رۆژا سێ یێ
هیڤیا مە بۆ نوکە و پاشەرۆژێ
٢ ساموئێل ٧: ١٢-١٣
١٢ دەمێ تۆ بمری و دچیە دەڤ بابکالێن خۆ، ئەز دێ پشتی تە دویندەها تە راکەم، یێن کو دێ ژ تە ب خۆ بن، و ئەز دێ پاشایەتیا دامەزرینم. ١٣ دێ ل سەر ناڤێ من مالەکێ ئاڤا کەت، و ئەز دێ تەختێ پاشایەتیا وی هەتاهەتایێ دامەزرینم.
خواندنا ئەڤرۆکە یا پەرتووکا پیرۆز: ٢ ساموئێل ٧
د ٢ ساموئێل ٧: ١٢-١٣ دا، خودێ ب رێکا پێغەمبەر ناتانی ل گەل داوود پاشای دئاخڤیت و سۆزەکێ ددەتێ. داوودی دڤیا پەرستگەهەکێ بۆ خودێ ئاڤا بکەت، بەلێ خودێ بەرسڤ دا و گۆتە داوودی کو ئەو نابیتە ئەو کەسە یێ کو دێ پەرستگەهەکێ بۆ خودێ ئاڤا کەت، بەلکو ل شوینێ دێ ئێك ژ دویندەها وی بیت یێ کو دێ مالەکا پیرۆز بۆ ناڤێ خودێ ئاڤا کەت.
خودێ داوودی پشتراست دکەت کو پشتی مرنا وی، ئێك ژ دویندەها وی دێ پاشایەتیێ دامەزرینیت، یا کو دێ هەتاهەتایێ بەردەوام بیت. ئەڤ تێکستە ژی ئاماژەیێ ب سلێمانی ددەت، کورێ داوودی، یێ کو دێ پەرستگەهێ ل ئورشەلیمێ ئاڤا کەت. هەرچەوا بیت ژ لایەکێ دیڤە، ئەڤ ئایەتە ئاماژێ ب مەسیحێ سۆزپێدای ددەن، یێ کو دێ پاشایەتیا خۆ بۆ هەتاهەتا دامەزرینیت.
دەمێ ئایەتا ١٣ دبێژیت، “ئەو دێ مالەکێ بۆ ناڤێ من ئاڤا کەت،” ئەو مە دووبارەت پشتراست دکەت کو خودێ دێ مالەكا پیرۆز و پەرستگەهەکێ دامەزرینیت. د پەیمانا کەڤن دا، د ١ پاشا ٦ دا، ئەم دبینین کو ئێکەمین پەرستگەهـ بۆ خودێ ژ لایێ سلێمانی، کورێ داوودیڤە هاتبوو ئاڤاکرن. هەرچەوابیت، ئەو پەرستگەهـ هاتبوو وێرانکرن.
٢٠٠٠ ساڵان بەری نوکە مەسیحی، دویندەها داوودی، پاشایێ پاشایەتیا خودێ، هاتە جیهانێ. بەلێ نەکو دا ئاڤاهیێ ئورشەلیمێ دووبارە ئاڤا بکەت، لێ ل شوینێ مالەکا زیندی و گیانی د ناڤا گەلێ خودێ دا ئاڤا بکەت، ئانکو کەنیسەیێ. ئەو پەرستگەها خودێ ئەڤرۆکە ئاڤا دکەت کەنیسەیا وی یە، ئانکو جڤاکا باوەرداران. ئەفەسوس ٢: ٢٢ دەربارەی باوەرداران بەحس دکەت و دبێژیت، “ب وی هوین ژی پێكڤە دهێنە ئاڤاكرن، دا ببنە خانیەك كو خودێ ب رێكا گیانێ خۆ تێدا ئاكنجی ببیت.” ئەو مالا کو خودێ نوکە ئاڤا دکەت جڤاکا باوەردارانە، ئانکو کەنیسە. ب رێکا عیسایێ مەسیح، خودێ خەلکێ ژ مرنێ قورتال دکەت و ئەوان دکەتە خێزانەکا باوەردار یاکو ب رێکا عیسایێ مەسیح هاتیە دیتن.
د سەر هندێ را، خودێ هیڤیێ ددەتە مە دەمێ د ئایەتا ١٣ دا دبێژیت، “ئەز دێ پاشایەتیا خۆ دامەزرینم.” بەلێ ئەو دێ چەوا هێتە دامەزراندن؟ خودێ پاشایەتیا خۆ د ناڤا هەمی مللەتان دا ددامەزرینیت. ل رۆژا دویماهیکێ، هەمی باوەردارێن جیهانێ ژ هەر هوزەکێ دێ پێگڤە ل گەل باوەردارێن کورد پەرستنا عیسایێ مەسیح کەن. د ئنجیلا پیرۆز دا، ئاشکراکرن ٧: ٩-١٠ دبێژیت:
“پشتی ڤان تشتان من بەرێ خۆ دایێ، ئەڤە جەماوەرەكێ مەزن، كەس نەدشیا بهژمێریت، ژ هەمی مللەت و هۆز و گەل و زمانان، ل بەرامبەر تەختی و ل بەرامبەر بەرخی د راوەستیای بوون. جلكێن سپی ل بەر وان بوون و تایێن دارقەسپێ د دەستی وان دا بوون. وان ب دەنگەكێ بلند گازی دكر و دگۆت: ‘قورتالبوون ب دەستێ خودایێ مەیە، ئەوێ ل سەر تەختی روینشتی و ب دەستێ بەرخیە.'” لەوما، خودێ مە پشتراست دکەت وەکو هەر مللەتەکێ دی، گەلەك کورد دێ هێنە قورتالکرن و پاشایەتیا وی دێ د ناڤ مللەتێ کورد دا هێتە دامەزراندن.
٢ ساموئێل بەشێ ٧ مە پشتراست دکەت کو پاشایەتیا عیسایێ مەسیح چجاران ب دویماهیك ناهێت. مە هیڤی هەیە کو خودێ پەرستگەهەکا پیرۆز بدامەزرینیت، یاکو جڤاکا باوەرداران، کەنیسەیە. هەروەسا مە هیڤی هەیە کو خودێ دێ پاشایەتیا خۆ د ناڤا کوردان دا دامەزرینیت. د سەر هندێ را، ئەم ب هیڤیا بهێز دژین کو پاشایەتیا عیسایێ مەسیح دێ هەتاهەتایێ بەردەوام بیت و باوەردار دێ ل گەل وی ل بەهەشتێ بن. سەرکەفتنا عیسایێ مەسیح ل سەر مرنێ یا دەمکی نەبوو. ب رێکا خاچدان و ڕابوونا ژ مرنا عیسایێ مەسیح، ئەو هەتاهەتایێ ل سەر گونەهـ و مرنێ بسەرکەفت، و هوسا خەلك ژ هەمی مللەتان ل گەل خۆ داخواز کرنە ژیانا هەروهەر.
پرسیار ژ بۆ رەنگڤەدان و چاڤگێریێ
ئەرێ چەوا ئەڤ سۆزە، کو مەسیح پەرستگەهەك یان مالەکا پیرۆز بۆ خودێ ئاڤا دکەت، تە هان ددەت کو خزمەتا کەنیسەیا وی بکەی؟
نڤێژ
ئەی خودێ، ئەم سوپاسی و پەسنا تە دکەین کو تە ئەم کرینە پارچەك ژ پاشایەتیا خۆ یا هەروهەر و ئەم ژ وێ بێهیڤیبوونێ قورتالکرین ژ وێ بێهیڤیبوونێ کو بەری نیاسینا تە مە هەبوو. ئەم دوعا بۆ مللەتێ کورد دکەین، کو ئەو وێ هێڤیا د عیسایێ مەسیح دا هەی بزانن. ئەم سوپاسیا تە دکەین ژ بۆ قورتالکرنا هندەك مرۆڤان ژ هەمی هوزێن کوردی. ئەم پەسنا تە دکەین ژ بۆ هیڤیا مەیا هەروهەر چنکو تۆ تەختێ خۆ بۆ هەتاهەتایێ ددامەزرینی. ئەم سوپاسیا تە کەین کو ئەم ئیناینە د ناڤا پاشایەتیا خۆ دا، یا کو ئەم چجاران ژ هەژی نەبووین. ب ناڤێ عیسایێ مەسیح، ئامین.
