رۆژا پێنجێ 
تەلهەك ژ قورمێ یەسی

ئیشایا ١١: ١-٢

١ تەلهەك دێ ژ قورمێ یەسی دەركەڤیت، و دێ چەقەكێ نوی ژ رهێن وی شین بیت. ٢ و گیانێ خودانی دێ ل سەر روینیت، گیانێ ئاقلمەندیێ و شارەزایێ، گیانێ ئامۆژگاریێ و هێزێ، گیانێ نیاسین و ترسا ژ خودانی.

خواندنا ئەڤرۆکە یا پەرتووکا پیرۆز: ئیشایا ١١: ١-١٠

دەمێ ئەم کورد کوردەکێ دی دبینین، مە دڤێت ئاشیرەتا وی یان هوژا وی و ژییانا وی یا بەری بزانین. مە دڤێت بزانین کا بابکالێن وان کینە. ب رێکا زانینا ئەڤان تشتان، مە دڤێت وی کەسی بدەینە دیارکرن، چنکو هەر هوزەك و خێزانەك ب تشتەکی دبەرنیاسن. بەری دوو هزار ساڵان، بەری ژدایکبوونا مەسیحی، خەلکی دڤیا بزانین کا خەلك ژ چ هوز و نەژادن، و وەکو ئەڤرۆکە. خەلکی هەمان پرسیار دەربارەی مەسیحی دکر؛ ئەوان دڤیا بزانن کا مەسیح کورێ کێیە و ژ چ هوز و نەژادە. حەفت سەد ساڵان بەری ژدایکبوونا مەسیحی، پێغەمبەر ئیشایای پێشبینی دەربارەی قورتالکەری ئانکو مەسیحی کربوو، رادگەهاند کا مەسیح دێ ژ چ خێزان هێت و چەوا ئەو دێ ئاشتیا تەمام و ئاشتبوونا هەمی مللەتان ل گەل خۆ ئینیت.

د سەردەمێ ئیشایای دا، گەلێ خودێ د لاواز و تەپەسەرکری بوون و چنە مابوو ژناڤ بچن.  سێ سەد ساڵان بەری وی دەمی، ئەو گەلەك بهێز بوون ل ژێر دەستهەڵاتا داوودی، بەلێ ل سەردەمێ ئیشایای، ئەو گەلەك لاواز ببوون. ئەو تووشی جەنگێن براکوژیێ ببوون، و پاشایێن گەلێ خودێ پشتی داوودی گەلەك دگەندەڵ بوون و پەیمانا خودێ شکاندبوو. ژبەر ئەڤێ چەندێ، ئەو روی ب روی سزا و توڕەبوونا خودێ بوون. ژبەر پیلانگیری و گونەهێن وان، چنەمابوو ئەو ژ لایێ ئاشوریانڤە بهێنە داگیرکرن. د ئەڤێ رەوشا دژوار و بێهیڤی دا، ئیشایای پێشبینیا هاتنا مەسیحی، قورتالکەری، دکر.

ئیشایا دبێژیت: مەسی دێ ژ رەهێن یەسی هێت. یەسی بابێ داوودی بوو. سەردەمێ داوودی گەلەك یێ باش بوو. بەلێ پاشایێن پشتی داوودی خودێ پشتگوهـ هاڤێت، هەروەسا خێزانا یەسی ژی لاواز بوو. لەوما ئیشایا بەحسێ خێزانا یەسی وەکو رەهـ دکەت، وەکو دارەکا بچویك و لاواز، نە وەکو دارەکا درێژ و بهێز. د ناڤەراستا ئەڤێ بێهیڤیبوون و نەئارامیێ دا، ئیشایا هیڤیێ ب گەلێ خودێ دبەخشیت ب رێکا بەحسکرنا چەقەکی ژ رەهێن یەسی یێ کو دێ گەشە کەت و بهێز هێتە دامەزراندن داکو چجاران نەهێتە هەلکێشان. گیانێ خودێ دێ ل سەر ئەڤێ چەقێ روینیت و دێ یێ پڕی ئاقلمەندی بیت. ئەڤ چەقە دێ خرابکاران داد کەت و بەرێ گەلێ خۆ دەتە راستداری و دادپەروەریێ، نەوەکو پاشایێن دی یێن ئیسرائیلێ.  ئەڤ قورتالکەرە دێ ئاشتیا تەمام بۆ گەلێ خۆ دابین کەت، ئانکو بۆ هەمیێن کو بەرەڤ ویڤە دهێن و ل ژێر سەردەمێ وی یێ راستدارانە دژین. ئەڤ چەقە ژ رەها یەسی مەسیحە.

گەلی خویشك و برایێن هێژا، ئەڤرۆکە و د ئەڤێ جیهانێ دا، ئەم گەلەك جەنگ و پێکنەکرن و زولمێ ب گەلەك رێك و شێوازێن جودان جودا د ناڤبەرا خۆ دا دبینین. ئەز گەلەك یێ خەمگین و وەستیایمە ژ دیتنا ئەڤێ زولم و پێکنەکرنا د جڤاکێ مە دا. ئەز دکەمە هەوار و ئاخینکان بۆ پاشایەکێ راستدار یێ کو دێ ب دادپەروەرانە دەستهەڵاتێ کەت، رادهێلم. هەروەکو خودێ مەسیح د رەوشەکا بێهیڤیبوون و بێئاشتیێ دا هنارتی داکو گەلێ خۆ قورتال بکەت، ب هەمان رێك، خودێ دێ مە ژ ئەڤێ بێهیڤیبوون و زورداریێ قورتال کەت! بەلێ چەوا و ب چ رێك؟ بەرسڤ عیسایێ مەسیحە، ئەو چەقێ ژ رەها یەسییە.

مەسیح خودانێ ئەرد و ئەسمانایە. بەری دوو هزرا ساڵان، ئەو هاتە خوار و بوو مروڤ، پاشایەتیا خودێ بۆ ئەڤێ جیهانێ ئینایە. رۆژەك دێ هێت دەمێ ئەو دێ ڤەگەریێت داکو ئەرکێ خۆ یێ مەزن د ئەڤێ جیهانێ دا تەمام بکەت. بەلێ هەتا هاتنا دوویێ یا مەسیحی، ئەڤ جیهانە هێشتا تژی شەڕ و گرفتاری و زورداریە. هەرچەوا بیت، ئەم د ئەڤێ جیهانێ دا بێهیڤی نابین چنکو ئەم دزانین ئەو یا خودێ یە و ل ژێر چاڤدێریا وییە. دەمێ مەسیح ڤەدگەریێت، ئەو دێ هەمی خەلەتیان و نەدادیان راستڤە کەت و دێ ب تەمامی پاشایەتیا خۆ ل گەل گەلێ خۆ یێ پیرۆز د جیهانا نویژەنکرین دا دامەزرینیت. د ئەوێ جیهانا نویژەنکری دا، شەڕ و گرفتاری و گونەهـ تێدا نینن. د ئەوی دەمی دا، گورگ دێ ل گەل بەرخی ئاکنجی بیت. چێل و هرچ دێ پێگڤە چەرن. ئەرد دێ تژی بیت ژ زانینا خودێ وەکو ئاڤ دەریایێ دنخێڤیت. ب رێکا مەسیحی، ئەڤ جیهانە و ئەو هەمیێن کو باوەری وەکو قورتالکەرێ خۆ ب وی هەی دێ هێنە قورتالکرن و دێ ئاشتیا تەمام ب دەستڤە ئینن. لەوما، وەکو ئەم چاڤەرێی هاتنا دوویێ یا مەسیحی، بلا هیڤیا مە یا مەزن بیت چنکو تەلهێ یەسی دێ حوکمکرنێ کەت ئەو ژی مەسیحە.

پرسیار ژ بۆ رەنگڤەدان و رامانێ.

ئەرێ چەوا پێغەمبەرایەتیا ئیشایای دەربارەی مەسیحی د ئەڤێ جیهانا پڕی زورداری دا هیڤیێ ب تە ددەت؟

نڤێژ

ئەوی خودێ، ئەم ناڤێ تە بلند دکەین. روومەتا تە هەردەم ل سەر مەیە. ب رێکا کەرەما خۆ، تە ئاشتی و قورتالکرنا ب رێکا عیسای ب مە بەخشی. ئەم سوپاسیا تە ژ بۆ وێ حەزژێکرنا تە دناڤا گەلێ خۆ دا دانای، دکەین. ئەم پەسنا تە دکەین ژ بۆ فێرکرنا مە کو ناکوکیێن خۆ بێێ توندوتیژی چارەسەر بکەین. ئەم سوپاسیا تە دکەین کو تە هیڤیەکا هەروهەر دایە مە داکو ئەم بشێین د ئەڤێ جیهانێ دا مە ئەو هیڤیە هەبیت. ئەی خودێ، گیان، ئەم سوپاسیا تە دکەین ژ بۆ بجهـئینانا سۆزێن خۆ بۆ دامەزراندنا بنیاتێ وێ یاسایا تە ب ئاقلمەندیێ تژی کری. ئەم پەسنا تە دکەین ژ بۆ کورێ تە یێ راستەقینە یێ کو ژ دادی و راستی و ئاشتی و حەزژێکرنا نەگوهور پڕە. ب ناڤێ عیسایێ مەسیح، ئامین.