رۆژا شەشێ
خۆشی برن وەکو هەڤوەڵاتیەك د پاشایەتیا ئەسمانان دا
یەرمیا ٢٣: ٥-٦
٥ خودان دبێژیت: “ئەو دەمە دێ هێت،
دەمێ ئەز چەقەکێ راستدار ژ داوودی رادکەم،
پاشایەك یێ کو ب ئاقلمەندی دەستهەڵاتێ کەت،
هەروەسا دێ یا دادپەروەرانە و یا راست د ئەردی ئەنجام دەت.
٦ ل سەردەمێ وی یەهودا دێ هێتە قورتالکرن و
ئیسرائیل ژی دێ ب ئارامی ژیت.
ئەڤە ئەو ناڤە یێ کو ئەو دێ پێ هێتە گازیکرن:
‘خودان راستداریا مەیە.’
خواندنا ئەڤرۆکە یا پەرتووکا پیرۆز: یەرمیا ٢٣: ١-٨
ل دەستپێکا ئافراندنێ، ئەم مەبەستا خودایێ خۆ یێ پیرۆز دبینین کو خەلکەکێ پیرۆز بۆ خۆ ب ئافرینیت داکو ل گەل وان ل جهەکێ پیرۆز بژیت. د باخچەیێ عەدەن دا، خودێ ل گەل ئادەمی و حەوایێ بوو، بەلێ ئەوان گونەهـ کر. خودێ ئەو دەرئێخستن و خۆ ژ ئەوان دویر کر. هەر ژ باخچەیێ عەدەن، ئەڤ جۆرە ژێکڤەبوونە یان ژی دەرکەفتنە یا ب سەرێ مە یێ مرۆڤان هاتی، ژبەر ئێکەمین گونەها ئادەمی و گونەهێن مە.
ب درێژاهیا چەندین چەرخێن دیروکا کوردی دا، کورد ژیاینە و حەسرەتا وان ژیانەکا سەربەخۆ ل وەلاتێ خۆ، جهەکێ کو کورد دشێن هەست ب تەناهیێ و ئارامیێ بکەن، کو وارێ وان بیت. ل ئەڤان دویماهیکان، کوردێن ل عیراقێ پلەیەکا ئازادیێ هەیە، ئانکو ئەو ب ئازادی ل دەڤەرێ دژین. بەلێ ئەگەر تۆ پرسیارا هەر کوردەکی بکەی، ئەو دێ بێژنەتە؛ ئەڤە ئەو نینە یاکو مە دڤێت. گەلەك حەز دکەن بچنە ئەوروپا یان ژی ئەمریکا، بەلێ دەمێ ئەو دچن، هەر زوی ئەو پێ دحەسیێن کو ژیان ل وێرێ ژی یا بزەحمەتە. وەکو مروڤ، مە حەز یا هەی ئەم ل جهێن پاراستی ئاکنجی بین. مە دڤێت دادپەروەری بهێتە جێبەجێکرن و لدویڤ راستداریێ ژی بچین.
گەلێ ئیسرائیلێ هزر دکر ئەو ل ئەردێ خۆ د پاراستی بوون، بەلێ د ئەڤان ئایەتێن پێغەمبەرایەتیا یەرمیای دا، ژبەر گونەهێن وان و گونەهێن شڤانێن وان، ئەو روی ب روی دەرکەفتنێ و دەربەدەربوونێ بۆ بابلێ بوون. پێدڤی بوو شڤانان چاڤدێریا خەلکێ خۆ کربا، بەلێ ل شوینێ، بەرێ وان بتنێ ل وان بوو.
خودێ، ب دلوڤانیا خۆ، چجاران پشتا خۆ نەدا گەلێ خۆ. ئەڤجا ئەرێ چارەسەریا خودێ بۆ سەرکێشیا وان یا سەرنەکەفتی چ بوو؟ چەوا خودێ دا کەرێ خۆ(وەکو کەرێ پەزی) یێ بەلاڤەبووی کومڤە کەت و ئەوان بەرەکەتدار بکەت داکو ئەو زێدە ببن (٢٣: ٣)؟ خودێ سۆز دا کو پاشایەکێ راستدار ژ رێزا داوودی راکەت (٢٣: ٥). ب رێکا وی، دا دادپەروەری و راستداری و قورتالبوون هەبیت.
پێغەمبەرێن دی ئاماژەیێ ب ئەڤی پاشای وەکو “چەق” ددەن (ئیشایا ١١: ١)، ئەوێ کو دێ بەرهەمێ گەلێ خودێ بەرەڤ پێش ئینیت (ئیشایا ٤: ٢، ١١: ١)، گونەهێ ژ ناڤ بەت (زەکەریا ٣: ٨)، و دێ وەکو کاهنەك خزمەتێ کەت داکو پەرستنا خودێ دابمەزرینیت. گەلەك پێشبینی دەربارەی مەسیحی هەنە، قورتالکەرێ هەلبژارتی، یێ کو عیسایە، ئەوێ کو هەمی نڤێسارێن پیرۆز دەربارەی وی شاهدەیێ ددەن.
سەردەمێ ئەڤی پاشایێ تایبەت دێ ب دادپەروەری و راستداری هێتە وەسفکرن. د دەمێ وی دا، یەهودا (پاشایەتیا باشوری) دێ هێتە قورتالکرن، و ئیسرائیل (پاشایەتیا باکوری) دێ ب تەناهی خۆجهـ بیت، ئانکو هەمی گەلێ خۆدێ ب بها بن. ئەوێ دێ ب ناڤێ “خودانێ راستداریا مە” هێتە نیاسین.
عیسا ژیانەکا تەمام و راستدار ژیایە، هێشتا ژی ئەو روی ب روی مەزنترین زورداریا د دیروکێ هەمیێ دا بوو. عیسای تەختێ خۆ ب رێکا رێشتنا خوینا چ کەسەکی دانەمەزراندیە، بەلێ ل شوینێ ئەوی خوینا خۆ ب خۆ رشت داکو بهایێ گونەهێن مە بدەت. ئەوی چجاران گونەهـ نەکر، بەلێ ئەوی سزادانا مە ل سەر ملێن خۆ هەلگرت. ئەوی خۆ وەکو قوربانەك پێشکێش کر داکو مە رولەك د پاشایەتیا راستداریێ دا هەبیت.
یەرمیای نێزیکی ٧٠٠ ساڵان بەری گەهشتنا عیسای پێشبینیا ئەڤێ چەندێ دکر. ئەوی نڤێسی، “دەمەك دێ هێت…” بەلێ نوکە ئەو دەم یێ هاتی! ژبەر کەفارەتا مەسیحی، باوەردار ئێدی د دەربدەریا گیانی دا نینن. بابێ مە ئەم یێن هنارتینە پاشایەتیا کورێ خۆ یێ خۆشتڤی.
عیسای مەزنترین ئاستەنگا بۆ پەیواندکرنێ ل گەل خودێ یاکو گونەها مەیە ژ ناڤ بر. ب رێکا باوەریێ ب مەسیحی، خودێ مە بێگونەهـ رادگەهینیت. رامانا ئەڤێ چەندێ ژی ئەوە کو دەمێ خودێ سەحدکەتە مە، ئەو راستداریا عیسای دبینیت. ژبەر ئەڤێ چەندێ، ئەم دشێین نێزیکی خودێ ببین و پەیوەندیەکا راست ل گەل هەبیت. ئەگەر تۆ قەبویل بکەی کو عیسا خودان و قورتالکەرە، تۆ دشێی خودانێ ئەڤێ خۆشیێ بی!
هەرچەوا بیت، ئەم هێشتا بەرهەمێ دویماهیکێ یێ ئەڤێ پاشایەتیێ نابینین. بوچێ؟ چنکو عیسا یێ پاشایەتیا خۆ د دل و ئەقلێ مروڤان دا ددامەزرینیت. ئەم هەڤوەڵاتیێن ئەسماناینە، وەکو بیانی و غەریب د ئەڤێ جیهانێ دا دژین. هندەك جاران ئەڤ چەندە بۆ مە دبیتە ئەگەرێ زەحمەتێ، بەلێ ئەم دزانین کو خودێ یێ دلوڤانە و سۆزێن خۆ بجهـ دئینیت.
دەمێ بیرا مە ل ژدایکبوونا مەسیحی دهێت، ئەم چاڤەرێی هاتنا دوویێ یا مەسیحی دبن دەمی ئەو دێ گەلێ خۆ خرڤە کەت و ئەسمانەك و ئەردەکێ نوی دامەزرینیت. ل وێرێ، راستداری دێ خۆجهـ بیت. ئەڤە دەرکەفتنەکا مەزنە کو یەرمیای د ئایەتێن ٧-٨ دا بەحس کری. نوکە ژی ئەم یێن ژ ئەخسیربوونا گونەهـ و ئیبلیسی رزگار بووین، و ئەم چاڤەرێی وی دەمینە دەمێ ئەم دێ د ئاشتیێ دا ئاکنجی بین.
دبیت بساناهی بیت کو ئەڤان سۆزان ژبیر بکەی چنکو ئەم نەشێین ئەوان ببینین. خودێ ئەم بۆ ئەڤێ چەندێ یێن ئافراندین داکو مە حەز ژ بۆ جهەکێ بەردەوام و ئارام هەبیت، جهەك یێ کو لێ پەیوەندیا راستەقینە و خۆشی و کەیفخۆشی و هەدار هەبیت. حەزا مە ژ بۆ وەلاتێ مە یان ژی دویڤچوونا وەلاتەکێ نوی یا خەلەت نینە. بەلێ پێدڤیە ئەم بزانین کو چ وەلات ل ئەڤێ جیهانێ کەیفخۆشیا هەروهەر ب مە نابەخشیت. بلا هیڤیێن مە دمەزن بن: ئەم میراتگرێن پاشایەتیا مەسیحینە. هەتاهەتایێ ئەم دێ وەکو گەلێ خودێ یێ سەرکەفتی ل گەل پاشایێ پاشایەتیێ کەیفخۆش بەین.
پرسیار ژ بۆ رەنگڤەدان و رامانێ.
ل سەر رەوشا خۆ یا نوکە رەنگڤەدە. چەوا پاشایەتیا عیسای و هەڤوەڵاتبوونا ئەسمانی کاریگەریێ ل رێکا ژیانا تە دکەت؟
نڤێژ
ئەی بابێ خۆشتڤی، ئەم پەسنا تە ژ بۆ وێ دلوڤانیا تە ب رێکا مەسیحی دایە مە دکەین. سوپاس ژ بۆ قورتالکرنا گونەهکاران ژ بەرزەبوونا گیانی داکو مە پەیوەندیەکا هەروهەر ل گەل تە هەبیت. چاڤێن مە ڤەکە داکو عیسای باشتر وەکو پاشایێ راستەقینە و قورتالکەرێ خۆ بنیاسین. هیڤی دکەین هێزێ بدەیە مە داکو ددلسۆز بین وەکو ئەم چاڤەرێی هاتنا دوویێ یا عیسای. هاریکاریا مە بکە داکو سوپاسدار بین ژ بۆ دیاریا ژیانا هەروهەر، بەلێ د سەر هندێ را، داکو ببینە پەرستنکەرێن دانەرێ دیاریێ، یێ کو تۆی. بلا پاشایەتیا تە بهێت، بلا داخوازیا تە ژی بجهـبهێت. بلا ناڤێ عیسای د دلێن مە دا بیت و ل سەرانسەری جیهانێ بەلاڤە بیت. ب ناڤێ مەسیحی و بۆ روومەتا مەسیحی، ئەم دوعا دکەین، ئامین.
