رۆژا بیستێ
حەزژێکرنا خودێ ب رێکا گوهداریکرنێ

لوقا ١: ٣٠-٣١؛ ٣٨

٣٠ ئەڤجا فریشتەی گۆتێ: «مەریەم، تۆ نەترسە، كەرەم ژ نك خودێ بۆ تە هاتیە دان. ٣١ ئەڤە تۆ دێ ب دوو گیان كەڤی و دێ تە كوڕەك بیت، دێ ناڤێ وی كەیە عیسا. […] ٣٨ ئینا مەریەمێ گۆت: «ئەڤە ئەز بەنیا خودانیمە. بلا ئەوا تە گۆتی ب جهـ بهێت. پاشی فریشتە ژ نك چوو.

خواندنا ئەڤرۆکە یا پەرتووکا پیرۆز: لوقا ١: ٢٦-٣٨

ل ساڵا ١٩٢٣ێ، باوەردارەکێ ئەمریکی کو ناڤێ وی (روجەر کەمبەرلان) بوو ژ ئەمریکا هاتە رۆژهەلاتا ناڤەراست و د ناڤا کوردان دا ژیا. ئەو ل دهوکێ ژیا. ئەوی حەز ژ خودێ دکر، هەروەسا حەز ژ کوردان ژی دکر. ئەو خزمەتکارەکێ مەسیحی بوو. ئەوی هەول ددا پەیاما مەسیحی بۆ کوردان بگەهینیت. هندەك کوردان ب دلخۆشیڤە پەیاما مەسیحی وەرگرت، و یێن دی ژی رەت کر.

ل رۆژا ١٢/٦/١٩٣٨ێ، ل گوندەکێ نێزکی وی، دوو کەسان سەرەدانا روجەری ل مالا وی کر. روجەری پەیاما مەسیحی ل گەل وان بەلاڤ کر. پاشی ئێك ژ وان هەردوو زەلامان تەقە ل روجەری کر و ئەو کوشت. ئەم ب دروستاهی نزانین کا بوچی ئەو هاتا کوشتن، بەلێ ئەم دزانین کو مرنا روجەری بەلاڤکرنا پەیاما مەسیحی ل کوردستانێ رانەوەستاند.

خودێ روجەر کەمبەرلان ب کەرەما خۆ هەلبژارت و ب ریکا قورتالکرنا وی ژ گونەهـ و مرنا هەروهەر حەزژێکرنا خۆ نیشا دا. ژبەر حەزژێکرنا خودێ بۆ وی، روجەر کەمبەرلان بوو خزمەتکارێ خودێ، ب رێکا گوهداریکرن و خزمەتێ حەزژێکرنا خو بۆ خودێ نیشان ددا. روجەر کەمبەرلان خزمەتکارەکێ دلسۆز بوو. ئەوی مال و ژیان و خێزانا خۆ ل پشت هێلان داکو یا خودێ ژ وی داخواز کری ئەنجام بدەت. بەلێ، بجهـئینانا گازیا خودێ بۆ وی بۆ ئەگەرێ مرنا وی، بەلێ روجەر کەمبەرلان چجاران پەشێمان نەبوو. ئەوی خزینەیا ئەسمانان بدەستڤە ئینا، یاکو چجاران ژناڤ ناچیت.

بەری دوو هزار ساڵان، ژنەکا گەنج ناڤێ وێ مەریەم بوو خودێ ئەرکەکێ تایبەت دابوو وێ، داکو ببیتە دەیکا مەسیحی. د نڤێسارێن پیرۆز دا هاتیە بەحسکرن کو خودێ فریشتەك هنارت نك مەریەمێ داکو رابگەهینیت دێ وێ کوڕەك هەبیت، و ئەو کوڕە ژی دێ بیتە قورتالکەرێ سۆزپێدای. بێگۆمان، ئەڤە بۆ وێ ئەرکەکێ بزەحمەت و گرنگ بوو. بوچێ؟ چنکو هەبوونا زارۆکەکی بێی هەڤژین دێ بیتە ئەگەر کو جڤاك ب گومان و دادکرن تەماشەی وێ بکەت. ژبلی ئەڤێ چەندێ، مەریەمێ ب چاڤێن خۆ خاچدانا کوڕێ خۆ دیت، کو یا ب ساناهی نەبوو. ب راستی د دەستپێکێ دا، فریشتەی ئەڤ ئەرکێ خودایی بۆ وێ راگەهاند، و مەریەمێ نەدزانی چ جورە ژیانێ دێ بورینیت. گەلەك پرسیار د مێشکێ وێ دا دروست بوون. بۆ نموونە، ئەگەر فریشتەك بهێتە نك تە و ئەرکەکێ هوسا مەزن و سەیر دا تە، بێگومان ئەو دێ گەلەك پرسیاران ل دەڤ تە پەیدا کەت.

بەلێ سەرنجا خۆ بدانە سەر بەرسڤا مەریەمێ. ئەرێ مەریەم چ دبێژیت؟ “ئەڤە ئەز بەنیا خودانیمە. بلا ئەوا تە گۆتی ب جهـ بهێت.” مەریەم حەزژێکرنا خۆ بۆ خودانی ب رێکا گوهداریکرنێ دەردبریت. مەریەم یا ئامادە بوو هەر بارەكی و بەرپرسیارەتیەکێ هەلبگریت کو خودێ ئەو پێ راسپاردیە. هەرچەندە مەریەمێ نەدزانی پاشەرۆژ دێ یا چەوا بیت، ئەوێ باوەری ب خودێ یێ وێ دنیاسی ئینا و پشتا خۆ ب وی گەرم کر. د ئایەتا ٢٨ێ دا، ب رێکا فریشتەی، خودێ سۆز دا وێ کو ئەو دێ ل گەل وێ بیت. راستە کو ئەڤە ئەرکەکێ مەزن و بزەحمەت بوو، بەلێ مەریەم یا بتنێ نەبوو، خودێ ل گەل وێ بوو.

خۆشتڤی، دەمێ ئاهەنگ گێرانا ژدایکبوونا عیسایێ مەسیح، ئەرێ بیرا مە ل چ دهێت؟ بیرا مە دهێت کو خودێ، ژبەر حەزژێکرنا خۆ یا مەزن و نەگوهور بۆ مە، کوڕێ خۆ یێ ئێکانە هنارتە ئەڤێ جیهانێ داکو ئەم ژ گونەهـ و مرنێ بهێینە قورتالکرن. مەسیحی ئەرکەکێ بزەحمەت وەرگرت و ئازار کێشا و هاتە خاچدان و ژ پەرداخێ توڕەبوونا خودێ دژی گونەهکاران ل جهێ مە ڤەخوار.

خۆشتڤی، ئەڤ خودایە ژ هەژی حەزژێکرن و گوهداریکرنا مەیە. گوهداریا مە بۆ خودێ د وان ئەرك و فەرمان و بەرپرسیارەتیێن وی داینە مە، خودێ مەزن دکەت. ئەرێ ئەو چ ئەرکە خودێ دایە تە؟ گرنگیێ بدە وێ بەرپرسیارەتیا خودێ تۆ پێ راسپاردی. گوهداریا تە بۆ خودێ مەزنترین ئەرکە د ژیانا تە دا. ب رێکا گوهداریا تە، تۆ خودێ مەزن دکەی یێ کو ژ هەژی هەمی مەزناهیێیە.

ئەگەر ئەم ب دروستاهی حەز ژ خودێ بکەین، هوسا ئەم دێ ب دروستاهی گوهداریا فەرمانێن وی کەین. دبیت گوهداریکرن گەلەك زەحمەت و نەئارامیان د ژیانا مە دا دروست بکەت. گوهداریکرنا مەریەمێ و روجەر کەمبەرلانی روی ب روی گەلەك ئاستەنگ بوو. بەلێ بێ گۆمان، ئەگەر تۆ نوکە شیابای ل گەل وان بئاخڤی، ئەو دا بێژنە تە کو گوهداریکرنا وان بۆ خودێ ژ هەژی هەمی زەحمەت و نەئارامیان بوو. خودانی پێشوازیا وان بۆ ناڤا ئامادەبوونا هەر و هەرا خودێ کریە.

پرسیار ژ بۆ رەنگڤەدان و رامانێ.

چەوا خودێ گازی تە کریە کو پتر گوهداریا ئەوان ئەرک و بەرپرسیارەتیێن وی داینە تە بکەی؟ 

نڤێژ

بابێ مە یێ ل ئەسمانان، ئەم سوپاسی و پەسنا تە دکەین کو تە کوڕێ خۆ یێ خۆشتڤی هنارت. ئەم داخواز دکەین کو تۆ ئاقلمەندیێ بدەیە مە داکو کویرتر د پەیڤێن تە بگەهین. هاریکاریا مە بکە کو زێدەتر و پتر ب گیانی گەشێ بکەین. داخوازێ ژ تە دکەین کو گیانێن مە پڕی حەژێکرنا خۆ یا بێ سنۆر بکەی. ئەی خودێ، گیانێن مە بهێز بئێخە داکو ل سەر حەزێن جیهانێ سەربکەڤین، داکو نێزیکی تە ببین و هەتا مرنێ گوهدار ببین. ب ناڤێ عیسایێ مەسیح، ئامین.