مزگێنی چییە؟

مزگێنی ئەو هەواڵە خۆشەیە دەربارەی ئەو کارەی عیسای مەسیح کە ئەنجامی داوە بۆ ئاشتکردنەوەی گوناهباران لەگەڵ خودادا. ئەمە هەموو چیرۆکەکەیە:

1. خودای تاک و تەنیا، ئەوەی کە پیرۆزە، ئێمەی لە وێنەی خۆی بەدیهێنا بۆ ئەوەی بیناسین (پەیدابوون ٢٦:١-٢٨).
2. بەڵام ئێمە گوناهمان کرد و خۆمان لێی دابڕاند (پەیدابوون ٣؛ ڕۆما ٢٣:٣).
3. بەهۆی خۆشەویستییە مەزنەکەیەوە، خودا کوڕەکەی (عیسا)ی نارد تا وەک پاشایەک بێت و گەلەکەی ڕزگار بکات لە دوژمنەکانیان، بەتایبەتی گوناهەکانیان (زەبوورەکان ٢؛ لۆقا ٦٧:١-٧٩).
4. عیسا شانشینەکەی دامەزراند بە دەرکەوتنی وەک کاهینێکی ئاشتکەرەوە و قوربانییەکی چاوەڕوانکراو! ئەو ئاشتکەرەوانەی پەیمانی کۆن کە گەلی خودایان ئاشت دەکردەوە لەگەڵ خودا، هەروەها ئەو پێگەی “قوربانی”شی هەبوو. واتە، عیسای مەسیح بە دوو پێگە دەرکەوت؛ یەکەمیان وەک کاهینێکی نێوەندگیر و ئاشتکەرەوە، دووەمیشیان وەک ئەو قوربانی و قوربانیدەرەی کە بە جەستەی خۆی قوربانی پێشکەش کرد و خۆی کرد بە قوربانی بۆ سڕینەوەی گوناهی خەڵک و ئاشتکردنەوەیان لەگەڵ خودا. ئەو ژیانێکی تەواو(بێ گوناه) ژیا و دواتر لەسەر خاچ مرد، بەم شێوەیە شەریعەت و تەوڕاتی موسای تەواوکرد و سزای تاوانی خەڵکانێکی زۆری هەڵگرت (مەرقۆس ٤٥:١٠، یۆحەنا ١٤:١ ، عیبرانیەکان ٢٦:٧، ڕۆما ٢١:٣-٢٦، ١٢:٥-٢١).  دواتر لە مردن هەستایەوە، نیشانی دا کە خودا قوربانیەکەی قبوڵکردووە و توڕەییەکەی لە لەسەر ئێمە نەماوە (کردار ٢٤:٢، ڕۆما ٢٥:٤).
5. ئەو ئێستا بانگمان دەکات کە تۆبە بکەین لە گوناهەکانمان و متمانە تەنها بە مەسیح بکەین بۆ لێخۆشبوونمان (کردار ٣٠:١٧، یۆحەنا ١٢:١). ئەگەر ئێمە تۆبە بکەین لە گوناهەکانمان و متمانە بکەین بە مەسیح، ئەوا دووبارە بە ژیانێکی نوێ لە دایک دەبینەوە، ژیانێکی هەتاهەتایی لەگەڵ خودا (یۆحەنا ١٦:٣).

ئێستا ئەمە مزگێنییەکەیە.

ڕێگایەکی باش بۆ پوختەکردنی ئەم مزگێنییە ئەوەیە کە لە ڕوانگەی ئینجیلەوە وشەکانی ( خودا، مرۆڤ، مەسیح، وەڵامدانەوە) شی بکەینەوە.

1. خودا. خودا بەدیهێنەری هەموو شتێکە (پەیدابوون ١:١). خودا بەتەواوی پیرۆزە، شایستەی هەموو ستایشێکە، و سزای گوناه دەدات (ئاشکراکردن ١١:٤، ڕۆما ٥:٢-٨).
2. مرۆڤ. هەموو خەڵکی، هەرچەندە بە باشی بەدیهێنراون، بەڵام بە سروشتیان بوون بە گوناهبار (پەیدابوون ٢٦:١-٢٨، زەبوورەکان ٥١:٥، ڕۆما ٢٣:٣). لە لەدایکبوونەوە هەموو خەڵکی لە خودا دابڕاون، نەیاری خودان و توڕەیی خودا لەسەریانە (ئەفەسۆس ١:٢-٣).
3. مەسیح. عیسای مەسیح، ئەوەی بەتەواوی مرۆڤە و بەتەواوی خودایە، ژیانێکی بێ گوناه ژیا، لەسەر خاچ مرد بۆ هەڵگرتنی توڕەیی خودا لەسەر ئەو کەسانەی کە باوەڕی پێدەهێنن، هەروەها لە مردن هەستایەوە بۆ پێدانی ژیانی هەتاهەتایی بە خەڵکەکەی (یۆحەنا ١:١، یەکەم تیمۆساوس ٥:٢، عیبرانیەکان ٢٦:٧، ڕۆما ٢١:٣-٢٦، دووەم کۆڕنسۆس ٢١:٥،  یەکەم کۆڕنسۆس ٢٠:١٥-٢٢).
4. وەڵامدانەوە. خودا هەمووان بانگ دەکات بۆ تۆبەکردن لە گوناهەکانیان و متمانەکردن بە مەسیح بۆ ڕزگاربوونیان (مەرقۆس ١٥:١، کردار ٢١:٢٠، ڕۆما ٩:١٠-١٠). 

( بەشێک لەم بابەتە وەرگیراوە لە The Gospel and Personal Evangelism لەلایەن ماڕک دێڤەر، لاپەڕە.٤٣)

ئەم وتارە وەگیراوە لەم سەرچاوەیە.