رۆژا نەهێ
حەزژێکرنا خودایی

یوحەننا ٣: ١٦-١٧

١٦ خودێ هۆسا حەز ژ جیهانێ كر، كو وی كوڕێ خۆ یێ ئێكانە دایێ، داكو هەر كەسێ باوەریێ پێ بینیت ژ ناڤ نەچیت، لێ ژیانا هەروهەر هەبیت. ١٧ خودێ كوڕێ خۆ نەهنارتیە جیهانێ، دا جیهانێ گونەهبار بكەت، لێ دا جیهانێ ب وی قورتال بكەت.

خواندنا ئەڤرۆکە یا پەرتووکا پیرۆز: یوحەننا ١: ٣-٢١

یوحەننا ٣: ١٦-١٧ پارچەکە ژ دانوستاندنا تایبەت یا کو شەڤەکێ د ناڤبەرا عیسای و نیکودیمۆسی دا رویدای. یا دیارە کو نیکودیمۆس ماموستایەکێ بەرێز و خۆراگرێ گەلێ جوهیان ل وی دەمی بوو. نیکودیمۆس وەکو دوژمنەك نەهاتە دەڤ عیسای، بەلێ وەکو کەسەکێ ئاقلمەند و مەرەقدار کو فێر ببیت، لێگەریانا مەسیحی. ئەو ئێك ژ وان بوو یێن کو گەلەك پرسیار د مێشکێ خۆ دا هەین بەلێ دترسیا ل دەڤ خەلکی پرسیار بکەت. لەوما ئەو ل شەڤەکا تاری و بێدەنگ چوو دەڤ عیسای. عیسای زانی کا بوچی ئەو ل دەمەکێ هوسا هاتیە، ژبەر هندێ ئەو رەت نەکر. ئەڤ چەندە ژی حەزژێکرنا عیسای نیشا مە ددەت. هەرچەندە ئەو کورێ خودێیە، ئەو یێ ئامادە بوو کو دانوستاندنەکا نەرم و ئارام ل گەل نیکودیمۆسی بکەت.

بەلێ ئەرێ راستیا سەرەکیا کو عیسای گەهاندیە نیکودیمۆسی چ بوو؟ بێگۆمان، ئەو راستیە بوو کو حەزژێکرنا خودێ بۆ مە هند یا کویر و مەزنە کو بەرێ وی دایە هندێ کو کورێ خۆیێ ئێکانە بۆ مە بهنێریت، داکو ب رێکا باوەریئینانا وی، ئەم دووبارە ژدایك ببین و ژیانا هەروهەر ب مە بهێتە دان!

عیسایێ مەسیح نەهاتیە دادکرنا گونەهکاران بکەت، بەلکو دا ئەوان ژ بەنداتیا گونەهێ ئازاد بکەت. ئەڤە ژی جیاوازیەکا مەزنە د ناڤبەرا حەزژێکرنا خودێ و حەزژیکرنا مروڤان دا. حەزژێکرنا مروڤان گەلەك جاران یا ب مەرج و خۆپەرێس و سنوردارە. ئەم حەز ژ ئەوان دکەین یێن حەز ژ مە دکەن، یان ژی ب سادەی، ئەم بتنێ حەز ژ یێن “ژهەژی” دکەین. بەلێ خودێ حەز ژ جیهانێ هەمیێ دکەت، ل گەل یێن نەژهەژی ژی.

ئەوی حەز ژ مە کر دەمێ ئەم د خۆپەرستنا خۆ دا دبەرزە، دمێ ئەم هێشتا د تاریاتیێ دا. ئەڤ حەزژێکرنەکا تەمام و بێمەرجە. حەزژێکرنەکا پڕی قوربانیە. د جڤاکی کوردی دا، ئەم هێزێ و رێزێ و شەرەفێ ب ببهاترین تشت ددانین. بەلێ حەزژیکرنا مەسیحی تشتەکێ نوی نێشا مە ددەت. ئەو وەکو پاشایەکێ ئەردی نەهات دا خۆ نێشان بدەت و تەختێ خۆ دابمەزرینیت، بەلێ وەکو خزمەتکارەك دا پاشایەتیا خۆ یا ئەسمانان بینیت، نە یا ئەردی. ئەو هات و شێوازێ خزمەتکارەکی وەرگرت، وەکو مروڤەك دیار بوو، یێ دەروونبچویك بوو، و بۆ مرنێ یێ گوهدار بوو، هەتا مرنا ل سەر خاچێ ژی.

ئەو وەکو پاشایەکێ ئەڤێ جیهانێ نەهات داکو هەمی دەمان ب تانجەکا زێرین ل سەر تەختێ خۆ بیت. ئەو وەکو خزمەتکارەك هات، دا خزمەتا ئەوان یێن و ل قورتالکەرەکی دگەریێن بکەت.  ئەو د هافڕێ گیانەوەرەکی دا ژدایك ببوو، پاقژترین رێك برین، و ل دویماهیکێ هاتە خاچدان و ب ستری وەکو ترانەپێکرن هاتە تاجکرن. ئەرێ ئەڤ چەندە وی دکەتە چ جوڕە پاشایەك؟ بێگومان، چ پاشا وێ چەندێ ئەنجام نادەن.

مەسیح چیرۆکەکێ بۆ قوتابیێن خۆ دبێژیت، وەکو وێ چیرۆکا ل چیایێن کوردستانێ رویدای. ئەو بەحسێ شڤانەکی دکەت کو بچویکترین پەزێ خۆ بەرزە دکەت. هەرچەندە گەلەك پەزێن دی ژی هەبوون، ئەو وان دهێلیت داکو ل پەزێ بەرزە ل گر و گەلیان بگەریێت. دەمێ ئەو وێ دبینیت، ئەو ددانیتە سەر ملێن خۆ و ڤەدگەرینیتە ناڤا کەرێ پەزی دا.  ئەڤ شڤانە ل خەلاتەکی یان ژی پەسنەکێ ناگەریێت. ئەو ب سادەیی حەز ژ پەزێ خۆ دکەت.

عیسا ئەو شڤانەیە. ئەو یێ هاتی دا هەر ئێك ژ مە ببینیت. بەلێ نە ب دفنبلندی، ب حەزژێکرنا تەمام. ئەو نەهاتیە چ تشتەکی ژ مە وەربگریت، بەلێ داکو ب حەزژێکرن قورتالکرنێ پێشکێشی مە بکەت. د یوحەننا ٣: ١-٢١ دا، عیسا نیشا مە ددەت کو دووبارە ژدایکبوونا مە مەسەلەیەکا ئاینی یان ژی زانستی نینە، بەلکو یا گیانیە. ئەو ژیانەکا نویە ئەم وەردگرین ب هێز و حەزژێکرنێ ژ وی یێ کو هەمی تشت داینە مە. ئەڤ ژیانا نوی ب رێکا کریارێن مە بدەستڤە نەهاتیە، بەلێ ب رێکا باوەریا ب وی کەسێ کو خۆ بۆ مە دەروونبچویك کری و سزایێ مرنێ ژ پێش مەڤە وەرگرتی، یاکو ئەم چجاران نەژهەژی.

پرسیار ژ بۆ رەنگڤەدان و رامانێ.

ئەگەر عیسا ب ئەڤێ رێکێ خۆ بکەتە قوربان داکو مە دلخۆش بکەت و قورتال بکەت، چەوا ئەز دشێم هەمان حەزژێکرنا خودان هەست نیشا یێن دی بدەم؟ هەتا ئەگەر ئەز چ تشتان ژی ژ ئەوان وەرنەگرم، ئەرێ ئەز دشێم تشتەکی بدەمە وان؟

نڤێژ

ئەی بابێ مە یێ پاقژ و پیرۆز، ئەم سوپاسیا تە دکەین تە ئەم ژ نەفرەتا هەروهەر قورتال کرین. ئەم سوپاسیا تە دکەین تە رێك ب مە دای دووبارە ژدایك ببین. نەهێلە ئەم گومانان ژ شیانا تە ببەین داکو خۆشتڤیێن مە قورتال بکەی، وەکو ئەم دزانین هێزا تە یا بێسنورە. هاریکاریا مە بکە داکو خۆ دەروونبچویك بکەین کو حەز ژ یێن دی بکەین وەکو تە حەز ژ مە کری. ئەم داخوازێ ژ تە دکەین کو هەژمارا کەنیسیێن ساخلەم ل کوردستانێ زێدە بکەی، داکو گەلێ کوردستانێ بشێن پتر شاهدەیا مەزناهیێ بکەن. ب ناڤێ عیسایێ مەسیح، ئامین.