رۆژا بیست و سێ یێ
ل دایکبوونەکا بەرەکەتدار و دەرونپچوک
لوقا ٢: ٧
وێ كوڕێ خۆ یێ نەخری بوو و ب پێچكەكێ پێچا و د ھافڕی دا رازاند، چنكو د خانی ڤە جھێ وان نەبوو.
خواندنا ئەڤرۆکە یا پەرتووکا پیرۆز: لوقا ٢: ١-٧
د ئەڤی سەردەمی دا، ل دەستپێکا هەیڤا دوازدە، ئەم ب هیڤی چاڤەرێی رۆژا ٢٥ی هەیڤێینە داکو ئاهەنگا رۆژا ژدایکبوونا مەسیحی بگێرین. یوسڤ و مەریەم نەهـ هەیڤان چاڤەرێی زارۆکبوونێ بوون، و گەلێ خودێ ژی بۆ هزارەها ساڵان چاڤەرێ ئەڤێ ژدایکبوونێ بوون. پشتی چاڤەرێبوونەکا درێژ، زارۆك ژدایك بوو، ژ دویندەها داوودی، تەختێ داوودی وەرگرت، و بوو پاشا. ئەڤ پاشایە ژی مەسیحێ سۆزپێدایە. هەرکەسەکی هزر بکێت کو کەسەکێ هوسا مەزن دێ ل جهەکێ جوان و تایبەت ژدایك بیت. بەلی دەمێ ئەم ئایەتان دخوینین، ئەم مەندەهوش دبین!
ئایەت دبێژیت: “د خانی ڤە جهێ وان نەبوو.” چەند یا سەیرە، پاشایێ پاشایان و کوڕێ خودێ د هافری دا ژدایك بوو، ل جهەکێ گیانەوەران، نە ل کۆچکەکێ. ژدایکبوونا مەسیحی ژدایکبوونەکا سادە و دەروونبچویك بوو… بەلێ یا پیرۆز بوو.
ئەگەر تەماشەی لوقا ٢: ١-٧ بکەین، ئەم دشێین سەحکەین کو لوقا دەمێ دروست یێ بوویەران دیار دکەت. ژ ئەڤێ چەندێ ژی، ئەم فێر دبین کو ئەڤ بوویەرە راستیە، کەسایەتیەکا دیرۆکیە، نە چیرۆکەکا ئاشوپیە. هەروەسا، یوسڤ و مەریەم چوونە گوندەکێ بچویك ل باشورێ ئورشەلیمێ، ناڤێ وی بێت لەحم بوو. زارۆکێ وان ل وێرێ ژدایك بوو. ئەڤ گوندە گەلەك یێ بەرنیاس بوو چنکو گوندێ داوود پاشای بوو. د پەیمانا کەڤن دا، پێغەمبەرەك کو ناڤێ وی میخا بوو پێشبینی کریە کو مەسیح دێ ل ئەڤی گوندی ژدایك ببیت. ئەڤە ژی رۆناهیێ ددانیتە سەر وێ چەندێ کو خودێ پێغەمبەرایەتێن خۆ دەربارەی مەسیحی، قورتالکەری، دویندەها داوودی، بجهـ ئیناینە. هەروەسا ئەم دبینین کو خودێ دەستهەڵاتەکا تەمام ل سەر بوویەرێن دیرۆکی و بریارێن دەستهەڵاتداران هەیە. چەوا؟ مەریەم و یوسڤ ل بێت لەحمێ نەژیان، بەلێ ژبەر حکومەتا دەستهەڵات، ئەو نەچار بوون بچنە بێت لەحمێ ژبەر سەرژمێریێ. ئەوان گوهداریا یاسایێ دکر. ل گەل ئەڤێ چەندێ، ئەوان د دەمێ گەشتا وان بۆ بێت لەحمێ باوەری ب خودێ هەبوو، ب تایبەتی ل ئەوی دەمێ زارۆکێ وان نێزینگ بوو ژدایك ببیت. زەحمەتا ژدایکبوونا مەسیحی بۆ مەسیحی و مەریەمێ ب خۆ وەکو زەحمەتا کوچبەریا کوردان ل سالا ١٩٩١ێ یە، دەمێ کورد هەمی پێگڤە، ژ ترسا هێرشا رژێما بەعس، بەرەڤ سنۆران ڤە چوون داکو ژ هێرشا حکومەتێ برەڤن. بینە پێش چاڤێن خۆ، دایکەك ل ئەوی دەمی زارۆکێ خو ببیت بێی چ چاڤدێریێ هەبیت، بێگۆمان ئەو دەمەکێ گەلەك بزەحمەتە و چجاران ناهێتە ژبیرکرن.
بەلێ دا پرسیار بکەین، ئەو زارۆکە کی بوو؟ ل گۆر پەرتووکا پیرۆز، ئەڤ زارۆکە پەیڤا خودێ یە، هەمی تشت ب رێکا وی هاتینە ئافراندن. ئەو بەراهیا هەمی تشتانە و ب وی ھەمی پێكڤە د گرێداینە. ئەو رۆناهیا مەزناهیا خودێیە و وێنەیێ گەوھەرێ ویە، هەمی تشتان ب پەیڤا خۆ یا هێزدار رادگریت. جیهان هەمی یا ویە. هێشتا، ل گەل ئەڤێ چەندێ هەمیێ ژی، ئەو ل جهـەکی گەلەک کێم ژدایك بوویە، ل گوندەکی ل هافرێ پەزی دا، نە ل کۆچکەکێ دا.
ئەرێ ئەڤێ چیروکێ چ وانە بۆ مە هەیە؟
١. عیسایێ مەسیح د رەوشەکا دەرونپچویک ل جهێ هافرێ گیانەوەرەکی دا ژدایك بوویە ل دەمێ گەشتەکێ، خۆ ل بەر گەلەك زەحمەتیان گرتیە، و پاشی وەکو تاوانبارەک هاتیە خاچدان. لەوما، مەسیح گەلەک یێ دلۆڤانە ل گەل زەحمەتیێن ژیانا مە. ئەڤجا دەمێ ئەم روی ب روی خەم و نەئارامی و زەحمەتێن مەزن د ژیانا خۆ دا دبین، ئەو ب کویری هەست ب خەما مە دکەت و ل گەل مەیە، چنکو ئەو د ناڤا تەنگاڤیێن مەزن را دەرباز بوویە.
٢. خودێ بەردەوام کار دکەت هەتە دەمێ ئەم د رەوشەکا خراب دا. هەروەکو خودێ رەوشا مەریەمێیا ب زەحمەت د دەمێ ژدایکبوونا قورتالکەر مەسیحی ل ئەڤی جهێ نزم دە بکار ئینا، ب هەمان رێك، ئەو دەمێن بۆ باوەرداران بزەحمەت بۆ باشیا وان ب خۆ بکار دئینیت. ئازار و ئاستەنگ دەمکینە، نە هەروهەرن. باوەردار میراتگرێن پاشایەتیەکا هەروهەرن. “چنكو تەنگاڤیێن مە یێن سڤك و دەمكی، مەزناهیەكا گران یا هەتا هەتایی بۆ مە ئامادە دكەن، كو ل گەل چ تشتان ناهێتە هەڤبەركرن” (٢ کورنتوس ٤: ١٧).
٣. مەزناهیا خودێ ب جوانی د مروڤایەتیێ دا هاتیە ئاشکراکرن. ئەوێ پتر خزمەتا یێن دی بکەت مەزنترین مەزناهیە. “چنكو خۆ كوڕێ مرۆڤ ژی نەهاتیە داكو خزمەتا وی بهێتە كرن، لێ دا ئەو خزمەتێ بكەت و خۆ ژ پێش گەلەكان ڤە گۆری بكەت” (مەرقوس ١٠: ٤٥).
لەوما، بلا ئەم ب کەرەم و مەزناهیا عیسایێ مەزن دلخۆش ببین. بلا پەرستنا مەسیحی ژ بۆ ژدایکبوون و ژیان و مرن و رابوونا وی یا مەزن بکەین. چنکو دەربارەی ئەڤێ کەرەما مەسیحی هاتیە نڤێسین: “لەوما خودێ ئەو گەلەك بلند كر و ناڤێ ژ هەمی ناڤان بلندتر دایێ، دا بۆ ناڤێ عیسای هەمی چۆك بچەمیێن چ ل ئەسمانی، یان ل سەر ئەردی، یان ل بن ئەردی بن، و هەمی ئەزمان دانپێدانێ بكەن كو عیسایێ مەسیح خودانە، ژ بۆ مەزناهیا خودایێ باب” (فیلیپی ٢: ٩-١١).
پرسیار ژ بۆ رەنگڤەدان و رامانێ.
د ئەڤێ ئاهەنگا ژدایکبوونا مەسیحی دا، ئەرێ چ ئاستەنگ و بار تە د ژیانا خۆ دا هەنە وەکو جهێ ژدایکبوونا مەسیحی (هافر) کو پێدڤیە تو بسپێری خودێ و بهێلی ب هیڤیا ویڤە کو ئەو دێ بۆ مەزناهیا خۆ و باشیا تە بکار ئینیت؟
نڤێژ
بابێ مە یێ ل ئەسمانان، ئەم پەسنا تە ژ بۆ پلانا تە یا جوان دکەین. عیسایێ مەسیح، ئەم پەسنا تە دکەین ژ بۆ مەزناهی و کەرەما تە. تۆ ل جهـ هەرێ نزمتر دە ژدایك بووی، بەلێ ل دویماهیکێ، تۆ بۆ نك خودێ هاتیە بلندکرن، و نوکە ژی تۆ ل لایێ راستێ خودێ روینشتیە و سەروەریێ ل جیهانێ دکەی. ,بلا ئەو تشتێ تە رازی دکەن مە ژی رازی بکەن. بلا مە باوەری ب پلانا تە هەبیت، هەرچەندە ئەم تێناگەهین ژی، چنکو پلانێن تە ژ شیانێن تێگەهشتنا مە کویرترن. ئەم نڤێژان دکەین کو گەلێ کوردستانێ پتر کەرەما تە ببینن و پەرستنا تە بکەن. تۆ ژ هەژی هەمی مەزناهیانی! ئامین
