رۆژا شازدێ
میراتێ قورتالبوویان د مەسیحی دا

گالاتیا ٤: ٤-٧

٤ لێ گاڤا دەمێ دەستنیشانكری هاتی، خودێ كوڕێ خۆ هنارت، ئەو ژ ژنەكێ ژ دایك بوو و ل بن دەستهەلاتا دەستووری ژ دایك بوو، ٥ داكو مە، ئەوێن ل بن دەستهەلاتا دەستووری، رزگار كەت و خودێ مە بكەتە كوڕێن خۆ. ٦  ژ بەر كو هوین كوڕێن وینە، خودێ گیانێ كوڕێ خۆ هنارتە د ناڤ دلێ مە دا، كو گازی خودێ دكەت: «ئابا! بابۆ!». ٧ ئەڤجا ئێدی تۆ نە بەنی، لێ تۆ كوڕی و مادەم تۆ كوڕی، خودێ تۆ كریە میراتگر ژی.

خواندنا ئەڤرۆکە یا پەرتووکا پیرۆز: گالاتیا ٣: ٢٦ هەتا ٤: ٧

ئەرێ کەسەك دشێت ببیتە میراتگرێ خودێ؟ د ئێکەم دیتن دا، ئەڤ هزرە وەکو خەونەکا مەحال دیار دکەت. خودێ گیانە و جیهان هەمی یا وییە. ئەرێ چەوا کەسەك دشێت میرات ژ وی وەرگرێ؟ زێدەرباری وێ چەندێ ژی، پڕانیا جاران میراتگرەك میراتی وەرناگریت هەتا باب دمریت. چەوا خودێ دشێت بمریت؟ ژبەر ئەڤان ئەگەران، یا ئاشکرایە کو پاولوس د گالاتیا ٤: ٧ دا دنڤێسیت: “ئەڤجا ئێدی تۆ نە بەنی، لێ تۆ كوڕی و مادەم تۆ كوڕی، خودێ تۆ كریە میراتگر ژی.”

هەرچەوا بیت، ئەڤ راستیە، کو گەلێ خودێ هەلبژارتی و میراتگرێن وینە، د سەردەمێ پاولوسی دا تشتەکێ نوی یان تازە نەبوو، بەلێ ئەڤ بنەمایە ل سەر سۆزێن پەیمانا کەڤن هاتبوو دانان. پاولوس دەربارەی ئەڤان سۆزان گەلەك یێ زانیار بوو. د گالاتیا ٣: ٢٩ دا هاتیە نڤێسین، “ئەڤجا ئەگەر هوین یێن مەسیحی بن، هۆسا هوین دویندەها ئیبراهیمینە و ل گۆر سۆزێ میراتگرن.” ل ڤێرێ، ئەرێ پاولوس ئاماژەیێ ب کیژ سۆز ددەت؟ ئەو د دەستپێکرن ١٢: ٧ دا بەحسێ ئەڤێ سۆزێ دکەت: “یەزدان بۆ ئەبرامی دیار بوو و گۆتێ: «ئەز دێ ڤی ئەردی دەمە دویندەها تە.»” لەوما، د ناڤا هەمی گەل و ئیمبراتوریەتێن ئەردی دا، خودێ ئیبراهیم و دویندەها وی هەلبژارتن کو ببنە گەلێ وی و ئەردێ بەرەکەتدار ب میرات وەربگرن.

پاشی، دەمێ خودێ دویندەها ئیبراهیمی ژ قەیدێن فیرعەونی ل مسرێ قورتال کرین، خودێ بۆ فیرعەونی بنیاتێ گەلێ خۆ روهن و ئاشکرا کر: “ئیسرائیل کوڕێ من یێ نەخریە” (دەرکەفتن ٤: ٢٢). پشتی خودێ گەلێ ئیسرائیلێ دەرئێخستی، وی ئەو برنە چیایێ سینا داکو پەیمانا خۆ ل گەل وان نوی بکەت، و ئەو ژی ل سەر مەرجێن پەیمانێ رازی بوون (ئانکو فەرمانێن تەوراتێ). دەمێ پشتی هینگێ پێغەمبەران بەحس ل ئەڤان تشتان کری، ئەوان ب شێوەیێ بابینی و کوڕینیێ ئەو وەسف دکرن. بۆ نموونە د هۆشێیەع ١١: ١ دا، خودێ دبێژیت، “دەمێ ئیسرائیل هێشتا زارۆك، من حەز ژێ کر، و ژ مسرێ من گازی کوڕێ خۆ کر.” ب ئەڤی رەنگی، خودێ گەلێ خۆ وەکو زارۆکەکێ خۆشتڤی هێژا ددیت.

گەلەك یا گرنگە ل ڤێرێ ئاماژەیێ ب وێ چەندێ بدەین کو خودێ گەلێ ئیسرائیلێ ژ مسرێ ئینا دەر و کرنە یێن خۆ بەری ئەو فەرمانێن تەوراتێ بدەتێ. پێگری ب یاسایێن تەوراتێ رێکەك نەبوو کو ببنە خێزانا خودێ، بەلێ بەرسڤەکا سوپاسداریێ بوو بۆ ئەڤی خودایێ کو ب دلوڤانی پێشوازی ل دویندەها ئیبراهیمی وەکو یێن خۆ کر. هەرچەوا بیت، ژبەر خیانەت و گونەهێن ئیسرائیلیان، ئەو ژ خودێ دویر کەفتن ونە دئامادە بوون میراتگریا خودێ وەربگرن. لەوما پەولسی فێر دکەت کو تەورات وەکو ماموستایەك یان ژی پارێزەرەکی بوو بۆ گەلێ ئیسرائیلێ هەتا دەمێ دەستنیشان کری ژ لایێ بابیڤە.

چەوا بشێین ئەڤێ رەوشێ ب رێکا نموونەیەکێ شروڤە بکەین؟ هەروەکو یاریکەرەکێ تەپانێ یێ کو ئەندامێ تیمەکێ یە بەلێ بەشداریێ د یاریێن تیمێ دا نەکەت. ئەڤ کەسە ئەندامەکە و ناڤێ وی د لیستا تیمێ دا هاتیە نڤێسین، بەلێ د راستی دا، رەوشا وی وەکو یا تەماشەڤانانە، یێ روینشتیە و تەماشەی یاریان دکەت. ب ئەڤێ رێكێ، لڤینێن وان وەکو یێن نەلڤان بوون، دێ بەردوام بوون ل ئێسیرێ دە ژبەر نەزانینا وان ب خودێ (گالاتیا ٤: ١-٣). بەلێ پێغەمبەر ب هیڤی بوون کو رۆژەکێ خودان دێ گەلێ خۆ پیرۆز و پاقژ کەتن داکو ئەو بشێن میراتێ بابێ خۆ وەربگرن (حزقیێل ٣٦: ٢٤-٢٨؛ یەرمیا ٣١: ٣١-٣٤).

بەلێ ئەڤە چ میراتە یێ کو گەلێ ئیسرائیلێ ژ خودێ وەردگرن؟ ل گۆر سۆزێن خودێ، ئێکەم میرات ئەردێ کەنعانێ بوو (دەستپێکرن ١٢: ٧ و ١٧: ٨؛ دەرکەفتن ٦: ٤). هەرچەوا بیت، چنکو گەلێ ئیسرائیلێ بەردەوام نەگوهداری دکر و پێگری ب فەرمانێن تەوراتێ نە دکر، وەکو کوڕەکێ بابێ خۆ شەرمزار دکەت، ئەوان ئەردێ خۆ ژدەست دا. ل ساڵا ٥٨٦ێ بەری زایینی، ئەردێ پیرۆز ل ژێر دەستهەڵاتا ئیمبراتوریەتێن جیهانێ بوو. ل گەل ئەڤێ چەندێ، پێغەمبەرێن ئیسرائیلێ چاڤەرێی وێ رۆژێ بوون دەمێ خودێ گەلێ خۆ یێ خۆشتڤی ڤەگەرینتەڤە ئەردێ سۆزپێدای. هەروەسا ئەوان پێشبینی دکر خودێ دا ئەردێ هەمیێ وەکو میرات پێشکێشی گەلێ خۆ کەت (زەبوور ٢: ٨؛ دانیێل ٧: ٢٧). ل ئەوێ رۆژێ، مللەتێن جیهانێ دێ باوەریێ ب خودێ ئینن و ئەو دێ ل گەل گەلێ ئیسرائیلێ بەرەکەتدار بن (میخا ٤: ١-٢).

هەرچەوا بیت، بجهـئینانا ئەڤان پێغەمبەرایەتیان گرێدای هاتنا مەسیحی بوو. ب ئەڤێ رێکێ، د دل و زێنێ گەلێ ئیسرائیلێ دا، رۆژا ژدایکبوونا مەسیحی “دەمێ تەمام” بوو دەمێ خودێ دا هەمی سۆزێن خۆ بجهـ ئینیت. لەوما پاولوس دنڤێسیت: “لێ گاڤا دەمێ دەستنیشانكری هاتی، خودێ كوڕێ خۆ هنارت، ئەو ژ ژنەكێ ژ دایك بوو و ل بن دەستهەلاتا دەستووری ژ دایك بوو، داكو مە، ئەوێن ل بن دەستهەلاتا دەستووری، رزگار كەت و خودێ مە بكەتە كوڕێن خۆ” (گالاتیا ٤: ٤-٥). نوکە ژی ئارمانجا پاولوسی بۆ مە یا ئاشکرایە. پاولوس ژبەر ژدایکبوونا عیسایێ مەسیح گەلەك یێ دلشاد بوو، چنکو ب رێکا ژدایکبوونا وی، خودێ گەلێ خۆ کرە میراتگرێن خۆ.

ئەرێ ئەم دەربارەی خۆ ئەوێن نەجوهی چ بێژین؟ ئەرێ پێدڤیە ئەم ژی ب هاتنا “تەمامبوونا دەمی” و ژدایکبوونا مەسیحێ ئیسرائیلێ شاد ببین؟ بێگومان، پێدڤیە ئەم دلشاد ببین. بوچێ؟ چنکو “تەمامبوونا دەمی” بتنێ بۆ جوهیان نەبوو، بەلکو ئەو مزگینی و پەیامەکا مەزن بۆ هەمی مللەتان بوو. عیسا بۆ جوهیان بتنێ نەهاتیە، بەلێ وەکو مروڤەك بۆ هەمی خەلکی، داکو مە بینیتە د ناڤا خێزانا خودێ دا (فیلیپی ٢: ٦-١١). ئەرێ هیچ پەیامەك د دیرۆکا جیهانێ هەمیێ دا هەیە کو پتر ژ ئەڤێ پەیامێ خودان حەزژێکرن بیت؟ نەخێر، تۆ نابینی. خودانی ئەڤ حەزژێکرنا هوسا مەزن ب رێکا هنارتنا کوڕێ خۆێی راستدار داکو مە دوژمنێن وی قورتال بکەت، نیشا مە دا.  ئەوی خۆ ل جهێ مە دانا داکو ئەم بچن بەژداری خێزانێ ببەن.

ژبەر کارێ عیسایێ مەسیح، پاولوس دشێت بێژیتە گالاتیان: “هوین خێزانا خودێ نە” (گالاتیا ٤: ٦). لەوما چ جوداهی د ناڤبەرا رەوشا یێ جوهی و نەجوهی دا نینە چنکو هەمی د ئێکبوونا ل گەل مەسیحی دا ئێكن (گالاتیا ٣: ٢٨). هەردووك یێن بووینە خێزان و میراتگرێن خودێ. ئەڤ میراتگریە ئەردێ و پاشایەتیا هەروهەر بخۆڤە دگریت (ئاشکراکرن ٥: ١٠)، بەلێ ژ ئەڤێ چەندێ ژی پترە. پاولوس فێر دکەت کو هەرکەسێ باوەری ب مەسیحی هەبیت گیانێ مەسیحی وەردگریت (گالاتیا ٤: ٦). لێ بەرهەمێ گیانێ پیرۆز ئەڤەیە: “حەزژێكرن، دلخۆشی، ئاشتی، بێهنفرەهی، جوامێری، چاكی، دلسۆزی، دلنەرمی و لخۆزاڵبوون” (گالاتیا ٥: ٢٢-٢٣). لەوما ئەڤ تشتە هەمی بووینە میراتێ مە.

ل دویماهیکێ، دا ل پرسیارا خۆ یا دەستپێکێ بزڤرین: ئەرێ کەسەك دشێت ببیتە میراتگرێ خودێ؟ ب شیانێن خۆ، چ کەس نەشێت ببتە میراتگرێ خودێ، بەلێ بەری دوو هزار ساڵان، میراتگرێ خودێ (ئانکو مەسیح) بوو مروڤ و ب رێکا ژیان و مرن و رابوونا وی، ئەم مروڤ ژی دشێین ب رێکا مەسیحی ببینە میراتگرێن خودێ. دا سوپاسیا خودێ بکەین کو ل ئەوێ رۆژێ ل باژارۆکەکێ بچویكێ بێت لەحمێ، “تەمامبوونا دەمی” بۆ ئیسرائیل و هەمی مللەتێن ئەڤێ جیهانێ ب رێکا باوەریا ب مەسیحی هات، ئەو دا میراتێ خودێ وەرگرن.

پرسیار ژ بۆ رەنگڤەدان و رامانێ

ئەرێ هەستێ تە چیە دەمێ دزانی تۆ ئێك ژ میراتگرێن خودێی؟ ئەرێ ئەڤ راستیە چەوا نێرینا تە دگوهریت؟

نڤێژ

بابێ مە یێ ل ئەسمانان، ئەم سوپاسیا تە دکەین کو تە ئەم کرینە میرات و میراتگرێن خۆ. بێگۆمان، ئەم ژ هەژی ئەڤی جهی نەبووین، بەلێ ئەم سوپاسدارین کو مەسیحی ئەم ب روومەت و بەها گران کرن. هیڤی دکەین نیشا مە بدە کا چەوا وەکو میراتگرێن راستەقین خزمەتا پاشایەتیا تە بکەین. ئەم داخوازێ دکەین کو خێزانا تە د ناڤا هەمی مللەتان دا گەشێ بکەت، ب تایبەتی ل هەرێما کوردستانێ. گیانێ خۆ پێشکێشی وی بکە یێ ل تە دگەریێت، داکو ئەو ببنە میراتگرێن هەروهەرێن پاشایەتیێ. ب ناڤێ مەسیحێ مە یێ مەزن، ئامین.