رۆژا بیست و دوویێ
ئاشتیا راستەقینە

لوقا ١: ٧٦-٧٩

٧٦ تۆ ژی زاڕۆكۆ، دێ بێژنە تە پێغەمبەرێ خودایێ هەری بلند، چنكو تۆ دێ كەڤیە پێشیا خودانی، داكو رێیێن وی بۆ ئامادە بكەی، ٧٧ دا قورتالبوونێ ب رێكا لێبورینا گونەهێن وان بۆ خەلكێ وی رابگەهینی. ٧٨ ژ هەستێن وی یێن دلۆڤان، دێ خودایێ مە ژ ژۆری، هەروەكو رۆژ دهەلێت، هێتە سەرەدانا مە، ٧٩ داكو رۆناهیێ بدەتە وان، یێن ل تاریستان و سیبەرا مرنێ روینشتین، بەرێ مە ژی بدەتە رێكا ئاشتیێ.

خواندنا ئەڤرۆکە یا پەرتووکا پیرۆز: لوقا ١: ٥٨-٨٠

ئەرێ تە جارەکێ هزرا هەبوونا ئاشتیا راستەقینە د ژیانێ دا کریە؟ ئەرێ تۆ هزر دکەی کو ئاشتیا راستەقینە دشێت ب رێکا سیاسەتێ یان ژی بزاڤا چەکداری بدەستڤە بهێت؟ ئەرێ تۆ هزر دکەی کو شەرکرن و خوینرێشتن بۆ دروستکرنا ئاشتیێ هەولەکا بێمفایە؟

ل رۆژهەلاتا ناڤەراست، و ب تایبەتی ل هەرێما کوردستانێ، خەلکی نەئامادەبوونا ئاشتیێ تاقی کریە. ئەڤ ئاشتیا کو خەلك ژ بۆ خەباتێ دکەت و دڤێت هەبیت ژ بۆ هەبوونا ئێمناهیا خوارنێ و نەبوونا خوین رشتنێ.

ب گشتی، خەلکێ هەمیێ نەئامادەبوونا ئاشتیێ تاقی کریە، بەلێ ئاشتیا راستەقینە ب عیسایێ مەسیحە. لوقا ١: ٧٦-٧٩ ب ئاشکرایی نیشا مە ددەت کو ئاشتی ب دەستێن مروڤان نەهێتە دروستکرن ئەگەر خودێ ب دەستێ مە بۆ وی کاری نە گرێت و ئەو ب خۆ وێ چەندێ ئەنجام نە ددەت.

پشتی چەندەها چەرخێن بێدەنگیێ و نەبوونا هیچ پێغەمبەرەکی بۆ گەلێ ئیسرائیلێ، خودێ سەرەدانا ژن و زەلامەکێ دانعەمر دکەت. فریشتەیەك زەکەریای د دەمێ پەرستنێ دا ئاگەهدار دکەت و سۆزەکێ ددەتە  (ئەلیزابێت و زەکەریا) کو دێ ئەوان زارۆکەك هەبیت. لەوما، دەم دهێت، و زارۆك ژدایك دبیت. ب ئەڤێ رێكێ، خودێ هێزا خۆ بۆ ئەڤێ خێزانێ ب داینا زارۆکەکی ب شێوەیەکی موعجزە بۆ ئەوان دیار دکێت.

ب رێکا زەکەریای، خودێ ناڤێ زارۆکی دکەتە یوحەننا، ئانکو “خودێ یێ دلۆڤانە.” یا ئاشکرایە کو ب رێکا هاتنا یوحەننای، خودێ یێ رێکێ بۆ هاتنا قورتالکەری و ڤەگەراندنا ئاشتیێ بۆ مروڤایەتیێ ب لێبورینا گونەهێن وان ئامادە دکەت. ئایەتا ٢٩ێ دبێژیتە مە کو یوحەننا “بەرێ مە ژی ددەتە رێکا ئاشتیێ.” بەلێ چەوا؟ ب بەرەڤبوونا مە بۆ عیسایێ مەسیح.  یا دیارە کو ژ ئەگەرێ گونەهێ و هەبوونا گەندەلیێ، ئاشتیا مە هەمی ل گەل خودایێ باب هاتیا بڕین. ب رێکەکا کو ژ شیانێن مە مروڤان دەرکەفتیە کو هیچ تشتەکی بکەین داکو ئەوێ دەرز و شەرما ل گەل بابی راستڤە بکەین، چنکو حەزێن مە یێن لەشکانی هەردەم ل گەندەلیێ دگەریێن. بەلێ مەسیح، ب رێکا قوربانیدانا خۆ ل سەر جاچێ، جهێن ئاشتیێ ل گەل خودێ ڤەگەراندنەڤە داکو مە ژیانەکا هەروهەر ل گەل وی هەبیت.

د لوقا ١: ٧٦-٧٩ دا، ئەم دبینین کا چەوا خودێ ب رێکا یوحەننای رێکێ بۆ هاتنا عیسایێ مەسیح ئامادە دکەت. ئەڤ ئایەتە دشێت ببیتە گازیەك بۆ هەر باوەردارەکی ل جیهانێ، مە باوەردارێن کورد ژی بخۆڤە دگریت، داکو پەیاما خودێ بۆ گەلێ خۆ بگەهینین. ئەڤ پەیامە دەربارەی ئاشتبوونا د ناڤبەرا خودێ و مروڤایەتیێ ب رێکا عیسایێ مەسیح دایە، وەکو روناهیەکا د تاریاتیێ دا بۆ مە کوردان گەش دبیت، وەکو ئەم ب درێژاهیا دیرۆکێ گەلەك روی ب روی ناکوکی و خوینرشتنێ بووین.

ئێك ژ چیرۆکێن کو سەرنجا من بۆ خۆ راکێشای دەربارەی هەبوونا ئاشتیێ د جیهانێ دا چیرۆکا ژنەکا زازاکیا کوردیە دەمێ هوزا وێ تووشی هێرشێ ژ لایێ هوزێن ئەنادولیە بووی. ئافرەتێ، کو دوو زارۆکێن وێ یێن کوشتی د دەستان دا بوون، بۆ زەلامەکێ گەنج دکەتە هەوار، “کێ گۆتیە ئاشتیا ل بن ئەسمانی هەی؟”

بەلێ، پەیڤێن ئەڤێ ئافرەتێ د راستن کو چ ئاشتی ل ژێر ئەڤی ئەسمانی نینن چنکو جیهان ژبەر گونەهێن مە تێکچوویە. لەوما، دەمێ هەرکەسەك د ئەڤێ جیهانێ دا ل ئاشتیێ دگەریێت، ئەو چجاران ب تەمامی بێی باوەریا ب خوینا مەسیحی بدەستڤە نائینێت. ئاشتیا کو مەسیح پێشکێشی مە دکەت ئاشتیا د ناڤبەرا مروڤایەتی و خودێ دایە، نە د ناڤبەرا مروڤایەتیێ و رەوشا بەخترەشا جیهانێیە. لێبورینا گونەهان و کەرەما بێسنورا خودانێ مە عیسای نیشاندانەکا ئاشکرایە کو چ رێکێن دی نینن مە ژ تاریاتیا مرنێ یان ژی ئەوان ئازاران یێن کو جیهانێ د دلێ هەرکەسەکی دا چاندین قورتال بکەن. مەسیح، میرێ ئاشتیێ، د ئەڤێ جیهانا تێكچووی دا ژدایك بوویە و قورتالکرن ئینایە.

وەکو ئەم د ئەڤێ جیهانێ دژین یا کو تێدا تاریاتی و مرن ب سەر مروڤایەتیێ گرتیا، رۆناهیا عیسایێ مەسیح ژ پاشایەتیا ویا بلند دبرقێ، هەمیێن کو باوەری هەیە ژ تاریاتی و مرنێ رزگار دکەت. رۆناهیا مەسیحی گەلەك ژ یێن “سەفین و ئەزمەر” بەرزترە. ئەوی دەستهەڵات هەیە رۆناهیا خۆ بۆ جیهانێ هەمیێ بەلاڤە بکەت. هەر دلەکێ بخوازیت دێ روهن بیت و هێتە گوهارتن. رۆناهیا وی گەهشتە دویرترین گوشەیێن بیابانەکا چولکری و مزگینیا هاتنا قورتالکەری و ئاشتیێ راگەهاند. عیسا سۆزا ئاشتیێ ددەتە هەرکەسێ باوەریێ ب وی دئینیت. “مەزناهی بۆ خودێ ل بلنداهیان و ل سەر ئەردی ژی ئاشتی بۆ مرۆڤان، یێن كو خودێ ژێ رازی” (لوقا ٢: ١٤).

پرسیار ژ بۆ رەنگڤەدان و رامانێ.

ئەگەر تە باوەری هەبیت کو ئاشتیا راستەقینە بتنێ ب رێکا خوینا عیسای دهێت، چەوا تۆ ئەڤێ ئاشتیێ وەکو باوەردارەك ب پشتراستی رادگەهینی؟

نڤێژ

بابێ مە یێ ل ئەسمانان، ئەم پەسنا تە دکەین کو تە نیشا مە دای ب رێکا کوڕێ تە یێ ئێکانەیە کو ئاشتیا راستەقینە د ئەڤێ جیهانێ دا بدەستڤە ناهێت، بەلێ بتنێ ب رێکا خوینا کوڕێ تەیە. پەسن بۆ تە بن کو هەردەم تۆ چاڤدێریا دلێن مە دکەی داکو ئاشتی و ئێمناهی ژ بۆ باشیا مە د ناخێ مە دا ئاکنجی ببن. ل مە ببورە گەلەك جاران ژبەر گوناهێت مە ئەم بەرێ خۆ نە دنا وێ ئاشتیا تە دایە مە. هەتا ئەم هەول ددەین ب خۆ ئاشتیێ د ئەڤێ جیهانێ دا بدەستڤە بینین. بابێ مە یێ ل ئەسمانان، ئەم داخوازێ ژ تە دکەین هاریکاریا مە بکەی پەیاما ئاشتیێ بۆ خێزان و هەڤال و هەڤکارێن خۆ رابگەهینین. ئەم نڤێژان دکەین کو رۆناهیا تە د دلێن مە دا ببرسقیت و ببیتە رێبەرەك بۆ یێن دی ژی. ئامین.