رۆژا ئێکێ
بلا تە هیڤی ب ژناڤبرنا کارێ شەیتانی هەبیت
دەستپێکرن ٣: ١٥
ئەز دێ دوژمناتیێ کەمە د ناڤبەرا تە و ژنێ دا، د ناڤبەرا دویندەها تە و دویندەها وێ دا، دویندەها وێ دێ هێرشی سەرێ تە کەت و تۆ دێ هێرشی پەحنیا وی کەی. مار سەرێ خۆ رادکەت و تۆ ژی پێ خۆ بدانە سەر کوریا وی.
خواندنا ئەڤرۆ یا پەرتووکا پیرۆز: دەستپێکرن ٣: ١-٢٤
ئەرێ هیڤیا تە بۆ ئەڤێ وەرزێ کریسمسێ چیە؟ ئەرێ هیڤیا تە کەهرەبەکا ٢٤ دەمژمێریا بەردەوامە ب بهایەکێ ئەرزان؟ ئەرێ هیڤیا تە ئەوە موچەیێ تە د دەمێ خۆ دا بهێت دان؟ ئەرێ هیڤیا تە ئەوە کو ئەندامێن خێزانا تە باوەریێ ب عیسای بینن؟ مە هەمیان هیڤی بۆ گەلەك تشتان هەنە. دەستپێکرن ٣: ١٥ ئاماژەیێ ب عیسای وەکو مەزنترین هیڤی ددەت. ئەو ژێدەرێ ئومێدا مەیە ژ بۆ ژناڤبرنا کارێ شەیتانی.
خودایێ مەزن جیهان ژ بۆ روومەتا خۆ ئافراندیە. ئەوی هەمی تشت باش ئافراندن. ل رۆژا دویماهیکێ ژ ئافراندنێ، ئەوی تایبەتمەندترین ئافراندنا خۆ ئافراند، کو مروڤ بوو. ئەوی ل دویڤ وێنەیێ خۆ ئەو ئافراند، داکو بهایێ وی بلند رابگریت و بکەیفخۆشی و ب ئاشتی هەتاهەتایێ ل گەل وی بژیت. کو بهێیە ئافراندن ل دویڤ وێنەیێ خودێ ڕامانا وێ ئەو نینە کو خودێ دوو دەست و دوو پێ و لەشەکێ وەکو یێ مە یێ هەی. نەخێر، خودێ گیانە. کو بهێیە ئافراندن ل دویڤ وێنەیێ خودێ ڕامانا وێ ئەوە کو ئەم یێن هاتینە ئافراندن داکو رەنگڤەدانا وێنەیێ وی ل سەر ئەردی بین. پێدڤی بوو ئادەم و حەوا نوینەرێن خودێ ل سەر ئەردی بن، کو داخواز و فەرمانێن وی هەلبگرن داکو جیهانێ ل ژێر دەستهەڵاتا وی ب رێڤە ببەن. بەری گونەهـ بهێتە د جیهانێ دا، ئادەمی و حەوایێ پەیوەندیەکا تەمام یا ئارام ل گەل خودێ د ناڤا باخچەیێ عەدەن دا هەبوو.
هەرچەوا بیت، دەستپیکرن ٣ ئاماژە ل وێ چەندێ دکەت کا چەوا ئادەمی و حەوایێ گونەهـ کر و پەیوەندیا تەمام یا وان یا ئارام ل گەل خودێ ژ دەست دا. شەیتان وەکو شێوەیێ ماری دیار بوو و ئادەم و حەوا خاپاندن، بوو ئەگەرێ هندێ وەل وان بکەت گومانان ژ چاکیا خودێ ببەن. خودێ فەرمان ل ئادەمی و حەوایێ کر بوو کو ژ دارا زانینا باشی و خرابیێ نەخۆن، داکو ئەوان بپارێزیت و بەرەکەتدار بکەت، نەکو دا ئەوان تەپەسەر بکەت. پێدڤیە ئەم بیرا خۆ ل ئەڤێ راستیێ بینین، فەرمانێن خودێ ژ بۆ باشیا مەنە. گوهداریکرنا فەرمانێن خودێ رێکا بەرەکەت و ژیانێیە. نەگوهداریکرن و پیلانگیری رێکا کەفتن و مرنێیە.
بەلێ ئادەمی و حەوایێ باوەری ب باشیا خودێ نەئینا، و ب رێکا خوارنا فێقیێ دارێ، ئەوان فەرمانا خودێ شکاند. ب رێکا ئەڤێ کریارێ، گونەهـ و مرن هاتنە د ناڤا جیهانێ دا. ئەم ئەڤێ راستیێ د دەستپێکرن ٣ێ دا دبینین، پشتی گونەها وان، ئادەم و حەوا ژ خودێ ترسان و ئێدی ئاشتی ل گەل وی نەما. پەیوەندیا وان یا ئاشتیانە ل گەل ئێکودوو تێکچوو، ئەوان ئێکودوو گونەهبار دکر و شەرم ژ خۆ دکر. خودێ خۆ ژ ئەوان دویر کر و ژ باخچەیێ عەدەن دەرئێخستن.
بۆ مە یا بساناهیە ئادەمی و حەوایێ گونەهبار بکەین و بێژین، “ئەرێ بوچی ئەم ژ گونەها وان بەرپرسین؟” بەلێ هەڤالێ من، ئەرێ ما ئەم ژی گونەهکرنێ هەلنابژێرین؟ هەر ئێك ژ مە، ب حەزا دلێ خۆ، یاخیبوون دژی خودێ هەلدبژێریت. ئەرێ ما ئەم ئەنجامێن گونەهێن خۆ د ئەڤێ ژیانێ و ئەڤێ جیهانێ دا نابینین؟ ئەم درەوان دکەین داکو خۆ بۆ کەسێن دی باش بدەینە دیارکرن. دلێن مە ژ حەزێن خراب و چاڤبرساتیێ و شەهوەتێ دپرن. ئەگەر کەسەکی بڤێت خۆ ژ بەنییاتیا گونەهێ قورتال بکەت، ئەو نەشێن چنکو مروڤ یێن کەتینە د تەلها گونەهێ دا؛ گونەهـ یا د ناڤ سروشتێ مە دا.
ئەڤجا ئەرێ مە چ هیڤی هەیە کو ئەڤێ جیهانێ دا ل گەل خودێ ئاشت ببین؟ ئەری مە چ هیڤی هەنە کو دێ ل گونەهێن مە هێتە بورین و ژ کارێ شەیتانی هێینە قورتالکرن؟ چ هیڤی ژ مە ب خۆ نینن، ژ راستداریا مە ب خۆ، بەلێ ژ دویندەها ژنێ، کو عیسایە. ئەڤ مزگینیە هیڤیا مە یا قورتالکرنا ژ گونەهێ د عیسای دا یە، نە د مە دا یە.
د دەستپێکرن ٣: ١٥ دا، دانوستاندنا خودێ ل گەل شەیتانی دەربارەی دوژمناتیێ ژبەر خاپاندنا ئادەم و حەوایێ هیڤیەکێ ب مە ددەت. دبێژیتە مە کو دویندەها ژنێ دێ سەرێ شەیتانی هەرشینیت و شەیتان دێ ب پەحنیا وی ڤەدەت.
عیسا دویندەها ژنێیە! ئەو ژ پاکیزەیەکێ ژ دایك بوو. بوچی ئەو هات؟ داکو سەرێ شەیتانی بهەرشینیت. رامانا وێ ئەوە کو دێ هێزا گونەهـ و مرنێ هەلوەشینیت، و دێ مروڤایەتیێ ژ دادکرن و قەیدکرنا گونەهێ قورتال کەت. ئەرێ ئەوی چەوا ئەڤ چەندە ئەنجام دا؟ ب رێکا قوربانیدانا ل سەر خاچێ.
ئەڤ ئایەتە دبێژیتە مە کو شەیتان دێ ب پەحنیا عیسای ڤەدەت. ئەرێ رامانا ئەڤێ چەندێ چیە؟ هەرشاندنا سەرێ کەسەکی ئانکو ئەو کەسە هاتە شکاندن. بەلێ پێڤەدانا ب پەحنیا کەسەکی ڤە چ کەسێ ناشکێنیت، بتنێ دبیتە ئەگەرێ ئازارێ. عیسا ژ بۆ گونەهکاران هاتبوو خاچدان. بەلێ ئەڤ چەندە ب تەمامی کورێ خودێ ناشکێنیت. راستە، عیسای ئازار کێشا و مر، بەلێ ب رێکا رابوونا ژ گۆڕێ ، ئەو ل سەر مرنێ بسەرکەفت. عیسا ئەڤرۆکە یێ ساخە، هەروەسا ئەو ژ بۆ هەرشاندنا سەرێ شەیتانی هیڤیا مەیە.
خویشك و برایێن هێژا یێن کو باوەری ب مەسیحی هەیە، ئەرێ هوین بارێ گونەهێ هەلدگرن و زەحمەتێ بەرامبەری وێ دبەن؟ ل بیرا تە بیت کو عیسای سەرێ شەیتانی هەرشاند. داکو قەیدکرنا ژ گونەهێ نەهێلیت و ب ئاشتی و هێزا مەسیحی بژی. بلا تە باوەری ب مەسیحی هەبیت ژ بۆ ژناڤبرنا کارێ شەیتانی د ژیانا تە دا.
پرسیار ژ بۆ رەنگڤەدان و رامانێ.
زانین کو مەسیحی شەیتان تێکشکاندیە، ئەرێ ئەڤ چەندە چەوا کاریگەریێ ل رویبرویبوونا گونەهێ دکەت؟
نڤێژ
بابێ مە یێ ل ئەسمانان، ئەم پەسنا تە ژ بۆ هێزا تە د شکاندنا کارێ شەیتانی دا دکەین. ئەم پەسنا تە ژ بۆ هیڤیا قورتالکرنێ یا مە هەی ژ هێزا گونەهێ و شەیتانی ب رێکا عیسایێ مەسیح دکەین. ژ کەرەما خۆ ڤە ژبەر گومانا مە ب شیانا تەیا قورتالکرنا مە ژ گونەهێ ل مە ببورە. بابێ مە یێ ل ئەسمانان. ئەم داخوازێ ژ تە دکەین کو هیڤیا مە ب خۆ بهێزتر لێ بکەت. هێزێ بدە مە داکو گونەهێن خۆ بهێلین و ژیانەکا بەرەکەتدار بژین. سوپاسیا تە ژ بۆ هیڤیا هەروهەرا مەسیحی دایە مە دکەین. ب ناڤێ عیسایێ مەسیح، ئامین.
