رۆژا دەهێ
حەزژێکرن د ناڤبەرا باوەرداران دا

یوحەننا ١٣: ٣٤-٣٥

٣٤ ئەز دێ فەرمانەكا نوی ل هەوە كەم: حەز ژ ئێكودوو بكەن. هەروەكو من حەز ژ هەوە كری، دڤێت هوین ژی حەز ژ ئێكودوو بكەن. ٣٥ ب ڤێ چەندێ هەمی دێ زانن كو هوین شاگردێن منن: ئەگەر هوین حەز ژ ئێكودوو بكەن.

خواندنا ئەڤرۆکە یا پەرتووکا پیرۆز: یوحەننا ١٣: ٣١-٣٥

حەز ژ ئێکودوو بکەن. ئەڤ فەرمانە ب ئاشکرایی ب تایبەتی د ناڤبەرا باوەرداران دا هاتیە ئاراستەکرن. بەلێ ئەرێ ب دروستاهی رامانا وێ چیە کو حەز ژ ئێکودوو بکەین؟ هزرا ئەوان کەسێن تۆ د ژیانا خۆ دا حەز ژێ دکەی بکە. بوچی تۆ حەز ژ ئەوان دکەی؟ ئەرێ ژبەر هندێیە کو ئەو ب دلسۆزی و حەزژێکرن رەفتارێ ل گەل تە دکەن؟ یان ژی ژبەر هندێیە کو ئەو پالپشتیا تە دکەن و هاندانا کریارێن تە دکەن؟ ئەرێ تۆ هەردەم هیڤیان دخوازی ئەو دێ گەلەك تشتان بۆ تە ل پاشەرۆژێ ئەنجام دەن؟ دەمێ ئەم خزمەتا تە دکەن، ئەرێ تۆ پتر حەز ژ وان دکەی؟ ئەڤەیە ئەو جۆرێ حەزژێکرنا ئەم د ئەڤێ جیهانێ دا دبینین.

بەلێ عیسا فەرمانا خۆ روهن دکەت دەمێ دبێژیت: “هەروەكو من حەز ژ هەوە كری، دڤێت هوین ژی حەز ژ ئێكودوو بكەن.” داکو تێبگەهین چەوا حەز ژ ئێکودوو بکەین، پێدڤیە ئەم ل سەردەمێ مەسیحی بنێرین و تێبگەهین مەسیحی چەوا حەز ژ شاگردێن خۆ دکر.

بەری مەسیح ئەوێ فەرمانێ بدەتە وان، رۆژەکێ ئەوی حەزژێکرنا خۆ بۆ وان ب رێکا ئەنجامدانا تشتەکێ هەمی پێ گوهشین دیار کر. وێ رۆژێ، عیسای دەست ب شویشتنا پێن شاگردێن خۆ کر! ل بیرا تە بیت، ئەو زەلامێ ئەوان دگۆتێ “مەزن” و “ماموستا” داخواز ژ وان نەکر پێن وی بشون، بەلێ وی ب خۆ پێن وان وەکو خزمەتکارەکی شویشتن. بینە پێش چاڤێن خۆ سەرۆکێ وەڵاتەکی بهێتە مالا تە، ئاڤێ بکەتە ئامانەکی، و دەست ب شویشتنا پێن تە بکەت، ئەرێ دا هەستێ تە چ بیت؟ ئەرێ تە شەرم نەدکر چنکو کەسەکێ خودان بەرزترین پلە خۆ کێم کر داکو پێن تە بشوت؟

بەلێ پا ئەگەر ئەو کەسە عیسایێ مەسیح بیت؟ ئەوێ کو دبێژنێ کورێ خودێ و ژ هەژی هەمی خزمەتێ، بوچی بریار دا ببیتە خزمەتکارێ شاگردێن خۆ؟ ئەڤە نە ئەو جورێ حەزژێکرنێیە یاکو ئەم د ئەڤێ جیهانێ دا دبینین.

شاگردێن عیسای چ تشت نەبوو بەرامبەر وێ خزمەت و حەزژێکرنا مەسیحی دایە وان پێشکێش بکەن. یوحەننا ١٣ ب ئاشکرایی نیشا مە ددەت کو سەرەرای زانینا د رۆژێن بهێن دا پەتروس دا وی رەت کەت و یەهودا دا مەسیحی بۆ پاران فروشیت، ئەوی هێشتا حەز ژ وان دکر و خزمەتا وان دکر.

نوکە پرسیار ژ خۆ بکە، ئەگەر تۆ بزانی کو ئێك ژ ئەندامێن کەنیسەیا تە ئەڤ شەڤە دێ رەت کەت کو تە دنیاسیت، ئەرێ دا هێشتا حەز ژ وی کەی؟  ئەرێ ئەگەر تە زانیبا کو ئەڤ شەڤە ئەڤ کەسە دێ خیانەتێ ل تە کەت و تە فروشیتە دوژمنێن تە دا بهێیە کوشتن؟ ئەرێ تۆ دشیای هێشتا ژ هەمی دلێ خۆ حەز ژ وی کەسی بکەی و خزمەتا وی بکەی؟

مەسیح ب وێ رێکێ فەرمانێ ل مە دکەت کو دلخۆشیێ بخوازین، کو ئەم حەز ژ ئێكودوو بکەین. ئەڤ حەزژێکرنە ل سەر بنیاتێ بەرژەوەندیان نینە؛ تۆ پێشبینی ناکەی کا ئەو کەسێ دی ل بەرامبەر وێ حەزژێکرنێ تشتەکی دەتە تە، بەلێ تۆ بتنێ هزرا بەرژەوەندیا کەسێ دی دکەی، نەیا خۆ. بوچی تۆ ئەڤێ چەندێ دکەی؟ بێگۆمان ژ بۆ مەزناهیا مەسیحی.

بەلێ دا پرسیار ژ خۆ بکەین کا چەوا ئەم دشێین حەز ژ یێن دی بکەین ب وێ رێکا کو مەسیح داخوازێ ژ مە دکەت؟ عیسای ب ئەڤێ فەرمانێ دگۆت “نوی.” ئەو بۆ وان یاسایەکا نوی نەبوو؛ بەری نوکە ژی فەرمان ل وان هاتیەکرن، بەلێ ب رێکا مەسیحی، ئەوان هێزەکا نوی وەرگرت داکو ئەنجام بدەن.   بەری نوکە، یاسایا خودێ بتنێ ل سەر بەری دهاتە نڤێسین، بەلێ پشتی هاتنا مەسیحی، یاسایا خودێ ل سەر دلێن مە هاتە نڤێسین. پێدڤیە ئەم دانپێدانێ ب ئەوێ راستیێ بکەین کو ئەم نەشێین، ب هێزا خۆ، حەز ژ یێن دی بکەین وەکو مەسیحی حەز ژ مە کری. ئەو ب رێکا دەستهەڵات و هێزا گیانێ پیرۆز د مە دا بوو کو شیان دایە مە حەز ژ ئێکودوو بکەین ب وێ رێکا مەسیح داخواز ژ مە دکەت.

بەلێ ل ڤێرێ پرسیارەك دروست دبیت، چەوا ئەم هێزا گیانێ خودێ وەردگرین داکو ب ئەڤێ رێکێ حەز ژ ئێکودوو بکەین؟ خویشك و برایێن من، ئەڤەیە پەیاما وەرزێ ل بیرئینانا ژدایکبوونا خودێ؛ بابێ مەیێ ل ئەسمانان هند حەز ژ مە دکر کو کورێ خۆیێ ئێکانە هنارتە ئەردی داکو ب رێکا ژیانا وی یا تەمام و مرن و رابوونا وی، دا ئەو ب تەمامی دەینێ گونەهێن مە بدەت و مە ل گەل خودێ ئاشت بکەت.

ئەڤ حەزژێکرنا مەسیحی یا بێمەرج و بێوێنە ژێدەر و بنیاتێ حەزژێکرنا د ناڤبەرا باوەردارانە. هەتا ئەم حەزژێکرنا خودێ ب رێکا مەسیحی وەرنەگرین، ئەم نەشێین ب ئەڤێ رێکێ حەز ژ یێن دی بکەین. دەمێ ئەم حەزژێکرنا خودێ وەردگرین، یاکو ب رێکا مەسیحی بۆ مە هاتیە دیارکرن، ئەو نوی بووینە و گیانێ خودێ د مە دا ئاکنجی بوویە داکو ئەم د جیهانا نوکە دا ل گەل گیانێ پیرۆز بژین. ب رێکا هێزا گیانێ خودێ د مە دا، ئەم دشێین حەز ژ یێن دی بکەین ب هەمان جۆرێ حەزژێکرنا خودێ بۆ مە هەی.

پرسیار ژ بۆ رەنگڤەدان و رامانێ.

چەوا تۆ دشێی حەزژێکرنا مەسیحی بۆ باوەرداران هەی بگەهینە وان یێن کو نێزیکی تە؟

نڤێژ

ئەی خودایێ مەزن، ئەم سوپاسیا تە دکەین ژ بۆ ئەڤێ حەزژێکرنا کویر و مەزنا تە بۆ مە هەی، تە کورێ خۆیێ ئێکانە هنارتە ئەردی داکو ژ بۆ لێبورینا گونەهێن مە بمریت، زێدەباری نەژهەژیبوونا مە. ئەم سوپاسیا تە ژ بۆ حەزێکرنا مەزنا مەسیحی دکەین، یاکو بۆ ئەوان کەسانە ژی یێن دانپێدانێ پێ نەکەن و خیانەتێ دکەن. ئەم سوپاسیا تە دکەین کو ئەم ژی دشێین، ب رێکا هێزا گیانێ تە، ب هەمان رێك حەز ژ یێن دی بکەین. هاریکاریا مە بکە حەز ژ ئێکودوو بکەین داکو ئەوێن دەوروبەرێن مە بزانن ئەم گرێدای تەینە. ب ناڤێ مەسیحی، ئامین.