رۆژا نوزدێ
مزگینی
لوقا ١: ١٦-١٧
١٦ دێ گەلەكان ژ گەلێ ئیسرائیل بۆ خودان خودایێ وان ڤەگەڕینیت. ١٧ دێ ب گیان و شیانا ئلیاسی ل پێش وی چیت، داكو دلێن بابان ڤەگەڕینیتە سەر زاڕۆكان و نەگوهداران ڤەگەڕینیتە ئاقلمەندیا چاكان، داكو مللەتەكی بۆ خودانی ئامادە بكەت.”
خواندنا ئەڤرۆکە یا پەرتووکا پیرۆز: لوقا ١: ١-٢٥
د لوقا ١: ٥-٢٥ دا، ئەم چیرۆکا زەکەریای و ئەلیزابێتێ دخوینین. زەکەریا کاهن بوو، و ئەلیزابێت ژ دویندەها هارونی بوو. ھەردوو بەرامبەری خودێ د راست بوون، بەلێ ئەوان چ زارۆك نەبوون چنکو ئەلیزابێت یا خرش بوو. هەروەسا ئەو ب ناڤ ساڵاڤە چووبوون. دەمێ زەکەریا د پەرستگەهێ ڤە بخویری دسۆت، فریشتەیەك بۆ وی دیار بوو و مزگینی دایێ کو دێ ئەلیزابێتێ کوڕەك بیت، و پێدڤیە ئەو ناڤێ وی بکەنە یوحەننا. فریشتەی گۆتە وی کو کوڕێ تە دێ رێکا هاتنا مەسیحی ئامادە کەت. زەکەریای باوەر نەکر، و ژبەر ڤێ یەکێ، ئەو لال ما هەتا زارۆك ژدایك بوو. زەکەریای نڤێژ دکرن کو زارۆکەك هەبیت، بەلێ دەمێ فریشتە هاتی، ئەو نەدشیا د نەخشێ خودێ و د بەرسڤا نڤێژێن خۆ بگەهیت. ئەرێ تۆ چ هزر دکەی؟ ئەرێ تۆ ژی گۆمانان ژ بەرسڤدانا نڤێژێن خۆ دبەی؟ یا گرنگە بیرا مە ل نڤێژێن مە بهێت داکو ئەم بشێین بەرەکاتێن خودێ بزانن دەمێ ئەو بەرسڤا وان ددەت.
ئەڤ ئایەتە بەحسێ ئەرکێ یوحەننای دکەت بەری هاتنا عیسایێ مەسیح. پێدڤی بوو یوحەننای خەلك بۆ هاتنا خودانی ئامادە کربایە. ئەرکێ وی خودان سێ لایەنێن گرنگ بوو:
١. ڤەگەراندنا خەلکی بۆ خودێ: یوحەننای گازی خەلکێ دکر تەوبە بکەن و بەرەڤ خودێ بزڤرن. پەیاما وی داخوازا گوهرینەکێ د ژیانێ دا دکر، نە بتنێ رێورەسمەکا ئایینی.
٢. ئاشتبوونا خێزانان: “زڤراندنا دلێن دەیکوبابان بۆ زارۆکێن وان” یا فەر بوو. ئانکو نویکرنا پەیوەندیێن خراببووی و دروستکرنا جڤاکەکا ساخلەم.
٣. گوهرینا رێکا هزرکرنێ: پێدڤی بوو هزرا گونەهباریێ بهێتە گوهرین بۆ تێگەهشتنا گونەهێ و تەوبەکرنێ و راستگۆییێ. ئەڤە ژی گوهرینەکا کویرە د هزر و رێکا هزرکرنێ دا.
د جیهانا مە یا پڕی ئالۆزی و ناکوکی دا، کریسمس بیرا مە دئینیت کو خودێ رێکەك بۆ ئاشتیێ و شادیێ ئینایە د ناڤا جیهانێ دا. یوحەننا هات داکو خەلکی ئامادە بکەت، و ئەوان ژی دلێن خۆ بۆ وەرگرتنا مەسیحی ڤەکرن. د کەلتوورێ کوردی دا، ئامادەکاری ژ بۆ مێهڤانەکی پارچەیەکا گرنگا مێهڤانداریێیە. مال دهێتە پاقژکرن و باشترین خوارن دهێتە ئامادەکرن و هەمی تشت دهێنە ئامادەکرن بەری گەهشتنا مێهڤانی. ئەڤ چەندە ژی هاریکاریا مە دکەت تێبگەهین کا چەوا ئەم بۆ هاتنا مەسیحی دئامادەبین.
کریسمس نەبتنێ ئاهەنگا دیاری و کێك و خەملاندنا دارانە. ب راستی، بیرئینانا هاتنا خودێ یە بۆ ناڤا جیهانێ ب رێکا عیسایێ مەسیح. شادیا کریسمسێ یا راست د مینێ سەر ڤێ راستیێ:
١. خودێ ئەم ژبیر نەکرینە: هەروەکو ئەوی زەکەریا و ئەلیزابێت ژبیر نەکرین، ئەو مە ژی ژبیر ناکەت.
٢. خودێ سۆزێن خۆ بجهـ دئینیت: خودێ سۆز ب هاتنا مەسیحی دا و سۆزا خۆ بجهـ ئینا. ئەم دشێین باوەریا خۆ ب هەمی سۆزێن وی یێن دی ژی بینین.
٣. خودێ رێکەك بۆ ئاشتیێ و قورتالبوونێ دابین کریە: مەسیح هات داکو ئەم ل گەل خودێ و ئێكودوو ئاشت ببین. وەکو گۆتنا مەزنا یا کوردی دبێژیت: “دەرگەهێ خودێ هەمی گاڤان یێ ڤەکریە.” ب رێکا مەسیحی، خودێ رێکەکا هەروهەر بۆ ئاشتی و شادیێ دروستکریە.
ئەم دشێین، وەکو خەلکێ یوحەننای ئامادە کری، خۆ بۆ وەرگرتنا مەسیحی د ژیانا خۆ دا ئامادە بکەین. ئەڤ چەندە ژی شادیا تەمام و کویر یاکو ب سەر هەمی شادیێن دی دکەڤیت ددتە مە.
پرسیار ژ بۆ رەنگڤەدان و رامانێ.
چەوا دێ شێی دلێ خۆ بۆ وەرگرتنا پەیاما مەسیحی د دەمێ ئامادەکاریێن وەرزێ کریسمسێ دا ئامادە بکەین؟
نڤێژ
ئەی خودێ بابێ مە، ئەم سوپاسی و پەسنا تە دکەین، سوپاس بۆ هنارتنا رێکەکێ ژ بۆ ڤەگەریانا مە. تە سۆزا خۆ ب هنارتنا عیسایێ مەسیح بجهـ ئینا، خودانێ مە و قوربانیا تەمام. هیڤیدارین مە ژ گۆمانێن مە قورتال بکە. هاریکاریا مە بکە کو دلێن خۆ ژ بۆ گوهرینێ و ئاشتیا کو مەسیح دئینیت ڤەکەین. بیرا مە بینە کو شادیا راستەقینە ژ نیاسینا تە دهێت. ب ناڤێ عیسایێ مەسیح، ئامین.
