ئەوی بەرێ خۆ دا بەلەنگازیا بەنیا خۆ. و ئەڤە ژ نوكە و پێڤە هەمی بەرەباب دێ بێژنە من: خوزیكێن تە. ٤٩ شیانداری گەلەك كارێن مەزن ل من كرن، ناڤێ وی پیرۆزە.
خواندنا ئەڤرۆکە یا پەرتووکا پیرۆز: لوقا ١: ٣٩-٥٦
ئەرێ تە جارەکێ هەول دایە شادیێ د رەوشەکا مەحال دا ببینی؟ ئەرێ تە جارەکێ باوەریەکا هوسا ب خودێ هەبوویە کو ب رێکا تە، ئەو شیابیت ژیانا یێن دی پڕی شادی بکەت؟ بوویەرێن لوقا ١ نیشا مە ددەن کا چەوا خودێ دلێ مەریەمێ و ئەلیزابێتێ پڕ ژ شادیێ کر زێدەرباری رویب رویبوونا مەریەمێ رەوشەکا بزەحمەت، وەکو جڤاکی ب گۆمان بەرێ خۆ ددا دووگیانیا وێ.
ئەم مروڤ هەردەم هەول ددەین شادیێ د تشتێن جیهانی دا ببینین، و دەمێ روی ب روی زەحمەتێ دبین، ئەم دترسین یان بێهیڤی دبین. بەلێ وەکو باوەردارێن عیسایێ مەسیح، ئەم بپشتراستی دشێین ل سەر ئاستەنگێن جیهانێ سەربکەڤین. نیاسینا خودێ شادیێ بۆ مە بدەستڤە دئینیت و دلێن مە ژ خۆشیێ، هەتا د دەمێ تاقیکرنان ژی دا، پڕ دکەت. خودێ دشێت ئاریشەیێن مە بۆ شادیا تەمام بگوهریت دەمێ ئەم پشتا خۆ ب وی گەرم دکەین و گوهداریا فەرمانێن وی دکەین، هەتا ئەگەر ئەرکەکێ مەحال ژی بیت.
هندەك جاران ئەم هزر دکەین کو خودێ یێ ژ هەمیان لاوازتر د ناڤ مە دا بۆ ئەرکەکێ مەزن هەلدبژێرین، بەلێ پەرتووکا پیرۆز دبێژیتە مە کو خودێ گەلەك جاران یێ هەژار و لاواز و بچویك بکار دئینیت داکو مەزناهیا خۆ دیار بکەت. مە دیت کو مەریەم کچەکا ئاسایی بوو، بەلێ ئەو ب دلێ خۆ یا نێزیکی خودێ بوو و باوەری پێ هەبوو. ئەڤە ژی نیشا مە ددەت کو خودێ بەرێ خۆ ددەتە دلێن مە، نە سەروبەرێ مە. کو هەکەر ئەم کی بین د چڤاکێ دا، پلانا خودێ دشێت ب رێکا من و تە بهێتە بجهـئینان، خۆشیەکا تەمام و راستەقینە بۆ وێ جڤاکێ بینین، هەروەکو خودێ خۆشی و قورتالکرن بۆ گەلێ خۆ ئینای ب رێکا ژ دەیک بوونە مەسیحی ژ مەریەمێ. بتنێ یا پێدڤیە ئەم دئامادە بین، نەترسین، و مە باوەری ب خودێ هەبیت دەمێ ئەو گازی مە دکەت ژ بۆ ئەنجامدانا کارەکێ مەزن، چنکو چ تشت ب هێزا مە ناهێنە جێبەجێکرن، بەلێ ئەو خودێ یە کو ب رێکا مە کار دکەت و ناڤێ خۆ مەزن دکەت.
د ئەڤان ئایەتان دا، ئەم دبینین کو مەریەم ژ خودێ هاتە بەرەکەتدارکرن. مەریەمێ نڤێژ کر و پەسنا خودێ کر ژ بۆ هەلبژارتنا وێ داکو ببیتە دەیکا قورتالکەری. بەلێ یا پێدڤیە ل بیرا مە بیت کو ئەڤ ئەرکە، دەیکبوونا مەسیحی، ئەرکەکێ ب ساناهی نەبوو. بۆ نموونە، ژبەر ب دووگیانبوونا وێ بەری هەڤژینیێ، جڤاکی ب گۆمان تەماشەی وێ کر. هەرچەوا بیت، مەریەمێ پێدانا ئەڤی ئەرکێ بزەحمەت ژ لایێ خودێ ڤە و گوهداریکرنا وێ وەکو خۆشی ددیت. د ئایەتا ٤٩ێ دا، هاتیە بەحسکرن کو مەریەمێ نڤێژ کریە و گۆتیە، “شیانداری گەلەك كارێن مەزن ل من كرن، ناڤێ وی پیرۆزە.”
خویشك و برایێن هێژا، هزرا خۆ بکە کا خودێ چ بۆ هەوە ئەنجامدایە، و هەروەسا دلۆڤانیا هێزداری ژبیر نەکەن. هەتا ئەگەر هوین ژ دەمێن بزەحمەت را ژی ژبەر گوهداریا فەرمانێن خودێ دەرباز ببن، پەسنا خودێ وەکو مەریەمێ بکەن، چنکو خودێ کوڕێ خۆ بۆ هەوە هنارتی داکو هەوە ژیانا هەروهەر ل گەل وی هەبیت. ژبیر نەکە کو خودێ کەرەمێ ددەت.
دبیت خۆشیا هەبوونا ئاشتیێ ل گەل خودێ بۆ وان یێن کو عیسا وەکو قورتالکەرێ خۆ قەبویل نەکری یا ئاشکرا نەبیت، بەلێ بۆ باوەردارەکێ عیسایێ مەسیح، هەروەکو دارەك ب شێوازەکێ سروشتی گەشە دکەت، خۆشیا خودێ ب هەمان رێك د ئەوان دا گەشە دکەت. ئەگەر د مەسیحی دا بمینین و باوەریێ ب خودێ و پلانێن وی بینین، ئەم ژ هێزێ و ژینداریێ پڕ بین و خۆشی دێ د ناخێ مە دا دسەرداچیت.
پرسیار ژ بۆ رەنگڤەدان و رامانێ.
ل گۆر پەرتووکا پیرۆز، وەکو مەریەمێ، چەوا و بوچی هوین پەسنا خودێ د دەمێن بزەحمەتێن ژیانا هەوە دا دکەن؟
نڤێژ
بابێ مە یێ ل ئەسمانان، هندەك جاران د دەمێن بزەحمەت دا، ئەز دترسم کو ئەز نەشێم روی ب روی رەوشا خۆ ببم، یان ژی هندەك جاران دەمێ ئەز روی ب روی رەتکرنێ ژ یێن دی دبم ژبەر باوەریا خۆ، هاریکاریا من بکە وێ خۆشیا ژ تە دهێت بەرنەدەم. هاریکاریا من بکە گوهداریا فەرمانێن تە بکەم و ب دلخۆشی گوهداریا گازیا تە بکەم، هەتا ئەگەر ئەرکەکێ مەحال ژی بیت. ب ناڤێ عیسایێ مەسیح، ئامین.
