رۆژا پازدێ
شادی و کەیفخۆشیا مە ب مەسیحی
مەتتا ٢: ١٠-١١
١٠ دەمێ وان ستێر دیتی، كەیفخۆشیەكا گەلەك مەزن بۆ وان چێبوو. ١١ دەمێ ب ژۆر كەفتینە مالێ، وان زاڕۆك ل گەل مەریەما دایكا وی دیت. ئینا چوك ڤەدان و سوجدە بۆ وی بر. پاشی سندوقێن خۆ ڤەكرن و خەلاتێن زێڕی و بخویر و موڕ پێشكێشی وی كرن.
خواندنا ئەڤرۆکە یا پەرتووکا پیرۆز: مەتتا ٢: ١-١٢
دەمێ ئەم چیرۆکا ژدایکبوونا عیسای دخوینین، بیرا مە دهێت کو خودێ سۆزێن خۆ بجهـ ئینان و عیسا وەکو سۆزا خودێ گۆتی ژ دایك بوو. ئەو ب رێکا ئێکبوونا زەلامەك و ئافرەتەکێ ژ دایك نەبوو، بەلێ ئەو ژ پاکیزەکێ ژ دایك بوو داکو ئەو هەلگرێ گونەها میراتگر نەبیت، چنکو پێدڤیە بارخێ قوربانیێ یێ بێکێماسی بیت. عیسا یێ بێکێماسی بوو، بێگونەهـ بوو.
دەمێ ئەم مزگینیێ دخوینین، ئەم زارۆکەکێ نوی ژدایكبووی ل گەل دەیکا وی و هندەك زەڵامێن ئاقلمەند دبینین یێن کو دبیت ژ مللەتێ کورد بوون و ستێرناس بوون، یێن ژ رۆژهەلاتێ بۆ دویراتیەکا درێژ گەشت کری داکو ل پاشایێ ژ نوی ژدایكبووی، قورتالکەرێ جیهانێ بگەریێن. دەمێ ئەو زارۆکی دبینن، ئەو گەلەك کەیفخۆش و شاد دبن و خەلاتێن بهاگران ژ سندوقێن خۆ پێشکێش دکەن و پەرستنا وی دکەن، کو نیشانا پاشایەتیا عیسایە. پاشی، ئەو ب رێکەکا نوی ڤەدگەریێنە مال.
خویشك و برایان، ئەرێ هەوە دلخۆشی و شادیا راستەقینە وەکو موغان دیتی دیتیە؟ یان ژی هوین هێشتا د گەشتا خۆ دانە، لێ دگەریێن هەتا دبینن؟ ئەرێ هەوە دڤێت وەکو ئاقلمەندان کەیفخۆش و شاد ببن؟ داخواز بکەن، و دێ بۆ هەوە هێتە دان؛ لێ بگەریێن، و هوین دێ بینن، چنکو مەسیح دوهی و ئەڤرۆکە و هەتاهەتا وەکو ئێکە. بەری چەند ساڵەکان، من هەڤالەك هەبوو گەلەك جاران گازندە دکرن کو نەیێ کەیفخۆشە نە ژی یێ دلشادە. ئەڤجا ئەوی بریار دا کوردستانێ بجهـ بهێلیت و ل کەنەدا بژیت، ب هیڤیا دیتنا خۆشی و شادیێ. بەلێ پشتی دەمەکێ درێژ، من پەیوەندی پێ کر دەمێ ئەو هێشتا ل کەنەدا، من پرسیار ژێ کر ئەگەر یێ کەیفخۆش و دلشادە. بەرسڤا وی ئەڤە بوو، “بەداخەوە، نەخێر.” ئەم گەهشتینە ئەوێ باوەریێ کو کەیفخۆشی و دلشادی پێدڤی ب گوهورینا جهی نینە بەلکو ب گوهورینا دلی و بریارێ. پێدڤیە ئەم بریارێ بدەین و دلێن خۆ بەرەڤ عیسایڤە بداین داکو وەکو موغان دلخۆشی و دلشادیێ ببینین. هەروەسا پێدڤیە ئەم رێکەکا نوی ژی بهەلبژێرین، یا کو رێکا راستیێ و ژیانێیە.
هەروەسا، دلخۆشیێ د رێکا خودێ دا ببینین. پەرتووکا پیرۆز د زەبوور ٣٧: ٤ دبێژیتە مە: “خۆشیێ ژ خودانی وەرگرە، ئەو دێ داخوازیێن دلێ تە دەتە تە.” د ئەڤێ ساڵا نوی دا، خەلك پاشایێ ژ نوی ژدایکبووی، قورتالکەرێ جیهانێ، میرێ ئاشتیێ، بابێ هەروهەر دبینن. چ ئەڤە چەند ساڵە تۆ لێ دگەریێی یان ژی تە ژ نوی گوهـ لێ بوو؛ چ ژ رۆژهەلاتی یان باکوری یان باشوری هات بی، پێگڤە دلخۆش ببن چنکو پاشایێ مەزن ل گەل مەیە و ئەرکێ خۆ ب مە سپارتیە.
ئەرێ تۆ پێشبینیا دیتنا پاشایەکێ دی یان زارۆکەکێ راپێچای دکەی؟ ئەم گەلەك دکەیفخۆشین کو ئەم یێن ل ڤێرێ و رۆناهیێ وی وا ل مە کر د ئەڤێ جیهانا تاری دا داکو ئەم بشێین پەرستنا عیسای ب دلشادی و دلخۆشی بکەین و ببینە شاگردێن وی و شادیێ رابگەهینین. دەمێ ئەم ب دروستاهی عیسای دبینین، ئەم پێشبینیا دوو تشتان دکەین: شادی و پەرستنا ب دلخۆشی.
دەمێ ئەم ب دروستاهی دهێینە نك مەسیحی بۆ پەرستنێ، پێدڤیە ئەم د ئامادە بین کو دەمێ خۆ و گەنجینەیا خۆ و خۆ ب خۆ ژی پێشکێش بکەین. پاشی خودێ داخوازا خۆ بۆ مە ئاشکرا دکەت و مە بۆ مەزناهیا ناڤێ خۆ بکار دئینیت، هەروەسا ئەم ژی دلشاد و دلخۆش دبین چنکو شادی و خۆشیا راستەقینە ب گەهشتنا مەسیحی دهێنە دیتن. دیتنا شادیێ د ژیانا مە دا دەربارەی ڤەدیتن و بجهـئینانا حەزا خودێ یە. حەزا خودێ ب رێکا عیسای دهێتە بدەستڤەئینان. ئەڤان مروڤان عیسا دیت چنکو ئەو لێ دگەریان.
ژدایکبوونا عیسای بیرا مە دئینیت کو پێدڤیە ئەم بۆ ژیانا خۆ ل حەزا خودێ بگەریێین، ئەگەر مە بڤێت شادیێ د ژیانێ دا تاقی بکەین، بزانە کو ئەو ژ دیتن و پەرستنا عیسای دەردکەڤێت. هەمی دەمان باوەری و بریار و هیڤی بەرێ مروڤی ددەنە حەزا خودێ، هەروەسا حەزا وی شادی و خۆشیا مەیە.
خۆشتڤیان، داکو عیسای ببینن، پێدڤی ناکەت سەدەها کیلومەتران ببرن؛ بتنێ دەرگەهێ دلێ خۆ ڤەکە و یێ ئامادە بە بۆ بخێرهاتنا وی، و ئەو دێ هێتە نك تە. ئەڤجا دا پێگڤە پەرستنا عیسای ب شادی و خۆشی بکەین و دلشاد ببین. خویشك و برایێن هێژا، ئەرێ هەوە خۆ ئامادە کریە؟ ئەرێ هوین دئامادەنە دەمێ خۆ پێشکێشی عیسای بکەن داکو شادیێ و خۆشیێ بدەستڤە بینن؟
پرسیار ژ بۆ رەنگڤەدان و رامانێ.
د ئەڤی وەرزێ بیرئینانا ژدایکبوونا عیسایێ مەسیح دا، چەوا هوین دشێن مەسیحی ب شادی و خۆشی بپەرێسن و نێزیکی وی ببەن؟
نڤێژ
ئەی خودان، ئەم سوپاسیا تە دکەین ژ بۆ کارێن تە یێن مەزن، ژ بۆ وێ حەزژێکرنا کو ژ تێگەهشتنا مە زێدەترە. ئەی ئافرێنەرێ پیرۆز، مە دڤێت شادی و خۆشیا هەروهەر تاقی بکەین، ژبەر کو سۆزا تە هاتنا شادی و خۆشی و قورتالکرنێیە بۆ مروڤایەتیێ. رێبەریا مە بکە داکو تە ببینین. هێز و ئاقلمەندیێ ب مە ببەخشە داکو تێگەهشتنا مە کویرتر بچێت. دلەکێ نەرم بدە مە داکو بتر خۆشیێ ب تە ببەین و تە بتر بنیاسین. ب ناڤێ عیسایێ مەسیح، ئامین.
