ڕۆژی ١٩
موژدەی خۆشی

لۆقا ١: ١٦ – ١٧

١٦زۆر لە ڕۆڵەکانی ئیسرائیل بۆ لای یەزدانی پەروەردگاری خۆیان دەگەڕێنێتەوە. ١٧بە ڕۆح و توانای ئەلیاسەوە پێش یەزدان دەکەوێت، تاکو دڵی باوکان بۆ لای منداڵەکان ڕابکێشێت و یاخیبووانیش بۆ لای دانایی ڕاستودروستان بگەڕێنێتەوە، بۆ ئەوەی گەلێکی ئامادە بۆ یەزدان پێکبهێنێت.

خوێندنەوەی کتێبی پیرۆز بۆ ئەمڕۆ:  لۆقا ١:١-٢٥

لە لۆقا ١: ٥ – ٢٥، چیرۆکی زەکەریا و ئەلیسابات دەخوێنینەوە. زەکەریا کاهین بوو، ئەلیساباتیش لە نەوەی هاروون بوو. هەردووکیان لەبەرچاوی خودا ڕاستودروست بوون، بەڵام منداڵیان نەدەبوو، چونکە ئەلیسابات نەزۆک بوو. هەروەها بەتەمەنیش بوون. کاتێک زەکەریا لە پەرستگا خەریکی سووتاندنی بخوور بوو، فریشتەیەک دەرکەوت و موژدەی ئەوەی پێدا کە ئەلیسابات کوڕێکی دەبێت و دەبێت ناوی لێبنێن یەحیا. فریشتەکە پێی گوت کە ئەو کوڕە ڕێگاکە ئامادە دەکات بۆ هاتنی مەسیح. زەکەریا باوەڕی نەکرد، لەبەرئەوە ڵاڵ بوو تا ئەو کاتەی کە منداڵەکە لە دایک بوو. رۆژانێک بوو کە زەکەریا نوێژی دەکرد بۆ هەبوونی منداڵێک، بەڵام کاتی هاتنی فریشتەکە، زەکەریا نەیتوانی لە قوڵی پلانی خودا و وەڵامدانەوەی نوێژەکانی تێبگات. ئەی چ لەبارەی تۆ؟ گومان لە وەڵامدانەوەی نوێژەکانت دەکەیت؟ زۆر گرنگە نوێژەکانمان لەبیربێت تا نیعمەتی خودا ببینین کاتێک وەڵامی نوێژەکانمان دەداتەوە.

ئەم ئایەتە باس لە ڕۆڵی یەحیا دەکات پێش هاتنی عیسای مەسیح. یەحیا دەبوو خەڵک ئامادە بکات بۆ هاتنی یەزدان. ئەرکەکەی سێ لایەنی گرنگی هەبوو:

١. گەڕاندنەوەی خەڵک بۆ لای خودا: یەحیا خەڵکی بانگ دەکرد بۆ تۆبەکردن و گەڕانەوە بۆ لای خودا. بانگەوازەکەی گۆڕانی ژیانی دەویست، نەک تەنها ڕێوڕەسمی ئایینی.

٢. ئاشتکردنەوەی خێزانەکان: دەبوو “دڵی باوکان بۆ لای منداڵان” بگەڕێنێتەوە. ئەمە واتە نوێبوونەوەی پەیوەندییە شکاوەکان و دروستکردنی کۆمەڵگایەکی تەندروست.

٣. گۆڕینی بیرکردنەوە: دەبوو بیرکردنەوەی یاخیبووانی بگۆڕیبایە بۆ تێگەشتن لە گوناه و تۆبە و ڕاستودروستی. ئەمە گۆڕانکارییەکی قووڵە لە هزر و بیرکردنەوەدا.

لەم جیهانەی ئێمە کە پڕە لە ئاژاوە و ناڕێکی، کریسمس یادمان دەخاتەوە کە خودا ڕێگایەکی بۆ ئاشتەوایی و خۆشی هێنایە ناو جیهان. یەحیا هات تا خەڵک ئامادە بکات، ئەوانیش دڵیان کردەوە بۆ وەرگرتنی مەسیح. لە کولتووری کوردیدا، ئامادەکاری بۆ میوان بەشێکی گرنگە لە میوانداری و میواندۆستی. ماڵ پاک دەکرێتەوە، باشترین خواردن ئامادە دەکرێت، و هەموو شتێک ڕێک دەخرێت پێش هاتنی میوان. ئەمە یارمەتیمان دەدات تێبگەین کە چۆن بۆ هاتنی مەسیح ئامادە بین.

کریسمس تەنها جەژنێک نییە بۆ دیاری و کێک و داری ڕازاوە. لە ڕاستیدا، یادکردنەوەی هاتنی خودایە بۆ ناو جیهان لە ڕێگای عیسای مەسیحەوە. خۆشی ڕاستەقینەی کریسمس لەوەدایە کە:

١. خودا ئێمەی لەبیر نەکردووە: هەر وەک چۆن زەکەریا و ئەلیساباتی لەبیر نەکرد، ئێمەش لەبیر ناکات.

٢. خودا بەڵێنەکانی بەجێ دەهێنێت: خودا بەڵێنی هاتنی مەسیحی دا و بەجێی هێنا. دەتوانین متمانە بە هەموو بەڵێنەکانی تریشی بکەین.

٣. خودا ڕێگایەکی بۆ ئاشتەوایی و رزگاریمان دانا: مەسیح هات تا ئێمە لەگەڵ خودا و لە گەڵ یەکتریش ئاشت ببینەوە. وەک ئەو پەندە کوردییەکەی کە دەڵێت: “دەرگای ماڵی خودا هەمیشە کراوەیە.” لە ڕێگای مەسیحەوە، خودا دەرگایەکی هەمیشەیی بۆ ئاشتەوایی و خۆشی کردووەتەوە.

دەتوانین وەک ئەو گەلەی کە یەحیا ئامادەی کرد، ئێمەش خۆمان ئامادە بکەین بۆ وەرگرتنی مەسیح لە ژیانماندا. ئەمەش خۆشییەکی تەواو و قووڵمان پێدەبەخشێت کە لە سەرووی هەموو خۆشییەکانی ترەوەیە.

پرسیار بۆ ڕامان و وردبوونەوە

چۆن دەتوانیت لەم سەردەمی ئامادەکاریی کریسمسدا، دڵت ئامادە بکەیت بۆ وەرگرتنی پەیامی مەسیح؟

نوێژ

ئەی خودای باوکمان، سوپاس و ستایشت دەکەین، سوپاس بۆ ناردنی ڕێگایەک بۆ گەڕانەوەمان. تۆ بەڵێنی خۆت بەجێهێنا بە ناردنی عیسای مەسیحی سەروەرمان و قوربانییە تەواوەکەی. تکایە لە گومانەکانمان رزگارمان بکە. یارمەتیمان بدە دڵمان بکەینەوە بۆ ئەو گۆڕانکاری و ئاشتەواییەی کە مەسیح دەیهێنێت. بیرمان بخەرەوە کە خۆشی ڕاستەقینە لە ناسینی تۆدا دێت. بە ناوی عیسای مەسیح ئامین.