رۆژا هەژدێ
ئاشتیا راستەقینە
کۆلۆسی ١: ١٩-٢٠
١٩ چنكو خودێ پێ خۆش بوو كو هەمی تژیاتیا وی د كەسایەتیا مەسیحی دا ئاكنجی ببیت، ٢٠ و ب رێكا خوینا وی یا ل سەر خاچێ هاتیە رشتن، ئاشتیێ چێكەت، هۆسا ب رێكا وی هەمی تشتان ل گەل خۆ ئاشت بكەت، چ ل سەر ئەردی بیت، یان ژی ل ئەسمانان بیت.
خواندنا ئەڤرۆکە یا پەرتووکا پیرۆز: کۆلۆسی ١: ١٥-٢٣
ئەرێ ب باوەریا تە ئاشتیا راستەقینە چیە؟ ئەرێ تۆ چەوا ئاشتیا راستەقینە پێناسە دکەی؟ ئەرێ خەلك د ئاشتیێ دانە؟ ئەرێ پێدڤیە ئەم چ بکەین داکو د ئاشتیا راستەقینە دا بژین؟ داکو پتر د ئاشتیا راستەقینە بگەهین، دا پێگڤە سەرنجێ بدانینە سەر ئەڤێ چیرۆکێ.
رۆژەکێ پاشایەکی دڤیا وێنەیەکێ ئاشتیێ چێبکەت، ئەڤجا ئەوی هەمی هونەرمەندێن پاشایەتیا خۆ داخواز کرنە کوچکێ و داخواز ژ هەر ئێك ژ وان کر وێنەیەکێ ئاشتیێ بکێشیت و ل پێشانگەهێ پیشان بدەت. رۆژا پێشانگەهێ هات، و هەلبژارتنا وێنەیێ راستەقینەیێ ئاشتیێ دەستپێکر. د ناڤا هەمی وێنەیان دا، پاشای دوو وێنە هەلبژارتن داکو ل دویماهیکێ ئێك ژ وان بهەلبژێریت. وێنەیەک ژێ رەنگێ بهارێ بوو، ل گەل کەسکاتی و گولێن سۆر و زەر و ئەسمانەکێ سافی کو رۆناهیا رۆژێ ل سەر روویباران رۆناهی ددا، هەمی تشت گەلەك د جوان بوون. سیلاڤەکا مەزن ژی د وێنە دا هەبوو. بالندە ژی د ناڤا ئەسمانێ سافیێ بهارێ دا دفرین. وێنەیێ دوویێ باڕۆڤەیەک و عەورێن تاری و بریسی نیشان ددان، تاریاتیێ دەست ب سەر وێنەی دا گرت بوو، بەلێ بالندەیەکێ بچویك ل بن سیبەرا چەقەکێ دارێ دا ل هێلینا خۆ یا ل راخێ خوارێ یا وێنەی روینشت بوو، ب هیڤی چاڤەرێی پاشەرۆژەکا گەشتر دکر.
هەمی ئامادەبوویێن ل گەل پاشای د وێ باوەرێ دا بوون کو پاشا دێ وێنەیێ ئێكێ هەلبژێریت. بەلێ بەرۆڤاژی دیتنا پێشبینیان، پاشای وێنەیێ دوویێ هەلبژارت و گۆت: ئەڤە وێنەیێ راستەقینەیێ ئاشتیێ یە! هەر کەس مەندەهوش بو و پرسیار کر کا بوچی پاشای وێنەیێ دوویێ هەلبژارت، یێ ب چ شێوەیان ئاشتیکەر دیار نەدکر. لێ پاشای گۆت ئاشتیا راستەقینە ئەوە یا د ناخی دا و ژ مروڤی دەردکەڤیت، نە ئەو ئاشتیا ب دەستکردی ل دەوروبەرێن مە دهێتە دروستکرن.
ل دەستپێکێ، تێکستان ئاماژە ب ئەوێ راستیێ ددا کو خودێ و مروڤ پێگڤە بوون، هەروەسا ئاشتی و کەیفخۆشی ل ئەردی بەلاڤ ببوون. بەلێ مروڤی سەرپێچیا فەرمانا خودێ کر، و ژبەر هندێ ئاشتی بەرزە ببوو. مروڤ کەفتە د ناڤا ترسێ و خامێ و نەئارامیێ دا. دەمێ گونەهـ روی ب روی ژیانا مروڤان بووی، دەرزەك کەفتە د پەیوەندیا ناڤبەرا خودێ و مروڤی دا. پاشی دەرزەك کەفتە د ناڤبەرا مروڤان ب خۆ دا. دەمی مروڤ خودان پەیوەندی ل گەل خودێ، مرۆڤ د حەزژێکرنێ و ئاشتیێ دا بوو ل گەل وی، بەلێ پشتی گوناهیێ ئەو فێری غیرات کێشێ و درەو و کارێن خەلەت و خۆپەرێسیێ و خاپاندنێ…هتد بوو. ل شوینا سیفەتتێن خودایی یێ کو مرۆڤە هەبون، هەتنا ڤەگۆهستن ب سیفەتێن گوناهیێ
بەلێ، پاشا یێ راست بوو، وێنەیێ دوویێ نیشاندانا راستەقینەیا ژیانا مەیە چنکو ب راستیا ئەم دبینن پشتی کو مروڤ کەفتیە د گونەهێ دا و ژدەستدانا ئاشتیا خۆ ل گەل خودێ ئەوە کو ژیانا مروڤی ب تەمامی پڕی تاریاتی و باڕۆڤە و دەرد و تەنگاڤی بوو. ئەڤەیە راستیا پشتی جودابوونا مە ژ خودێ. هەروەکو شینکاتیەکە بچویك ل ژێر سیبەرا دارەکێ ب هیڤی چاڤەرێی رەوشا ڤەگەریانا دووبارە ژیانێ دکەت، ئەم مروڤ هیڤیێ بۆ قورتالکەرێ دبەین داکو بەرێ مە ژ تاریاتیێ بەرەڤ روناهیێ ببەت داکو دووبارە ژدایك ببین.
هیڤیا مە ب رێکا عیسایێ مەسیح هاتیە. کەرەما خودێ ژ گونەها مروڤی مەزنتر. لێبورینا خودێ ژ خرابیێن مروڤان مەزنترە. خودێ ب رێکا قوربانیدانا مەسیحی قورتالکرن بۆ مروڤایەتیێ پەیدا کر. ژبەر مەسیحی، دادکرنا خودێ ل سەر مە نینە. ل گەل هاتنا عیسایێ مەسیح، یا کو ئەم د ئەڤی وەرزی دا ببیر دئینین، ئەم ئاهەنگێ دگێرین کو باوەرداران ئاشتبوونا راستەقینە ل گەل خودێ و خۆ ب خۆ و ل گەل باوەردارێن دی هەیە. ئەم هیڤی دکەین و چاڤەرێی وێ رۆژێینە دەمێ مەسیح دێ ڤەگەریت و ئەڤێ جیهانێ نویژەن کەت و دەستهەڵاتا خۆ ل سەر جیهانەکا نوی دامەزرینیت و ئەم دێ بۆ هەروهەر د ئاشتیا راستەقینە دا ژین.
پرسیار ژ بۆ رەنگڤەدان و رامانێ.
ئەرێ چەوا خودێ ئاشتبوونا راستەقینە ئینایە د ناڤا هەمی ژیانا تە دا؟
نڤێژ
ئەی خودایێ ئاشتیێ، ئەم سوپاسیا تە دکەین و پەسنا تە دکەین ژ بۆ حەزژێکرنا تە یا بێ مەرج بۆ مە و دابینکرنا ئاشتیا راستەقینە. ئەم سوپاسیا تە دکەین کو تە کوڕێ خۆ یێ ئێکانە کریە قوربان ژ بۆ ئاشتبوونا مە ل گەل تە و ل گەل ئێکودوو ژی. ئەم سوپاسیا تە دکەین ژ بۆ خاچ و کەرەم و دلوڤانیا تە. ئەی خودایێ بەرز و هێزدار، ئەم داخواز دکەین کو ئاشتیا تە ل مە دا رەنگڤەدێت بۆ کەسێن دی. ئەم پەسنا تە دکەین کو تۆ خودایێ هەمیانی، د ناڤ هەمیان دا مەزنی، و د ناڤا هەرکەسەکی دا کار دکەی. ئەم سوپاسیا تە دکەین ژ بۆ چاندنا ئارامی و هەدارێ د ناڤ مە دا. ب ناڤێ عیسایێ مەسیح، ئامین.
