رۆژا هەڤدێ
هەلوەشاندنا دیوارێ ناڤبڕێ
ئەفەسوس ٢: ١٣-١٦
١٣ لێ نوكە د ئێكبوونا ل گەل مەسیح عیسای دا، هوین یێن كو ل دەمەكی د دویر بوون، ب رێكا خوینا مەسیحی هاتنە نێزیك كرن. ١٤ چنكو مەسیح ب خۆ ئەو ئاشتیە یا د ناڤبەرا مە دا. وی جوهی و نەجوهی كرنە ئێك و ب لەشێ خۆ دیوارێ ناڤبڕێ، ئانكو دوژمناتی، هەلوەشاند. ١٥ وی دەستوور ب فەرمان و رێسایێن وی ڤە ژ كار ئێخست. دا ب ئێكبوونا ل گەل خۆ، ژ هەردوویان مرۆڤەكێ نوی بئافرینیت و ب ڤی شێوەی ئاشتیێ چێكەت، ١٦ و ب خاچا خۆ هەردوویان د ئێك لەش دا ل گەل خودێ ئاشت بكەت، هۆسا وی دوژمناتی كوشت.
خواندنا ئەڤرۆکە یا پەرتووکا پیرۆز: ئەفەسوس ٢: ١١-٢٢
ل ئەڤان دویماهیکان، ستیکەرەکا (تەبعەک) گەلەك بەربەڵاڤ ل سەر گەلەك ترومبێل و تیشیرت و لاپەرێن سوشیال میدیایێ و کەڤەرێن موبایلان د ناڤا کوردان دهێتە دیتن کو هاتینە نڤێسین: (٢+٢=١). راستە کو ئەڤ چەندە ب رێکا بیرکاریێ خەلەتە، بەلێ ئەڤ چەند هەلگرا هیڤیەکا تەمامە بۆ کوردان. نیەت ئەوە کو هەرچوار پارچێن کوردستانێ ئیكن، نە چوارن. ئەف پەیامە رادگەهینیت کو کورد هەمی مللەتەكن، ب هیڤیا ئەوێ چەندێ کو رۆژەکێ هەرچوار پارچەیێن کوردستانێ بهێنە ئازادکرن و ببنە ئێك پارچە، وەکو هەر مللەتەکێ دی، ئەوان دێ وەلاتێ خۆ هەبیت.
راستە د دلێن هەوان دا، کورد کوردستانێ وەکو ئێك کوردستان دبینن، نە چوار. هەرچەوا بیت، د راستیێ دا، سنورێن سیاسی د ناڤبەرا هەر چوار پارچێن کوردستانێ دا هەنە، یاکو کوردستان بۆ سەر چوار پارچەیان دابەش کری و گەلێ کورد ژ بوونا ئێك مللەت د کوردستانا مەزن دا بێبەهر کرین. سنورێن ئیران و تورکیا و عێراق و سوریایێ بووینە ئەگەر کو “٢+٢=٤.” لێ ژبلی ئەوێ چەندێ، د ناڤا کوردان بخۆ دا، دیوارێن دابەشکەر و ژێك جوداکەر ژبەر نەرازیبوون و پرسگرێکێن سیاسی د ناڤا هوزێن کوردی دا هەنە، یێن کو بووینە ئەگەر کو ئەڤ دیوارە ببنە ئەگەرێ نەبوونا ئێکەتیا د ناڤبەرا کوردان دا.
ئەڤ دیوارێن ناڤبڕ و ژێک جوداکەر د ناڤبەرا کوردان دا نموونەکا بچویکا وان دیوارێن ناڤبڕ و ژیكجوداکەرن یێن کو د ناڤبەرا جوهی و نەجوهیان دا ل سەردەمێ مەسیحی دا هەین. د سەردەمێ مەسیحی دا، جوهی و نەجوهیان پێك نەدکر. ئەوان نەدڤیا هاریکاریا ئێك و دوو بکەن یان ژی پێکهاتنێ ل گەل ئێك بکەین. دیوارێن کەلتووری و سیاسی و زمانی و ئایینی ئەو ژ ئێک جوداکرن، و ئەڤ دیوارە ئەگەرێ دوژمناهیا د ناڤبەرا وان دا بوون. بەلێ دەمێ مەسیح هاتیە ئەڤێ جیهانێ، ئەوی ئەڤ دیوارێن ناڤبڕ هەرفاندن. ئەو نەبتنێ قورتالکەرێ جوهیان بوو بەلکو قورتالکەرێ هەمی خەلکی ژ مللەتێن جیاواز بوو. ب رێکا باوەریێ ب قوربانیا مەسیحی، خەلك ژ هەمی مللەتان دشێن نێزیکی خودێ ببن و ب ئاشتی ل گەل ئیك بژین. بەلێ دا پرسیار بکەین، ژ بلی ڤێ، ئەرێ قوربانیدانا وی چ کاریگەریا دی هەیە؟
ئێکبوونا مە ل گەل مەسیحی ئانکو ئێکبوونا مە ل گەل باوەردارێن دی وەکو ئێك خێزان، ئانکو گەلێ خودێ یێ پیرۆز. باوەردارێن چەرخێ ئێكێ دوو کەنیسە نەدامەزراندن، ئێك بۆ جوهیان و ئێك بۆ نەجوهیان، زێدەباری جیاوازیێن کەلتوری یێن مەزن و دوژمناتیا د ناڤبەرا وان دا. خودێ داخوازێ ژ باوەرداران دکەت کو جیاوازیێن خۆ بداننە رەخەکێ و ب ئاشتی ل گەل ئێكودوو د هەمان کەنیسە دا بژین. ب رێکا مەسیحی، جوهی و نەجوهی بوونە ئێك خێزانا گیانی. لەوما ئێکبوونا کەنیسێ رەنگڤەدانا مەزناهی و هێزا پەیاما مەسیحیە.
خویشك و برایان، ل کریسمسێ ئەم ئاهەنگا وێ راستیا کو مەسح یێ هاتی مە بۆ خودێ بزڤرینیت دگێرین. بەلێ پێدڤیە ل بیرا مە بیت کو ب رێکا مەسیحی، خودێ دیوارێ ناڤبڕ د ناڤبەرا تە و باوەردارێن دی دا هەلوشاندیە. ئەڤجا پێدڤیە تۆ چ بکەی؟ پێدڤیە هەر باوەردارەك گرێدای کەنیسێ بیت داکو خزمەتێ بکەت و حەز ژ خویشك و برایێن خۆ د مەسیحی دا بکەت. بەلێ دبیت تۆ هزر بکەی و بێژی، “بەلێ یێن دی ل کەنیسەیێ وەکو مە نینن، ئەو ژ هەمان هوز نینن.” یان ژی “باوەریا من ب وان ناهێت، ئەز ئەوان نانیاسم، ئەو ئاریشان بۆ مە دروست دکەن،” یان ژی بێژی، “ئەز ژ باشوری مە و ئەو ژ رۆژهەلاتینە.” بەلێ هەڤالێن باوەردار، ئەگەر مەسیحی پێشوازیا وان بۆ ناڤا خێزانا خۆ کربیت، ئەرێ تۆ کی دا وان رەت بکەی؟ دەمێ ئەم گرێدای کەنیسەیەکا ناڤخۆیی بین و خەباتێ ژ بۆ نیاسینا ئەوان باوەرداران بکەین و زێدەباری جیاوازیێن مە د ئێکبوونێ دا ل گەل ئێك بژین، ئەم مەزناهیا خودێ د جیهانەکا تاری دا نێشان ددەین.
بۆ ئەوان کوردێن ب رێکا باوەریا ب مەسیحی نێزیکی خودێ بووین، ٢+٢=١. ئانکو باوەردارێن کورد، چ زەنگین یان ژی هەژار، نانپێژ یان ژی کرێکار، ماموستا، چ ژ رۆژهەلات، باکور، یان ژی باشور بیت، هەمی پێگڤە ئەندامێن پاشایەتیا ئەسمانی نە. د کەنیسەیا مە دا، کوردێن رۆژئاڤا و رۆژهەلات و باشور ژی هەنە، هەمی یێن کو وەکو ئەندامێن ئێك خێزان حەز ژ ئێکودوو دکەن. هەرچەوا بیت، ئەڤ ئێکبوونە و پێگڤەبوونە د ناڤبەرا مە دا ژبەر هندێ نینە کو هەمی ئەندامێن کەنیسەیێ کوردن، یان ژی ئەو هەمی پشتەڤانیا ئێك حزبێ دکەن. نەخێر، ئەو ژ بەر هندێ یە کو ئەم هەمی ل گەل مەسیحی ئێکین. د ئەڤێ ئاهەنگگێرانا کریسمسێ دا، پەسنا خودێ بکە کو عیسای دیوارێ جداکرنێ یێ دوژمناهیێ هەلوشاندیە و کەنیسە دامەزراندیە داکو حەزژێکرنا خۆ بۆ جیهانێ نیشان بدەت.
پرسیار ژ بۆ رەنگڤەدان و رامانێ.
ئەڤێ کرسیمسێ، چەوا بشێین حەز ژ باوەردارێن دی بکەین و ل سەر جیاوازیێن خۆ سەربکەڤین داکو هێزا مەسیحی بەرچاڤ بکەن ب رێکا ئیکبوونا خۆ؟
نڤێژ
ئەی خودایێ پیرۆز، سوپاس و مەزناهی بۆ ناڤێ تە یێ پیرۆز بیت، ئەم سوپاسیا تە دکەین ژ بۆ خوینا کورێ تە یا بهاگران کو رێکا ئاشتبوونێ(پێکهاتنێ) د ناڤبەرا مە دا دروست دکەت. هاریکاریا مە بکە فەرمانێن تە بجهـ بینین و ب ئاشتی بژین. هاریکاریا کەنیسەیان بکە کو د ئێکبوونێ دا بژین، ب تایبەتی کەنیسەیێن کوردی. بلا چ تشت د ئەڤێ جیهانێ دا ئاشتیا وان تێك نەدەت و ئەوان ژ ئێك جودا نەکەت. بلا کەنیسە د پاقژ و پیرۆز بن و خزمەتا مەسیحی ل گۆر پەیڤێن تە بکەن. ب ناڤێ عیسایێ مەسیح، ئامین.
