رۆژا یازدێ
هیڤیا بەرەکەتدار

تیتۆس ٢: ١١-١٣

١١ چنكو كەرەما خودێ، ئەوا قورتالبوونێ بۆ هەمی مرۆڤان دئینیت، یا دیار بووی. ١٢ ئەو كەرەم مە پەروەردە دكەت كو خودێنەنیاسیێ و حەزێن ڤێ جیهانێ رەت بكەین و ب ئاقلداری و راستداری و خودێترسیێ د ڤی سەردەمی دا بژین، ١٣ و چاڤەڕێی وێ رۆژا بەختەوەر بین یا ئەم ل هیڤیێ، كو دیاربوونا روومەتا خودایێ مەزن، قورتالكەرێ مە عیسایێ مەسیحە.

خواندنا ئەڤرۆکە یا پەرتووکا پیرۆز: تیتۆس ٢

ئەرێ هەستێ تە چیە دەمێ تۆ دەربارەی چاڤەرێکرنێ دئاخڤی؟ ئەرێ جارەکێ تو نە ناچار بویی کو چاڤەرێی تشتەکی یان کەسەکی بیت؟ دەمێ ئەز قوتابی ل بەشێ هونەری، پێدڤی بوو من وێنەکێ گەلەك مەزن ب پێنوسەکی کێشابا. نێزیکی هەیڤەکێ دەربازبوو هەتا من وێنە بدویماهیك ئینای، و هەرۆژ دا چمە دەڤ وێنەی و ئەرکێ وێ رۆژێ جێبەجێ کەم، یێ نیگەران بووم کا دێ کەنگی وێنە بدویماهیك هێت. ئەرێ تۆ هزر دکەی وێنە چەوا دەرکەفت؟ وەکو رۆژ دەرباز دبووین، ئەز پتر بهێنتەنگ و واسواسی دبووم، چنکو چاڤەرێکرن گەلەك یا ب زەحمەت بوو. بەلێ یاکو ئەز هەندایم هەرۆژ بەردوام بم و کار ل سەر بکەم ئەو هیڤیە بوو کا دێ ل دویماهیکێ وێنە چەوا دەرکەڤیت.

ئەرێ چێبوویە جارەکێ ژبەر چاڤەرێبوونێ تۆ بهێنتەنگ و تورە ببی؟ بەلێ، چاڤەرێکرن یا نەخۆشە، و گەلەك جاران ئەگەر مە هەلبژارتن هەبیت، ئەم هەلدبژێرین کو چاڤەرێیێ نەکەین. بەلێ یاکو رێکێ ب مە ددەت چاڤەرێ بکەین هیڤیە. هەرچەوا بیت، ئەرێ چەند جاران د ژیانا خۆ تە هیڤی بۆ تشتەکی هەبوویە و پاشی دیار نەمایە یان ژی بێ رامان بوویە؟

گەلێ بەرەکەتدارێ خودێ هزارەها ساڵان چاڤەرێی هاتنا قورتالکەرێ خۆ بوون، گەلەك جاران بێهیڤی بوون، بەلێ ل دویماهیکێ، قورتالکەر هات، مەسیح ژدایك بوو. ئایەت بەحسێ ئەڤێ چەندێ دکەت و دبێژیت: “چنكو كەرەما خودێ، ئەوا قورتالبوونێ بۆ هەمی مرۆڤان دئینیت، یا دیار بووی.” چ دیار بوو؟ کەرەما خود‌ێ. ئانکو، هاتنا عیسایێ مەسیح کەرەما خودێ یە بۆ مە. خودێ ب رێکا ئەڤێ کەرەمێ چارەسەری بۆ گونەهێن مە و ئازارکێشانا مروڤی پێشکێش کر. چەوا؟ ب رێکا ژیان و مرن و قوربانی و رابوونا مەسیحی ژ گۆرێ داکو ببیتە کەفەرەت بۆ گونەهێن مە. ئەم ب رێکا باوەریا خۆ ب ئەڤێ راستیێ نوکە یێن هاتینە قورتالکرن و ئاشتکرن ل گەل خودێ. ئەڤ قورتالکرنە بێی جیاوازی بۆ هەمی مروڤانە.

نوکە، ل گەل هاتنا عیسایێ مەسیح بەری ٢٠٠٠ ساڵان، ئەم خودان ژیانەکا نوی نە. بەلێ ئەم دزانین کو ئەم هێشتا یێن د جیهانەکا شکەستی و لەشەکێ شکەستی دا، ئەڤجا ئەم ب مەرەق چاڤەرێی ڤەگەریانا مەسیحینە. د ئەڤێ نامەیا بۆ تیتۆسی دا، پاولۆس شیرەتان ل کەنیسەیێ دکەت سەبارەت پێدڤیە ئەم چەوا بژین د ماوێ ئەڤێ چاڤەرێبوونێ دا، شیرەتان ل مە دکەت کو ب وێ رێکێ بژین یاکو پشتبەستنێ ب حەز و شەهواتێن جیهانێ ناکەت. ئانکو پێدڤیە ئەم ب رێکەکێ بژین یاکو هەبوونا خودێ رەت ناکەت، بەلێ ل شوینێ هەردەم خودێ ل بیر بینین و بهێلین ژیانا مە رەنگـڤەدانا ئەوێ راستیێ بیت. هەروەسا پێدڤیە ئەم پشتا خۆ ب حەزێن جیهانێ گەرم نەکەین، ئەو حەزێن دڤێت مە ب زنجیرێن خۆڤە گرێ بدەن. بەلێ بخۆشحالیڤە، ئەم نوکە ب رێکا مەسیحی یێن ژ وان ئازاد بووین.

نوکە ژی ب رێکا مەسیحی، د پێشبینیا هیڤیا بەرەکەتدار دا، ئەم دشێین ب رێکەکێ بژین یاکو ئەم ب ئاقلمەندی و راستداری و خودێترسیێ چاڤەرێ بکەین.  ئەم دزانین کو ب رێکا سروشتێ مەیێ شکەستی، ئەڤە ئەرکەکێ مەحالە، بەلێ ئەم تێدگەهین ب رێکا مەسیحی، ئەم دشێین ئەڤێ ژیانا نوی ب رێکا هاریکاریا گیانێ پیرۆز و کەرەما مەسیحی بژین. هەمی پێداویستیێن ئەم د ئەڤێ ژیانا نوی دا پێدڤی بۆ مە هاتینە دابینکرن.  ئەڤەیە هیڤیا مە یا دروست یاکو بەرێ مە ددەتە ژیانا مە یا نوی، لەوما ئەم ب ئەڤێ هیڤیێ ل پێشبینیا خودا دژین.

کا چەوا گەلێ پیرۆزێ خودێ، پشتی چاڤەرێبوونا دەمەکێ درێژ، مەزناهیا خودێ د ئێکەم هاتنا مەسیحی دا دیت، ئەم ژی دێ مسۆگەر مەزناهیا خودێ د دووەمین هاتنا مەسیحی دا پشتی چاڤەرێبوونەکا مەزن بینین. بێگومان دێ ئەو رۆژە هێت. لەوما، پێدڤیە ئەم باوەردار ب رێکەکێ بژین کو ئەڤ راستیە د هەر چرکەیەکا ژیانا مە دا رەنگڤە دەت. بلا ئەم ب راستداری و ئاقلمەندی و چاڤەرێکرن بژین. بلا ئەم، ب چاڤەرێکرن و دلەکێ پری هیڤی، پەسنا خودێ بکەین.

پرسیار ژ بۆ رەنگڤەدان و رامانێ.

ئەرێ چەوا دێ شێی داخوازێ ژ خودێ کەی تە ژ حەزێن جیهانێ دویر بئێخیت و ب ئاقلمەندی و راستداری بۆ وی بژی؟

نڤێژ

بابێ مە یێ ل ئەسمانان، ئەز سوپاسیا تە دکەم و پەسنا تە دکەم ژ بۆ بەرکەتێن تە یێن مەزن یێن کو قورتالکرن پێشکێشی هەمی مروڤان ب رێکا هنارتنا عیسایێ مەسیح کری. ئەم یێن ژ قەیدێن گونەهێ قورتال بووین. بابێ گیانی، ئەز سوپاسیا تە دکەم کو ئەڤ ژیانە دویماهیکا رێکێ نینە بەلکو تە هیڤیا ژیانا هەروهەر پێشکێشی مە کریە. بابێ پیرۆز، بلا ئەز پشتبەستنێ ل سەر زانین و حەزێن جیهانێ نەکەم.  ل گونەهێن من ببورە و هاریکاریا من بکە چاڤێن من لسەر عیسایێ مەسیح بن و ب دلسۆزی و راستی و رێزداری بۆ وی بژین.  خودانێ من، د دەمێن ئەز یێ بێهیڤیبم و رەوشێت زەحمت دا هاریکاریا من بکە، داکو هەردەم ل بیرا من بیت کو هیڤیا من یا دروست عیسایێ مەسیحە. هاریکاریا من بکە ب هیڤی و هاندان چاڤەرێیی هاتنا قورتالکەرێ خۆ بم. ب ناڤێ عیسایێ مەسیح، هیڤیا مە یا بەرەکەتدار، ئامین.